Motho yo mongwe le yo mongwe yoo a ilego a leka go betha ntšhi o a tseba gore seo ga se bonolo. Ntšhi e kgona go tšhaba ka lebelo le legolo kudu ge motho a leka go e betha.

 Banyakišiši ba hweditše gore ntšhi yeo e bitšwago fruit fly e kgona go ya ka mahlakoreng a go fapafapana go swana le sefofane sa ntwa, eupša yona e dira seo ka motsotswana feela. Moprofesara Michael Dickinson o re: “Ge dintšhi tše di sa tšwa go belegwa di fofa bjalo ka ge e ka ke kgale di belegwe. Seo se no swana le ge ngwana yo a sa tšwago go belegwa a kgona go fofiša sefofane sa ntwa.”

 Banyakišiši ba hweditše gore dintšhi tšeo di kgona go phuphusetša maphego a tšona ka makga a 200 ka motsotswana. Le gona, di kgona go diriša lephego le tee gore di ye ka lehlakoreng le itšego e le gore di itšhireletše kotsing.

 Go tšea nako e kaaka’ng gore ntšhi yeo e bitšwago fruit fly e pheme kotsi? Banyakišiši ba hweditše gore e dira seo ka lebelo le legolo kudu go feta le ponyo ya leihlo. Dickinson o re: “Dintši tše di kgona go tseba ka pelapela moo kotsi e lego gona le moo di swanetšego go tšhabela gona.”

 Banyakišiši ba sa ipotšiša gore go tla bjang gore ntšhi ye e nago le bjoko bjo bonyenyane ka tsela ye e dire dilo tše tšeo di makatšago.

 O nagana eng? Na bokgoni bja ntšhi ye bja go dira dilo ka lebelo bo no itiragalela? Goba bo hlamilwe?