Diema 27:1-27
27 O se ke wa ikgantšha ka tša ka moso,Ka gobane ga o tsebe gore la ka moso le go swaretše eng.
2 Retwa ke motho yo mongwe, eupša o se ke wa itheta.O retwe ke batho ba bangwe e sego molomo wa gago.
3 Leswika le boima gomme santa e a roba,Eupša go tenwa ke lešilo go boima go di feta ka bobedi.
4 Go galefa go sehlogo gomme go senya bjalo ka lefula,Eupša lehufa le sehlogo le go feta.
5 Go kaone gore motho a go kgalemele go e na le gore a go utele gore o a go rata.
6 Go kaone gore mogwera yo a tshepegago a go kgale le ge seo se tla go kweša bohloko,Go e na le gore lenaba la gago le dule le go bontšha botho.
7 Ge motho a khoše, o gana le todi e tšwago mamapong,Eupša ge motho a swerwe ke tlala, le selo sa go galaka se bose mo go yena.
8 Motho yo a tšhabago moo a dulago gonaO swana le nonyana yeo e tšhabago sehlageng sa yona.
9 Mogwera yo a neago keletšo ka pelo ya gagwe ka moka,O swana le makhura le dinkgišabose tšeo di thabišago pelo.
10 O se ke wa tlogela mogwera wa gago goba mogwera wa tatago.O se ke wa ya moo ngwaneno a lego gona mohlang wa kotsi.Moagišane yo a lego kgauswi o phala ngwaneno yo a lego kgole.
11 Morwa wa ka, hlalefa gomme o thabiše pelo ya ka,Gore ke kgone go fetola yo a nkwerago.
12 Yo bohlale ge a bona kotsi o a ikuta,Eupša wa setlaela o sepela a lebile kotsi yeo gomme a wela mathateng.
13 Tšea kobo ya motho yo a rego o tla patela sekoloto sa motho yo a sa mo tsebego ge e ba mong wa sona a palelwa ke go se patela.Ge e ba a kolota mosadi yo a gobogilego,* mo tšeele selo se sengwe seo o ka itshwarelelago ka sona.
14 Yo a dumedišago wa gabo ka lešata e sa le mesong,Motho yo a mo dumedišago a ka bona eka o a mo roga.
15 Mosadi wa ditshele o swana le ntlo yeo e dulago e nela ge pula e ena.
16 Yo mongwe le yo mongwe yoo a ka kgonago go thiba mosadi yo bjalo,A ka kgona go thiba phefo le go swara makhura* ka matsogo a gagwe.
17 Tšhipi e loutšwa ke tšhipi e nngwe.Ka go realo le sefahlego sa motho se loutšwa ke sa mogwera wa gagwe.
18 Yo a hlokomelago mogo wa gagwe o tla ja dienywa tša wona,Gomme yo a hlokomelago mong wa gagwe o tla hlomphiwa.
19 Go etša ge sefahlego se ipona ka meetseng,Le pelo ya motho e ipona ka pelo ya yo mongwe.
20 Lebitla le lefelo leo batho ba bolago go lona ga di kgotsofale,Le mahlo a motho ga a kgotsofale.
21 Ka ge silifera e sekišetšwa ka pitšeng gomme gauta e sekišetšwa sebešong,Le motho o lekwa ka theto yeo a e hwetšago.
22 Le ge o ka setla lešilo ka mose ka gare ga lehuduBjalo ka mabele,Le ka se tlogele go ba lešilo.
23 O swanetše go tseba mohlape wa gago gabotse,
Gomme o hlokomele dinku tša gago,
24 Ka gobane mahumo a ka se dule a le gona go ya go ile,Le mphaphahlogo o ka se dule o le gona melokong ka moka.
25 Bjang bjo botala bo a hwelela gomme gwa mela bjang bjo boswa,Le gona dimela tša dithabeng di a kgoboketšwa.
26 Dinku tše dinyenyane tše ditona di go nea diaparo,Gomme diphooko di go rekela tšhemo.
27 Ke moka o tla ba le maswi a lekanego a dipudi gore o iphepe,O fepe lapa la gago le bahlanka ba gago ba banenyana.
Mengwalo ya tlase
^ Goba, “motho yo a tšwago nageng e nngwe.”
^ Makhura ao go bolelwago ka ona mo ke a go elela.
