Psalme 77:1-20
Ditaelo tšeo di yago go mohlahli: Koša ya Asafa. Diriša mokgwa wa Jeduthune.*
77 Ke tla goeletša Modimo ka lentšu la ka,Ke tla mo goeletša gomme yena o tla nkwa.
2 Ke ile ka tsoma Jehofa letšatšing la ge ke le tlalelong.
Ke mo rapetše bošego ka moka ke emišitše matsogo e bile ke sa lape,
Eupša ga go na seo se nkhomotšago.
3 Ge ke gopola dilo tšeo Modimo a di dirilego, ke ikwa ke nyamile,Ke tshwenyegile e bile ke felelwa ke matla. (Selah)
4 Ga o dumelele mahlo a ka a tswalelega,Ke ferekane e bile ga ke kgone go bolela.
5 Ke nagana ka tšeo di bego di direga kgale,Mengwageng e mentšhi e fetilego.
6 Bošego ke gopola koša ya ka,Ka naganišiša,Gomme ka nyakišiša ka mo go tseneletšego le go ipotšiša gore:
7 “Na Jehofa o tla re lahlela sa ruri?
Na a ka se sa buša a re amogela?
8 Na a ka se sa buša a re bontšha lerato la gagwe le le botegago?
Na a ka se sa dira dilo tšeo a di tshepišitšego meloko ka moka?
9 Na Modimo o lebetše go re kwela bohloko,Goba na o galefile kudu moo a se sa nago le kgaugelo?” (Selah)
10 Na ke tla dulela gore: “Se ke sona seo se ntshwenyago,
Gore yo Godimodimo o fetošitše tsela yeo a dirišanago le rena ka yona”?
11 Ke tla gopola mediro ya gago wena Jah,Ke tla gopola dilo tše di makatšago tšeo o di dirilego kgale.
12 Ke tla naganišiša ka mediro ya gago ka moka,Gomme ka naganišiša ka dilo tšeo o di dirilego.
13 Wena Modimo, ditsela tša gago ke tše dikgethwa.
Ruri ga go na Modimo yo mogolo go swana le wena!
14 Ke wena Modimo wa nnete, yo a dirago dilo tše di makatšago.
O dirile gore batho ba bone matla a gago.
15 O phološitše batho ba gago ka matla a gago,E lego bana ba Jakobo le ba Josefa. (Selah)
16 Meetse a go bone, wena Modimo,Meetse a go bone gomme a biloga,
Ke moka lewatle la huduega.
17 Maru a ile a tšholla meetse a mantšhi.
Gwa kwagala modumo marung.Gwa bonala magadima kua le kua a le bjalo ka mesebe.
18 Modumo wa legadima la gago o be o swana le wa kariki ya ntwa,Magadima a bonega lefaseng,Lefase le ile la thothomela gomme la šikinyega.
19 Tsela ya gago e be e feta lewatleng,Le gona tsela ya gago e be e feta meetseng a mantšhi,Eupša go be go sa bonagale gore o gatile kae.
20 O hlahlile batho ba gago bjalo ka mohlape,Wa ba hlokomela o diriša Moshe le Arone.
Mengwalo ya tlase
^ Bona Tlhaloso ya Mantšu.
