Daniele 2:1-49
-
Kgoši Nebukadinetsara o lora toro yeo e mo tšhošago (1-4)
-
Ga go na le monna yo bohlale yo a ka mmotšago toro yeo (5-13)
-
Daniele o kgopela Modimo gore a mo thuše (14-18)
-
Daniele o tumiša Modimo ka ge a mo utolletše sephiri (19-23)
-
Daniele o botša kgoši gore e lorile eng (24-35)
-
Toro e a hlathollwa (36-45)
-
Leswika la mmušo le tlo pšhatlaganya seswantšho (44, 45)
-
-
Kgoši e hlompha Daniele (46-49)
2 Ka ngwaga wa bobedi wa ge Nebukadinetsara a buša, o ile a lora ditoro tše dintšhi gomme a tšhoga kudu moo a ilego a felelwa ke boroko.
2 Ka gona, kgoši ya laela gore go bitšwe baperisita bao ba dirago dilo tša maleatlana, boramalea, baloi le Bakaladea bao ba bego ba tseba thuto ya dinaledi gore ba tle ba e botše gore ditoro tša yona di ra goreng. Ka gona ba ile ba tla gomme ba ema pele ga kgoši.
3 Ke moka kgoši ya re go bona: “Ke lorile toro e bile ke tšhogile ka gobane ke nyaka go tseba gore ke lorile eng.”
4 Bakaladea ba araba kgoši ka Searama* ba re: “Wena kgoši, anke o phele go ya go ile. Botša rena bahlanka ba gago toro yeo gomme rena re tla e hlatholla.”
5 Ke moka kgoši ya araba Bakaladea ya re: “Ke le botša la mafelelo gore ge e ba le sa mpotše gore ke lorile eng le gore toro yeo e ra goreng, ke tla le ripelela gomme dintlo tša lena tša fetolwa mafelo a boithomelo a batho bohle.*
6 Eupša ge e ba le ka mpotša gore ke lorile eng le gore toro yeo e ra goreng, ke tlo le fa dimpho, ka le putsa kudu ka ba ka le fa le maemo a godimo. Ka gona mpotšeng gore ke lorile eng le gore toro yeo e ra goreng.”
7 Ba e araba gape ba re: “Wena kgoši, botša rena bahlanka ba gago toro yeo gomme rena re tla go botša gore e ra goreng.”
8 Ke moka kgoši ya re: “Ke a bona gore le leka go ikokeletša nako, ka gobane le nkwele gore ke itšeng.
9 Ge e ba le sa mpotše gore ke lorile eng, gona go na le selo se setee seo se le emetšego ka moka ga lena. Ke tlo le otla ka kotlo ya go swana ka moka ga lena. Le dumelelane ka gore le nkgoketše le go mpotša maaka le ipotša gore mohlomongwe ke tla fetola mogopolo. Ka gona, ge e ba le ka mpotša gore ke lorile eng, gona ke tla tseba gore le tla kgona le go mpotša gore toro yeo e ra goreng.”
10 Bakaladea ba araba kgoši ba re: “Ga go na motho mo lefaseng yo a ka kgonago go dira seo kgoši e se nyakago, ka gobane ga gona kgoši e kgolo goba mmuši yo a kilego a kgopela selo sa go swana le se go moperisita le ge e le ofe yo a dirago dilo tša maleatlana, ramalea goba Mokaladea.
11 Seo kgoši e se kgopelago ke se sethata, le gona ga go na motho yo a ka kgonago go se botša kgoši, ge e se medimo yeo e sa phelego le batho ba nama le madi.”
12 Kgoši ya galefa kudu gomme ya laela gore banna ka moka ba bohlale ba Babilona ba bolawe.
13 Ge taelo e se na go ntšhiwa gomme banna ka moka ba bohlale ba le kgauswi le go bolawa, go ile gwa nyakwa Daniele le bagwera ba gagwe gore le bona ba tle ba bolawe.
14 Ka nako yeo Daniele ka bohlale o ile a ya go bolela le Arioko a sa bonwe ke motho. Arioko e be e le yo mogolo wa bahlapetši ba kgoši. Le gona, ka nako yeo Arioko o be a tšwile gore a yo bolaya banna ka moka ba bohlale ba Babilona.
15 Daniele a botšiša Arioko, e lego mohlankedi wa kgoši a re: “Ke ka baka la eng kgoši e ntšhitše taelo e sehlogo gakaakaa?” Ke moka Arioko a botša Daniele ka taba yeo.
