Puku ya Pele ya Samuele 17:1-58
17 Bafilisita ba kgobokanya mašole a bona gore ba yo lwa. Ba ile ba kgobokana Soko ya Juda ba hloma ditente magareng ga Soko le Aseka kua Efese-Damima.
2 Saulo le banna ba Isiraele bona ba kgobokana gomme ba hloma ditente Moeding wa Elaa. Ba itokišeletša go yo lwa le Bafilisita.
3 Bafilisita ba be ba eme thabeng yeo e lego ka mošono gomme Baisiraele ba eme thabeng yeo e lego ka mošola, magareng ga bona go be go na le moedi.
4 Ditenteng tša Bafilisita gwa tšwelela nkgwete. Leina la yona e be e le Goliata yoo a bego a etšwa Gathe. Botelele bja gagwe e be e le dimithara tše e ka bago tše tharo.*
5 O be a rwele kefa ya koporo gomme a apere seaparo sa ntwa sa dikgapetla tša go hlatlagana. Seaparo sa gagwe sa ntwa sa koporo, se be se imela dikhilograma tše e ka bago tše 57.*
6 Maotong a gagwe o be a tlemeletše dišireletši tša koporo gomme lerumo la koporo le be le le magetleng a gagwe.
7 Kota ya lerumo la gagwe e be e swana le kota ya balogi. Tšhipi ya lerumo la gagwe e be e imela dikhilograma tše e ka bago tše šupago* gomme morwadi wa kotse ya gagwe o be a gwanta pele ga gagwe.
8 A ema a goeletša mašole a Isiraele a re: “Go re’ng le itokišeditše go tlo lwa le rena? Nna ke Mofilisita, gomme lena le bahlanka ba Saulo. Ikgetheleng monna yo a tlago go lwa le nna.
9 Ge e ba a ka kgona go lwa le nna a mpolaya, gona re tla ba bahlanka ba lena. Eupša ge e ba nka lwa le yena ka mmolaya, gona lena le tla ba bahlanka ba rena, la re hlankela.”
10 Ke moka Mofilisita yoo a re: “Ke ikemišeditše go lwa le mašole a Isiraele lehono. Mpheng monna gore nna le yena re tle re lwe!”
11 Ge Saulo le Baisiraele ka moka ba ekwa mantšu a Mofilisita yoo, ba ile ba tšhoga gomme ba boifa kudu.
12 Dafida e be e le morwa wa Jese wa Moefurata yo a bego a etšwa Betlelehema ya Juda. Jese o be a na le barwa ba seswai. Mehleng ya Saulo, Jese o be a šetše a tšofetše.
13 Barwa ba bararo ba bagolo ba Jese ba be ba ile ntweng le Saulo, maina a barwa ba gagwe ba bararo bao ba ilego ba ya ntweng e be e le Eliaba morwa wa gagwe wa mathomo, wa bobedi e le Abinadaba gomme wa boraro e le Shaama.
14 Dafida e be e le yo monyenyane go bona gomme bobuti’agwe ba bararo ba be ba sepetše le Saulo.
15 Ge Dafida a be a hlankela Saulo, o be a fela a eya go diša dinku tša tatagwe kua Betlelehema.
16 Mofilisita yoo o feditše matšatši a 40 a etla a ema pele ga bona ka masa le mantšiboa gore a ba hlohle.
17 Ke moka Jese a re go Dafida morwa wa gagwe: “Hle tšea sekotlelo se sa dilithara tše e ka bago tše 22 sa dithuthupe* le dinkgwa tše tše lesome o di išetše bana beno ka pela kua ditenteng.
18 Tšea ditšhese tše tše lesome o di nee molaodi wa mašole a 1 000 (sekete). Le gona o bone ge e ba bobuti’ago ba sa phela gabotse gomme o mpoele le bohlatse bja gore ba sa phela.”
19 Ba be ba na le Saulo le banna ba bangwe ba Isiraele Moeding wa Elaa, ba elwa le Bafilisita.
20 Ke moka Dafida a tsoga e sa le ka masa gomme a kgopela motho gore a mo šalele le dinku gomme a rwala dilo tšeo tatagwe a mo laetšego tšona ke moka a sepela. Ge a fihla kampeng, mašole a be a etšwa a eya go lwa e bile a hlabile mokgoši wa ntwa.
21 Mašole a Baisiraele le a Bafilisita a ema a lebeletšane gore a lwe.
22 Gateetee Dafida a šia morwalo wa gagwe le mohlokomedi wa merwalo, ke moka a kitimela ntweng. Ge a fihla, a botšiša gore bobuti’agwe ba ya bjang.
