Psalme 97:1-12
97 Jehofa bjale ke Kgoši!
Anke lefase le thabe.
Anke dihlakahlaka ka moka di thabe.
2 O dikologilwe ke maru le leswiswi le leso,O lokile e bile o buša ka toka.
3 Mollo o tuka pele ga gagwe,Gomme wa tšhuma manaba a gagwe ao a mo dikologilego.
4 Magadima a gagwe a bonegela naga,Gomme lefase le a thothomela ge le a bona.
5 Dithaba di tologa go swana le todi* pele ga Jehofa,Pele ga Morena wa lefase ka moka.
6 Magodimo a bolela ka go loka ga gagwe,Gomme batho ka moka ba bona letago la gagwe.
7 Batho ka moka bao ba hlankelago diswantšho tša go betlwa ba tla lewa ke dihlong,E lego bao ba ikgantšhago ka medimo ya bona ya go hloka mohola.
Lena medimo ka moka, mo khunameleng.
8 Tsione e kwa seo gomme ya thaba.Metse ya Juda e thabileKa gobane wena Jehofa o ahlola ka go loka.
9 Wena Jehofa o yo Godimodimo godimo ga lefase ka moka.O yo godimodimo e bile o phagametše medimo e mengwe ka moka.
10 Lena bao* le ratago Jehofa, hloyang se sebe.
O šireletša bao ba mmotegelago.O ba phološa go ba babe.
11 Seetša se bonegetše baloki,Le gona go thaba ba dipelo tše di lokilego.
12 Thabišwang ke go hlankela Jehofa lena baloki,Gomme le leboge leina la gagwe le lekgethwa.
Mengwalo ya tlase
^ Go bonagala todi ye go bolelwago ka yona mo e le todi ya dinose yeo e tologago gabonolo.
^ Goba, “meoya.”
