Daniele 6:1-28
6 Dario o ile a bona e le mo gobotse gore a kgethe balaodi ba 120 (lekgolo-masomepedi) bao ba bego ba tla buša mmušong wa gagwe ka moka.
2 O ile a kgetha bahlankedi ba bararo gore ba ba okamele. Yo mongwe wa bahlankedi bao e be e le Daniele. Balaodi bao ba be ba dula ba tsebiša kgoši dilo tšeo di diregago e le gore kgoši e se ke ya lahlegelwa ke selo.
3 Ge nako e dutše e eya, Daniele o ile a bontšha gore o na le bokgoni kudu go feta bahlankedi ba bangwe ka moka le balaodi, ka gobane o be a na le moya wo o sa tlwaelegago. Le gona kgoši e be e ikemišeditše go mo fa maemo a godimo mmušong ka moka.
4 Ka nako yeo, bahlankedi ba bagolo le balaodi ba be ba nyaka selo seo ba ka latofatšago Daniele ka sona mabapi le mešomo yeo a bego a e dira mmušong, eupša ga se ba hwetša seo ba ka mo latofatšago ka sona goba ba hwetša a tshetše molao ka gobane o be a tshepega, a dira dilo ka moka gabotse e bile a se a tshela molao.
5 Ke moka banna bao ba re: “Re ka se hwetše selo le se setee seo re ka latofatšago Daniele ka sona, ka ntle le ge e ba re ka nyaka seo re ka mo latofatšago ka sona seo se thulanago le molao wa Modimo wa gagwe.”
6 Ka gona, bahlankedi bao ba bagolo le balaodi ba ya go kgoši e le sehlopha. Ba re go yona: “Wena Kgoši Dario, anke o phele go ya go ile.
7 Bahlankedi ka moka ba bagolo ba mmušo, balaodi, bathuši ba balaodi, matona le babuši, ba boledišane gore go ntšhiwe taelo ya ka bogošing ya go thibela batho gore ka matšatši a 30, ge go ka ba le motho yo a kgopelago selo go modimo le ge e le ofe goba go motho le ge e le ofe, ge e se go wena kgoši, a lahlelwe moleteng wa ditau.
8 Bjale wena kgoši, ntšha molao o be o o saenele e le gore o se ke wa fetošwa, ka gobane molao wa Bamede le Baperesia ga o fetošwe.”
9 Ka gona, Kgoši Dario a saenela molao woo.
10 Eupša ge Daniele a se na go kwa gore go ntšhitšwe molao e bile o saenetšwe, o ile a ya ntlong ya gagwe yeo mafasetere a yona ao a lebanego le Jerusalema a bego a butšwe. O be a khunama ka matolo gararo ka letšatši a rapela Modimo wa gagwe le go mo tumiša, ka ge a be a tlwaetše go dira bjalo pele go ntšhiwa molao woo.
11 Ka nako yeo, banna bao ba ile ba itahlela ka ntlong ya Daniele gomme ba mo hwetša a rapela e bile a kgopela gore Modimo wa gagwe a mo gaugele.
12 Ke moka banna bao ba ya go kgoši ba e gopotša ka molao woo e bego e o ntšhitše ba re: “Na ga se wena o saennego molao wa go thibela batho gore ka matšatši a 30, ge go ka ba le motho le ge e le ofe yo a kgopelago selo go modimo le ge e le ofe goba go motho le ge e le ofe, ge e se go wena kgoši, a lahlelwe moleteng wa ditau?” Ke moka kgoši ya araba ya re: “Taba yeo e tiišitšwe go ya ka molao wa Bamede le Baperesia ka gobane ga o fetošwe.”
13 Ba napa ba botša kgoši ba re: “Daniele yo e lego yo mongwe wa mathopša a Juda ga a go hlomphe wena kgoši e bile ga a hlomphe molao woo o o saenetšego, eupša o rapela gararo ka letšatši.”