23 Ge a sa bolela le bona, gwa tšwelela nkgwete yeo leina la yona e lego Goliata, Mofilisita yo a tšwago Gathe, a tšwelela gare ga mašole a Bafilisita gomme a bolela mantšu ao a ilego a a bolela peleng, Dafida yena a mo kwa.
24 Banna ba Isiraele ka moka ge ba bona monna yoo, ba tšhaba, ka ge ba be ba mmoifa kudu.
25 Banna ba Isiraele ba be ba re: “Na le a mmona monna yola? O tletše go rumola setšhaba sa Isiraele. Monna yo a ka mmolayago, kgoši e tla mo fa mahumo a mantši, ya ba ya mo fa le morwedi wa yona gomme lapa la tatagwe le ka se lefe makgetho le ditirelo Isiraeleng.”
26 Dafida a botšiša banna bao ba bego ba eme kgauswi le yena, a re: “Monna yo a ka bolayago Mofilisita yola gomme a tloša kgobošo go Isiraele o tla fiwa’ng? Mofilisita yo yo a sa bollago o itira mang mo a ka hlohlago mašole a Modimo yo a phelago?”
27 Ke moka batho ba mmotša sona sela ba mmoditšego peleng, ba re: “Se ke seo se tlago go direlwa monna yo a ka mmolayago.”
28 Eliaba buti’agwe a mo kwa ge a bolela le banna bao gomme a galefela Dafida kudu mo a itšego go yena: “O nyakang mo? Dinku tše sego kae tšeo di lego lešokeng o di tlogetše le mang? Ke a tseba gore o a ikgodiša e bile o logile maano a gore o tle mo gore o tle o bone ntwa.”
29 Dafida yena a re: “Kgane ke dirile’ng? Nna ke be ke no ipotšišetša feela.”
30 Ke moka Dafida a tloga go yena a ya a botšiša yo mongwe potšišo yeo a bego a e botšišitše peleng, gomme batho ba mo araba ka tsela yeo ba bego ba mo arabile ka yona peleng.
31 Batho ba bangwe ba ile ba kwa seo Dafida a se boletšego, gomme ba ya ba botša Saulo. Ke moka yena a re a bitšwe.
32 Dafida a re go Saulo: “A go se be le monna yo a boifišwago ke Mofilisita yoo. Nna mohlanka wa gago ke tla ya gomme ka lwa le yena.”
33 Saulo yena a re go Dafida: “O ka se kgone go yo lwa le Mofilisita yoo ka gobane o mošemanyana, eupša yena o bile lešole go tloga bosweng bja gagwe.”
34 Ke moka Dafida a re go Saulo: “Nna mohlanka wa gago ke bile modiši wa dinku tša tate. Ka letšatši le lengwe go kile gwa tla tau, gwa ba gwa tla le bere gomme e nngwe le e nngwe ya tšona e ile ya tšea nku mohlapeng.
35 Ke moka ka šala tau yeo morago ka e itia gomme ka phološa nku molomong wa yona. Ge e re e lwa le nna, ka e swara ka boya* bja yona, ka e itia gomme ka e bolaya.
36 Nna mohlanka wa gago ke bolaile tau le bere. Bjale Mofilisita yo, yo a sa bollago ke tlo mmolaya go swana le e nngwe ya tšona ka gobane o rumotše mašole a Modimo yo a phelago.”
37 Ke moka Dafida a buša a re: “Jehofa yo a mphološitšego go tau le go bere, ke yena yo a tlago go mphološa go Mofilisita yo.” Ke moka Saulo a re go Dafida: “Sepela, anke Jehofa a be le wena.”
38 Saulo a tšea diaparo tša gagwe a di apeša Dafida, a mo rweša kefa ya koporo, ke moka a mo apeša seaparo sa ntwa.
39 Ke moka Dafida a bofelela sabola ya gagwe diaparong tša gagwe. A re o leka go sepela, eupša gwa pala ka gobane o be a se a di tlwaela. Dafida a re go Saulo: “Ga ke kgone go sepela ka dilo tše, ka gobane ga se ka di tlwaela.” Ke moka Dafida a di apola.
40 A tšea molamo wa gagwe, gomme a topa maswikana a mahlano a boreledi moeding, a a tsenya ka mokotlaneng wa gagwe wa go ya madišong, a swere seragamabje. Ke moka a batamela Mofilisita yoo.
