Psalme 116:1-19
116 Ke rata JehofaKa gobane o kwa lentšu la ka e bile o a nkwa ge ke kgopela gore a nthuše.
2 Ka ge a ntheetša,Ke tla mmitša matšatši ka moka a bophelo bja ka.
3 Go bjalo ka ge eka ke be ke tateditšwe ke dithapo tša lehuKe be ke gateletšegile e bile ke nyamile.
Ke be ke ekwa eka ke kgauswi le go hwa.
4 Eupša ke ile ka bitša leina la Jehofa ka re:
“Mphološe hle Jehofa!”
5 Jehofa o na le kwelobohloko e bile o lokile.Modimo wa rena o na le kgaugelo.
6 Jehofa o šireletša bao ba se nago temogo.
Ke be ke gateletšegile gomme yena a mphološa.
7 Anke moya* wa ka o boele o khutše,Gobane Jehofa o ntshwere gabotse.
8 Wena o mphološitše lehung,O mphumotše megokgo gomme wa nthuša gore ke se ke ka kgopša.
9 Ke tla sepela pele ga Jehofa ge ke sa dutše ke phela.*
10 Ka ge ke be ke na le tumelo, ke ile ka bolela,Le ge ke be ke hlakišwa kudu.
11 Ke ile ka tlalelwa gomme ka re:
“Batho ka moka ba bolela maaka.”
12 Jehofa ke tla mo fa engE le go leboga dilo ka moka tše dibotse tšeo a ntiretšego tšona?
13 Ke tla emišetša komiki godimo e le gore ke mo leboge ka ge a mphološitše.Ke tla tumiša leina la Jehofa.
14 Seo ke se enetšego JehofaKe tla se phetha pele ga batho ba gagwe ka moka.
15 Jehofa o kwa bohlokoGe batho bao ba mmotegelago ba hlokofala.*
16 Ao hle Jehofa, ke a go kgopela.Nna ke mohlanka wa gago.
Ke mohlanka wa gago, yena morwa wa lekgoba la gago la mosadi.
O ntlemolotše diketaneng tšeo ke bego ke tlemilwe ka tšona.
17 Ke tla go direla sehlabelo sa go go leboga,Gomme ka bitša leina la gago, wena Jehofa.
18 Seo ke se enetšego JehofaKe tla se phetha pele ga batho ba gagwe ka moka,
19 Ke le ka malapeng a tempele ya Jehofa,Ke le motseng wa Jerusalema.
Tumišang Jah!*
Mengwalo ya tlase
^ Bona Tlhaloso ya Mantšu.
^ Phetolelo ya lentšu ka lentšu e re, “ke le nageng ya bao ba phelago.”
^ Phetolelo ya lentšu ka lentšu e re, “Lehu la batho ba Jehofa bao ba mmotegelago le bohlokwa mahlong a gagwe.”
^ Goba, “Haleluya.” “Jah” ke tsela e kopana ya go bitša leina Jehofa.