16 Daniele a ya go kgoši gomme a e kgopela gore e mo fe nako ya gore a tle a e hlathollele toro yeo.
17 Ke moka Daniele a ya ntlong ya gagwe a tsebiša bagwera ba gagwe, e lego Hanania, Mishaele le Asaria ka taba yeo.
18 O ile a ba kgopela gore bona le yena ba rapele Modimo wa legodimong gore a ba gaugele ka gore a ba utollele sephiri seo, e le gore Daniele le bagwera ba gagwe ba se ke ba bolawa ge banna ba bohlale ba Babilona ba bolawa.
19 Ke moka bošegong bjoo, Modimo a utollela Daniele sephiri seo ka pono. Ka gona, Daniele a tumiša Modimo wa legodimong.
20 A re:
“Anke leina la Modimo le retwe go ya go ileKa gobane bohlale le matla ke tša gagwe a nnoši.
21 O fetoša dinako le ditiragalo.O tloša dikgoši gomme a bea tše dingwe.Bao ba hlalefilego o ba fa bohlale, bao ba nago le temogo a ba fa tsebo.
22 O utolla dilo tšeo di tseneletšego le tšeo di fihlilwego.O tseba seo se lego leswiswing,Le gona seetša se go yena.
23 Wena Modimo wa borakgolokhukhu ba ka, ke a go leboga le go go reta,Ka gobane o mphile bohlale le matla.
Ga bjale o ntirile gore ke tsebe seo re go kgopetšego sona,E bile o re tsebišitše seo se tshwenyago kgoši.”
24 Ke moka Daniele a ya go Arioko yoo kgoši e bego e mo kgethile gore a bolaye banna ba bohlale ba Babilona. A re go yena: “O se ke wa bolaya banna ba bohlale ba Babilona. Nkiše go kgoši gomme ke tla e hlathollela toro ya yona.”
25 Kapelapela Arioko a iša Daniele pele ga kgoši, a re go yona: “Ke hweditše monna yo a tšwago go mathopša a Bajuda yo a ka kgonago go go hlathollela toro ya gago wena kgoši.”
26 Kgoši ya bolela le Daniele yoo leina la gagwe e bego e le Belteshatsara ya re: “Na ka nnete o ka mpotša gore ke lorile eng, wa ba wa ntlhathollela gore toro yeo e ra goreng?”
27 Daniele a re go kgoši: “Gare ga banna ba bohlale, boramalea, baperisita bao ba dirago dilo tša maleatlana goba batho bao ba tsebago thuto ya dinaledi, ga go le o tee wa bona yo a ka kgonago go botša wena kgoši ka sephiri seo o se botšišago.
28 Eupša go na le Modimo magodimong yo a utollago diphiri, e bile o dirile gore wena Kgoši Nebukadinetsara o tsebe seo se tlago go direga mehleng ya bofelo. Toro yeo o e lorilego le dipono tše o di bonego ge o be o robetše mpeteng wa gago ke tše:
29 “Wena kgoši, ge o be o robetše mpeteng wa gago, o ile wa lora ka dilo tšeo di tlago go direga nakong e tlago. E bile Moutolodi wa diphiri o dirile gore o tsebe seo se tlago go direga.
30 Ge e le nna ga se ka utollelwa sephiri se ka gobane ke le bohlale go feta batho ka moka, eupša ke se utolletšwe gore ke tle ke kgone go hlathollela wena kgoši e le gore o tle o tsebe seo o bego o lora ka sona.
31 “Wena kgoši o rile o sa lebeletše wa bona seswantšho se segolo kudu. Seswantšho seo, seo e bego e le se segolo kudu e bile se phadima kudu, se be se eme pele ga gago e bile se be se tšhoša.
32 Seswantšho seo, se be se na le hlogo ya gauta yeo e sa tswakwago le selo, sehuba le matsogo a sona e be e le tša silifera, mpa le dirope tša sona e le tša koporo,
33 maoto a sona e le a tšhipi, e bile karolo e nngwe ya dinao tša sona e le tšhipi gomme e nngwe e le letsopa.
34 O ile wa dula o lebeletše go fihlela go tšwelela leswika. Leswika leo le ile la betha seswantšho maotong a sona a tšhipi le letsopa gomme la se pšhatlaganya. Leswika leo le be le se la fošwa ke seatla sa motho.
