Diema 17:1-28
17 Go kaone go ja lerathana la borotho bjoo bo omilego lapeng leo go nago le khutšo,Go feta go ja dijo tše dintšhi lapeng leo go nago le dingangišano.
2 Ge e ba morwa a dira dilo tšeo di lešago dihlong, mohlanka yo bohlale wa tatagwe o tla mmuša,E bile mohlanka yoo o tla hwetša bohwa go swana le bana ba mong wa gagwe.
3 Go no swana le ge silifera e sekišetšwa pitšeng gomme gauta e sekišetšwa sebešong,Jehofa le yena o hlahloba dipelo.
4 Motho yo a dirago dilo tše mpe o rata go theetša dipolelo tšeo di gobatšago,Gomme motho yo a ratago maaka, o rata go theetša ge ba bangwe ba senywa maina.
5 Yo a kwerago modiidi o roga Mmopi wa gagwe,Gomme yo a thabišwago ke ge yo mongwe a wetšwe ke masetlapelo, ruri o tla otlwa.
6 Ditlogolo di bjalo ka mphapahlogo go batšofadi,Gomme bana ba bolela gabotse ka botatago bona.
7 Ditlaela ga se tša letelwa gore di bolele dilo tša go ya ka tsela,
Le moetapele ga se a swanela go bolela maaka.
8 Mpho e swana le leswika le bohlokwa go mong wa yona.Dilo ka moka tšeo a di dirago di tla atlega.
9 Yo a lebalelago ba bangwe molato wa bona o bontšha lerato,Eupša yo a dulelago go bolela ka molato woo, o aroganya bagwera ba bagolo.
10 Yo a nago le kwešišo, ge a kgalemelwa o kwešiša kapelapela.Eupša setlaela le ge o ka se betha ka thupa ga lekgolo se ka se kwešiše.
11 Motho yo mobe o dula a nyaka go tsoša diphapano,Eupša moromiwa yo sehlogo o tla mo otla.
12 Go kaone go kopana le bere yeo e amogilwego bana ba yona,Go e na le go kopana le motho wa setlaela yoo a dirago dilo tša bošilo.
13 Mang le mang yo a bušetšago botse ka bobe,Bobe bo ka se tloge ka lapeng la gagwe.
14 Go thoma ntwa go swana le go bulela meetse a ka letamong gore a elele.Tloga pele go ka thoma dingangišano.
15 Jehofa o hloile motho yo mongwe le yo mongwe yo a rego motho yo mobe ga a na molato.O hloile le yoo a rego moloki o na le molato.
16 Go hola ka eng gore setlaela se be le tšhelete ya go reka bohlale,Mola se ka se tsoge se bile bohlale?
17 Mogwera wa nnete o dula a bontšha lerato ka dinako ka moka,E bile o swana le ngwaneno yo o ka ithekgago ka yena mohlang o tlaletšwe.
18 Motho yo a se nago temogo o dira tumelelano pele ga wa gaboGore o tla patela sekoloto sa motho yo mongwe.
19 Motho yo a ratago dingangišano o tla dira diphošo.
Yo a dulago a ikgantšha o ipakela mathata.
20 Motho wa pelo e mpe a ka se atlege,Le gona motho wa go bolela maaka o tla wela mathateng.
21 Tatago ngwana wa setlaela o tla kwa bohloko.Le gona, tatago ngwana wa lešilo ga a thabe.
22 Pelo yeo e thabilego e swana le sehlare seo se fodišago,Eupša moya wo o nyamilego o dira gore mmele o fele matla.
23 Motho yo mobe o tla tšea pipamolomo ka sephiringGore a thibele batho go hwetša toka.
24 Motho wa temogo o dula a nyaka go hwetša bohlale,Eupša mahlo a setlaela a dula a lebelela kua le kua go fihla mafelelong a lefase.
25 Ngwana wa setlaela o nyamiša tatagwe,E bile o kweša mmagwe bohloko.
26 Go otla moloki ga se gwa loka.Go betha batho bao ba hlomphegago le gona ga se gwa loka.
27 Monna yo a nago le tsebo o kgetha mantšu a gagwe gabotse.Le gona, monna yo a nago le temogo o dula a theošitše maswafo.
28 Le setlaela seo se dulago se ikhomoletše se tla lebelelwa se le bohlale,Gomme motho yoo a sa bolelego selo, o tla lebelelwa a na le temogo.