41 Mofilisita le yena a batamela kgauswi kudu le Dafida gomme monna yo a bego a mo swaretše kotse o be a mo etile pele.
42 Ge Mofilisita yoo a bona Dafida, o ile a mo nyatša, ka ge e be e le mošemanyana yo mohwibitšwana, yo mobotse kudu.
43 Mofilisita yoo a re go Dafida: “Na ke nna mpša, mo o tlago go nna o swere molamo?” Ke moka Mofilisita a kgopela medimo ya gagwe gore e kweše Dafida bohloko.
44 Mofilisita yoo a re go Dafida: “Wena batamela feela, ke tla go bolaya gomme ka tšea setopo sa gago ka se fa dinonyana le dibata.”
45 Dafida yena a re go Mofilisita yoo: “Wena o tla go lwa le nna ka sabola le marumo a mabedi, eupša nna ke tla go lwa le wena ka leina la Jehofa wa madira, Modimo wa mašole a Isiraele yo o mo rumotšego.
46 Lehono Jehofa o tla nthuša gore ke go fenye gomme ke tla go bolaya, ka go kgaola hlogo, ka ba ka tšea ditopo tša mašole a Bafilisita ka di fa dinonyana le dibata. Ke moka batho ba lefase ka moka ba tla tseba gore Modimo wa nnete o na le Isiraele.
47 Batho ka moka bao ba kgobokanego mo, ba tla tseba gore Jehofa ga a phološe ka sabola goba ka lerumo, ka gobane ntwa ke ya Jehofa gomme o tla re thuša gore re le fenye.”
48 Ke moka Mofilisita a ema, a batamela kgauswi gore a gahlanetše Dafida, eupša Dafida yena a kitimela moo go nago le mašole a Bafilisita gore a yo lwa le Mofilisita yoo.
49 Dafida a tsenya seatla mokotlaneng wa gagwe a ntšha leswika gomme a le betša ka seragamabje. Ke moka a itia Mofilisita phatleng ka lona gomme la tsena phatleng ya Mofilisita yoo, yena a wela fase ka sefahlego.
50 Dafida o fentše Mofilisita ka seragamabje le leswika. O iteile Mofilisita ka leswika gomme a mmolaya le ge a be a se a swara sabola.
51 Dafida a kitima a ema godimo ga Mofilisita yoo, a tšea sabola ya Mofilisita a e ntšha mokotlaneng wa yona. A mo kgaola hlogo ka yona e le go kgonthišetša gore o hwile. Ge Bafilisita ba bona gore lešole la bona le matla le hwile, ba ile ba tšhaba.
52 Ke moka mašole a Isiraele le a Juda a ema a hlaba mokgoši, a kitimiša Bafilisita go tloga moeding go fihla dikeiting tša Ekirone. Ditopo tša Bafilisita bao ba bego ba bolailwe di be di rapaletše tseleng go tloga Shaaraima go fihla Gathe le Ekirone.
53 Ka morago ga ge Baisiraele ba boile go kitimiša Bafilisita, ba ile ba thopa ditente tša bona.
54 Dafida a tšea hlogo ya Mofilisita a e tliša Jerusalema gomme dibetša tša Mofilisita yoo a di tsenya ka tenteng ya gagwe.
55 Nakong ya ge Saulo a bona Dafida a eya go lwa le Mofilisita, o ile a re go Abenere molaodi wa Mašole: “Abenere, mošemane yo ke morwa wa mang?” Abenere a re: “Kgoši ya ka, ke ikana pele ga gago, ruri ga ke tsebe!”
56 Kgoši ya re: “Sepela o yo botšiša gore lesogana le ke morwa wa mang.”
57 Gateetee ge Dafida a boa go bolaya Mofilisita, Abenere o ile a mo tšea a mo tliša go Saulo, Dafida o be a swere hlogo ya Mofilisita ka seatla.
58 Bjale Saulo a re go yena: “Wena mošemane, o morwa wa mang?” Dafida a re: “Ke nna morwa wa mohlanka wa gago Jese wa go tšwa Betlelehema.”
Mengwalo ya tlase
^ Bona Dit. B14.
^ Phetolelo ya lentšu ka lentšu e re, “Dishekele tše 5 000.” Bona Dit. B14.
^ Phetolelo ya lentšu ka lentšu e re, “Dishekele tše 600.” Bona Dit. B14.
^ Goba, “mabele ao a gadikilwego.”
^ Goba, “ka mohlagare wa yona.” Phetolelo ya lentšu ka lentšu e re, “ka mariri.”