35 Ka nako yeo tšhipi, letsopa, koporo, silifera le gauta ka moka ga tšona di ile tša pšhatlagana gomme tša swana le mooko wo o tšewago ke moya seboeng ka selemo. Le gona moya o ile wa di rwala moo e lego gore go ile gwa se sa bonala le mohlalanyana wa tšona. Eupša leswika leo le bethilego seswantšho seo, le ile la fetoga thaba e kgolo gomme la tlala lefase ka moka.
36 “Ye ke toro yeo o e lorilego. Bjale re tla go hlalosetša wena kgoši gore toro yeo e ra goreng.
37 Wena kgoši, o kgoši ya dikgoši yeo Modimo a e filego mmušo, bogolo, matla le seriti.
38 E bile o go file matla a gore o buše batho kae le kae moo ba dulago gona. O go file le matla a gore o buše dibata tša nageng le dinonyana tša magodimong. Hlogo yeo ya gauta ke wena kgoši.
39 “Eupša ka morago ga mmušo wa gago go tla tsoga mmušo o mongwe wa maemo a tlase ge o bapišwa le mmušo wa gago. Ka morago ga wona go tla tsoga mmušo o mongwe wa boraro woo e lego karolo ya koporo, gomme o tla buša lefase ka moka.
40 “Mmušo wa bone wona o tla tia go swana le tšhipi. Go no swana le ge tšhipi e pšhatlaganya le go šila dilo tše dingwe ka moka, mmušo wo le wona o tlo pšhatlaganya le go fedišetša sa ruri mebušo ye ka moka.
41 “Ka ge o bone karolo e nngwe ya dinao le ya menwana ya maoto e dirilwe ka letsopa gomme e nngwe e dirilwe ka tšhipi, le mmušo woo o tla arogana. Eupša karolo e nngwe ya mmušo woo, e tla tia go swana le tšhipi, bjale ka ge o bone tšhipi e tswakane le letsopa le boleta.
42 Ka ge karolo e nngwe ya menwana ya maoto e dirilwe ka tšhipi mola e nngwe e dirilwe ka letsopa, le karolo e nngwe ya mmušo woo e tla ba e tiilego gomme e nngwe ya ba e fokolago.
43 Ka ge o bone tšhipi e tswakane le letsopa le boleta, karolo e tiilego ya mmušo e tla tswakana le batho, eupša di ka se kgomarelane. Karolo e nngwe e ka se kgomarele e nngwe, go no swana le ge tšhipi e sa kgomarelane le letsopa.
44 “Mehleng ya dikgoši tšeo, Modimo wa legodimo o tla hloma mmušo wo o ka se kego wa fedišwa. Mmušo woo o ka se ke wa fetišetšwa go batho ba bangwe. O tla pšhatlaganya wa ba wa fediša mebušo ye ka moka gomme wona o tla buša o nnoši go ya go ile.
45 Seo se tla direga go no swana le ge o bone leswika leo le tšwilego thabeng le sa ntšhwe ke diatla tša motho, gomme leswika leo la pšhatlaganya tšhipi, koporo, letsopa, silifera le gauta. Modimo yo Mogolo o dirile gore wena kgoši o tsebe seo se tlago go direga nakong e tlago. Toro yeo o e lorilego ke nnete e bile tlhathollo ya yona e a tshepega.”
46 Ke moka Kgoši Nebukadinetsara a khunama sefahlego sa gagwe se kgwathile fase go bontšha gore o hlompha Daniele. Ka gona a laela gore Daniele a fiwe mpho a be a thuntšhetšwe diorelo.
47 Kgoši ya bolela le Daniele ya re: “Ruri Modimo wa lena ke Modimo gare ga medimo, e bile ke Morena wa dikgoši le Moutolodi wa diphiri, ka gobane ke yena a go thušitšego go utolla sephiri se.”
48 Ka gona kgoši e ile ya bea Daniele maemong a godimo, ya mo fa dimpho tše dintšhi tše dibotse, ya ba ya mo dira gore a buše profense ka moka, ya mo dira le gore e be yo mogolo go banna ka moka ba bohlale ba Babilona.
49 Ke moka, Daniele a kgopela kgoši gore e kgethe Shaderaka, Meshaka le Abedinego gore e be balaodi ba profense ya Babilona, gomme kgoši ya ba kgetha. Eupša Daniele yena a šoma ka lapeng la kgoši.
Mengwalo ya tlase
^ Mathomong, Da 2:4b go fihla go 7:28 e be e ngwadilwe ka Searama.
^ Goba mohlomongwe, “mafelo ao go lahlelwago ditšhila go ona; meboto ya boloko.”
