Diema 30:1-33
30 Molaetša o bohlokwa woo Aguri morwa wa Jake a o boditšego Ithiele le Ukale.
2 Ke hloka tsebo go feta motho le ge e le ofeGomme ga ke kwešiše dilo bjalo ka batho ba bangwe.
3 Ga se ka ithuta bohlale,E bile ga ke na tsebo yeo Mokgethwakgethwa a nago le yona.
4 Ke mang yo a kilego a rotogela legodimong a ba a boa?
Ke mang yo a kilego a khuparetša phefo ka diatla tša gagwe?
Ke mang yo a kilego a phuthela meetse ka seaparo sa gagwe?
Ke mang yo a dirilego gore lefase le be le magomo?
Ge e ba o mo tseba, leina la gagwe ke mang, gona leina la morwa wa gagwe ke mang?
5 Mantšu ka moka a Modimo a sekile.
Modimo ke kotse ya bao ba tšhabelago go yena.
6 O se oketše ka selo mantšung a gagweGore a se go kgaleme,Le gore o se ke wa hwetšwa o bolela maaka.
7 Ke go kgopela dilo tše pedi.
O se ke wa ntima tšona pele ke ehwa.
8 Nthuše gore ke se ke ka bolela maaka.
O se nnee bodiidi goba mahumo.
Anke o mphe dijo tšeo di ntekanego,
9 Gore ke se ke ka ba le dilo tše dintšhi gomme ka go latola ka re: “Jehofa ke mang?”
Le gore ke se ke ka ba modiidi gomme ka utswa, ka ba ka nyatšiša leina la Modimo wa ka.
10 O se ke wa senya mohlanka leina go mong wa gagweGore a se go roge, le gore o se ke wa bonwa molato.
11 Go na le batho* bao ba rogago botatago bonaE bile ga ba hlomphe bommago bona.
12 Go na le batho bao ba iponago ba sekileEupša ba se ba sekišwa ditšhila* tša bona.
13 Go na le batho bao ba ikgantšhago kuduLe go nyatša ba bangwe.
14 Go na le batho bao meno a bona a swanago le ditšhoša,Bao meno a bona a mohlagare a swanago le dithipa tša go hlaba diphoofolo,Ba ja batho ba maemo a fase ba mo lefaseng,Ba ja le badiidi ba ba lego setšhabeng ba ba fetša.
15 Dikgofa di na le barwedi ba babedi bao ba rego: “Mphe! Mphe!”
Go na le dilo tše tharo tšeo di sa kgotsofalego,Gomme ke tše nne tšeo di sa kago tša re: “Go lekane!”
16 Ke Lebitla,* boopa,Naga yeo e omilego,Le mollo wo o sa rego: “Go lekane.”
17 Motho yo a kwerago tatagwe le yoo a nyatšago mmagwe,Magokobu a moeding a tla mo gonya leihlo,Gomme la jewa ke bana ba ntšhu.
18 Go na le dilo tše tharo tšeo di mmakatšago kuduLe tše nne tšeo ke sa di kwešišego:
19 Ke ge ntšhu e fofa magodimong,Noga e sepela leswikeng,Sekepe se sepela lewatleng,Le tsela yeo monna a itshwarago ka yona ge a na le mosadi.
20 Tsela ya mosadi wa sehlotlolo še:
O a ja gomme a iphumola molomo,Ke moka a re: “Ga se ka dira phošo.”
21 Go na le dilo tše tharo tšeo di šišinyago lefaseLe tše nne tšeo le ka se kgonego go di kgotlelela:
22 Ke ge lekgoba le buša e le kgoši,Ge setlaela se eja dijo tše dintšhi,
23 Ge mosadi yo a sa rategego a nyalwa,Le ge mosadi a tšea monna wa mosadi yo a mo šomelago.
24 Go na le dilo tše nne tšeo e lego tše dinyenyane kudu lefasengEupša ka tlhago di bohlale:
25 Ditšhoši ga di na matla go swana le dibopiwa tše dingwe,Eupša di itokišetša dijo selemo.
26 Dipela ga di na matla go swana le dibopiwa tše dingwe,Eupša di ikagela dintlo maswikeng a magolo.
27 Ditšie ga di na kgoši,Eupša ka moka ga tšona di gwanta bjalo ka mašole.*
28 Mokgaditswane* o ngaparela dilo ka maoto a wona,Gomme wa tsena ka ntlong ya kgoši.
29 Go na le dilo tše tharo tšeo di kgahlišago ge o di lebeletše.Go na le dilo tše nne tšeo di sepelago ka tsela yeo e kgahlišago ge o di lebeletše:
30 Ke tau yeo e fetago dibata tše dingwe ka matla,Yeo e sa tšhabego motho,
31 Mpša yeo e nago le lebelo, phooko,Le kgoši yeo e nago le mašole a yona.
32 Ge e ba o ile wa dira bošilo gomme wa ikgantšha,Goba o ile wa loga maano a go dira bjalo,Gona bea seatla sa gago molomong.
33 Go swana le ge go fehla maswi go tšweletša potoro,Gomme go pitla nko go ntšha mokola,Go galefiša motho le gona go baka diphapano.
Mengwalo ya tlase
^ Phetolelo ya lentšu ka lentšu e re, “moloko.”
^ Phetolelo ya lentšu ka lentšu e re, “mantle.”
^ Bona Tlhaloso ya Mantšu.
^ Goba, “di sepela di arotšwe ka dihlopha.”
^ Goba “Polomeetse.”
