Psalme 5:1-12
Ditaelo tše di yago go mohlahli wa Nehilothe.* Koša ya Dafida.
5 Wena Jehofa Modimo wa ka, hle theetša thapelo ya ka,Bona kamoo ke kwago bohloko ka gona.
2 Wena kgoši ya ka le Modimo wa ka, ntheetše ge ke llela gore o nthuše,Ka gobane ke wena ke go rapelago.
3 Wena Jehofa, o tla kwa lentšu la ka mesong.Mesong ke tla bolela kamoo ke ikwago ka gona gomme ka letela gore o nkarabe.
4 Gobane ga o Modimo yo a kgahlwago ke dilo tše mpe.Ga go na motho yo mobe yo a ka dulago le wena.
5 Motho yo a ikgantšhago a ka se eme pele ga gago.
O hloile batho ka moka bao ba dirago dilo tše mpe.
6 O tla fediša bao ba bolelago maaka.
Jehofa o hloile batho bao ba ratago bošoro le bao ba forago ba bangwe.
7 Ka baka la lerato la gago le le botegago leo o mpontšhitšego lona, ke tla tsena ka ntlong ya gago.Ke tla khunama ke lebane le tempele ya gago e kgethwa go bontšha gore ke go hlompha kudu.
8 Wena Jehofa o lokile. Hle ntlhahle gomme o ntšhireletše go manaba a ka.Nthuše gore ke sepele tseleng ya gago ke sa kgopše.
9 Nka se tshepe selo le ge e le sefe seo ba se bolelago.Ba dula ba naganne ka dilo tše mpe.Melomo ya bona e swana le lebitla leo le ahlamego.Ba gegea ka melomo ya bona.
10 Wena Modimo o tla ba bona molato.Ba tla wišwa ke maanomabe a bona.
Ba rake pele ga gago ka baka la melato ya bona e mentšhi,Ka gobane ba go hlanogetše.
11 Eupša bohle bao ba tšhabelago go wena ba tla thaba.Ba tla dula ba go opelela ba thabile.
O tla ba šireletša,Le gona bao ba ratago leina la gago ba tlo thaba.
12 Ka gobane wena Jehofa o tlo šegofatša motho yo mongwe le yo mongwe yo a lokilego,O tlo mo amogela bjalo ka ge eka o mo šireleditše ka kotse e kgolo.
Mengwalo ya tlase
^ Bona Tlhaloso ya Mantšu.