14 Ge kgoši e se na go kwa ka taba yeo, e ile ya kwa bohloko kudu, gomme ya leka go nagana kamoo e ka phološago Daniele ka gona. Letšatši le ile la ba la sobela e dira sohle seo e ka se kgonago go phološa Daniele.
15 Mafelelong, banna bao ba ya go kgoši e le sehlopha gomme ba re go yona: “Wena kgoši, gopola gore molao wa Bamede le Baperesia o re molao le ge e le ofe woo o ntšhitšwego ke kgoši o ka se fetošwe.”
16 Ka gona kgoši ya laela gore Daniele a tlišwe, ke moka a tlišwa gomme a lahlelwa ka moleteng wa ditau. Ke moka kgoši ya re go Daniele: “Modimo wa gago yoo o dulago o mo hlankela o tla go phološa.”
17 Ke moka gwa tlišwa leswika gomme la bewa molomong wa molete wa ditau, ke moka kgoši ya kiba leswika leo ka palamonwana ya yona yeo e nago le leswao le ka dipalamonwana tša batho bao ba hlomphegago bao e ba kgethilego, e le gore phetho yeo e dirilwego mabapi le Daniele e se ke ya fetošwa.
18 Ke moka kgoši ya ya mošate wa yona. E ile ya fetša bošego ka moka e ikona dijo, ya ba ya gana boithabišo* le ge e le bofe, e bile e sa kgone le go robala.
19 Mafelelong, ge go esa kgoši ya tsoga gomme ya kitimela moleteng wa ditau.
20 Ge kgoši e se na go batamela molete wa ditau, e ile ya goelela Daniele ka lentšu leo le nyamilego. Ke moka ya re: “Wena Daniele mohlanka wa Modimo yo a phelago, na Modimo wa gago yoo o dulago o mo hlankela o kgonne go go phološa ditaung?”
21 Daniele a napa a araba kgoši a re: “Wena kgoši mong wa ka, anke o phele go ya go ile.
22 Modimo wa ka o romile morongwa wa gagwe gomme a tswalela melomo ya ditau e bile ga se tša nkgobatša, ka gobane ke be ke se na molato pele ga gagwe, e bile le wena kgoši ga se ka go direla phošo.”
23 Kgoši e ile ya thaba kudu gomme ya laela gore Daniele a ntšhwe ka moo moleteng. Ge Daniele a be a ntšhwa ka moo moleteng go be go se na moo a bego a gobetše gona ka gobane o be a ithekgile ka Modimo wa gagwe.
24 Ke moka kgoši ya ntšha taelo ya gore banna ka moka bao ba ilego ba latofatša Daniele ba tlišwe gomme ge ba tlišitšwe ba lahlelwa ka moleteng wa ditau. Ba ile ba lahlelwa le basadi ba bona le barwa ba bona. Ditau tšeo di ile tša ba hlasela, tša ba tša robaganya marapo a bona ka moka le pele ba ka wela fase.
25 Ke moka Kgoši Dario a ngwalela batho ba ditšhaba ka moka le maleme ka moka bao ba bego ba dula lefaseng ka moka a re: “Anke le dule le na le khutšo!
26 Ke ntšha taelo ya gore nageng ka moka yeo ke bušago go yona, batho ba swanetše go boifa le go hlompha Modimo wa Daniele. Ka gobane ke Modimo yo a phelago e bile o dula a le gona, mmušo wa gagwe o ka se tsoge o fedišetšwe e bile o buša go ya go ile.
27 O a phološa e bile o dira mehlolo e megolo le dilo tšeo di bontšhago gore o na le matla magodimong le lefaseng, ka gobane o phološitše Daniele gore a se ke a bolawa ke ditau.”
28 Ka gona, dilo tša sepelela Daniele gabotse mmušong wa Dario le mmušong wa Korese wa Moperesia.
Mengwalo ya tlase
^ Goba mohlomongwe, “le gona ga go na batho ba go tseba mmino bao ba ilego ba tlišwa go yona.”
