Doiteronomio 4:1-49
-
Setšhaba se laelwa gore se latele melao (1-14)
-
Le se ke la lebala dilo tšeo le bonego Modimo a di dira (9)
-
-
Jehofa o nyaka gore go rapelwe yena a nnoši (15-31)
-
Ga go na Modimo yo mongwe ntle le Jehofa (32-40)
-
Metse yeo go tšhabelwago go yona ka bohlabela bja Jorodane (41-43)
-
Setšhaba se newa Molao (44-49)
4 “Bjale lena Baisiraele, theetšang melao le ditaelo tšeo ke le rutago gore le di latele, e le gore le phele le gore le tsene le be le dule nageng yeo Jehofa Modimo wa borakgolokhukhu ba lena a le neago yona.
2 Le se ke la oketša mantšu ao ke le laelago ona goba la a fokotša, e le gore le latele melao ya Jehofa Modimo wa lena yeo ke le neago yona.
3 “Le bone seo Jehofa a se dirilego ka baka la Baali wa Peoro. Jehofa Modimo wa lena o fedišitše motho yo mongwe le yo mongwe yo a bego a rapela Baali wa Peoro.
4 Eupša lena ka moka bao le kgomaretšego Jehofa Modimo wa lena, le a phela lehono.
5 Ke le rutile melao le ditaelo go ya kamoo Jehofa Modimo wa ka a ntaetšego ka gona, e le gore le di latele nageng yeo le tlago go dula go yona.
6 Le di latele ka gobane ditšhaba tšeo di tlago go kwa ka ditaelo tše ka moka di tla bona gore le bohlale e bile le na le kwešišo, gomme di tla re: ‘Ruri setšhaba se se segolo se bohlale e bile se na le kwešišo.’
7 Ka gobane Jehofa Modimo wa rena o a re araba nako e nngwe le e nngwe ge re mo rapela. Ke setšhaba sefe se segolo seo medimo ya sona e lego kgauswi le sona?
8 Le gona ke setšhaba sefe se segolo seo se nago le melao ya go loka le ditaelo tše di swanago le melao ye ka moka yeo ke le neago yona lehono?
9 “Lena itlhokomeleng e le gore le se ke la lebala dilo tšeo le di bonego, le gore di se ke tša tloga dipelong tša lena ge le sa dutše le phela. Le di botše bana ba lena le ditlogolo tša lena.
10 Letšatšing la ge le be le eme pele ga Jehofa Modimo wa lena kua thabeng ya Horebe, Jehofa o ile a re go nna: ‘Kgobokeletša setšhaba se go nna gore se tle se kwe seo ke se bolelago, e le gore se ithute go mpoifa mehleng ka moka ya ge se sa phela le gore se tle se rute bana ba sona.’
11 “Ka gona lena la batamela la ema mo thaba e thomago gona, gomme thabeng yeo go be go tuka mollo. Mollo woo o be o fihla magodimong, le gona go be go na le leswiswi le maru a masomaso.
12 Jehofa o ile a bolela le lena a le mollong woo. Le ile la kwa lentšu la gagwe eupša le sa mmone.
13 O ile a le botša kgwerano ya gagwe e lego Melao e Lesome yeo a le laetšego gore le e latele, gomme ka morago ga moo a e ngwala diphaphathing tše pedi tša maswika.
14 Le gona ka nako yeo Jehofa o ile a ntaela gore ke le rute melao le ditaelo tšeo le tlago go phela ka tšona ge le tsena nageng yeo le tlago go e tšea gore le dule go yona.
15 “Letšatšing la ge Jehofa a be a bolela le lena kua Horebe ga se la ka la bona selo ka gare ga mollo. Ka gona itlhokomeleng,
16 e le gore le se ke la itšhilafatša gomme la itirela seswantšho seo se betlilwego sa sebopego le ge e le sefe, e ka ba sa monna goba sa mosadi,
17 seswantšho sa phoofolo le ge e le efe yeo e lego mo lefaseng, goba seswantšho sa nonyana le ge e le efe yeo e fofago magodimong,
18 seswantšho sa selo le ge e le sefe seo se gagabago goba seswantšho sa hlapi le ge e le efe ya ka meetseng.
19 Ge le lebelela magodimong gomme le bona letšatši, ngwedi le dinaledi, e lego dilo ka moka tšeo di lego magodimong, le se ke la di duma gomme la di khunamela ke moka la di hlankela. Jehofa Modimo wa lena o di neile ditšhaba ka moka tša ka tlase ga magodimo.
20 Eupša Jehofa o le tšere a le ntšha Egepeta moo le bego le tlaišega kudu bjalo ka ge eka le mollong wo o tukago kudu,* gore le be setšhaba sa gagwe bjalo ka ge le le sona lehono.
21 “Jehofa o ile a nkgalefela ka baka la lena, gomme a ena gore nka se tshele Noka ya Jorodane goba ka tsena nageng e botse yeo Jehofa Modimo wa lena a le neago yona gore e be bohwa.
22 Ka gobane ke tla hwela nageng ye. Nka se tshele Noka ya Jorodane, eupša lena le tla e tshela gomme la tšea naga ye e botse gore e be ya lena.
23 Itlhokomeleng gore le se ke la lebala kgwerano yeo Jehofa Modimo wa lena a e dirilego le lena. Le gona le se ke la itirela diswantšho tša go betlwa tša selo le ge e le sefe seo Jehofa Modimo wa lena a rilego le se ke la se dira.
24 Ka gobane Jehofa Modimo wa lena o swana le mollo wo o tšhumago lorelore, ke Modimo yo a nyakago gore batho ba rapele yena a nnoši.
25 “Ge le ka ba le bana le ditlogolo gomme ge le šetše le dutše nako e telele mo nageng ye, la senya ka go dira diswantšho tše di betlilwego tša mohuta le ge e le ofe, ke moka la direla Jehofa Modimo wa lena dilo tše mpe e le gore le mo kgopiše,
26 gona lehono ke tšea magodimo le lefase e le dihlatse tša ka tša gore ruri le tla hwa kapejana nageng yeo le tshelago Noka ya Jorodane gore le e tšee e be ya lena. Le ka se dule go yona nako e telele eupša le tla fedišwa.
27 Jehofa o tla le phatlalatša ditšhabeng gomme la šala le le ba sego kae ditšhabeng tšeo Jehofa a tlago go le rakela go tšona.
28 Ge le le moo le tla hlankela medimo ya dikota le maswika yeo e dirilwego ke batho, yeo e sa kgonego go bona, go kwa, go ja goba go dupa.
29 “Ge le ka re le le moo la nyaka go hlankela Jehofa Modimo wa lena gape gomme la ithekga ka yena ka dipelo tša lena ka moka le ka matla a lena ka moka, ruri yena o tla le amogela.
30 Nakong e tlago ge le le mathateng a magolo gomme dilo tše ka moka di le diragalela, gona le tla boela go Jehofa Modimo wa lena gomme la mo theetša.
31 Ka gobane Jehofa Modimo wa lena ke Modimo yo a nago le kgaugelo. A ka se le lahle goba a le fediša goba a lebala kgwerano yeo a e enetšego borakgolokhukhu ba lena.
32 “Bjale botšišang tša mabapi le mehla ya pele ga lena, ya go tloga letšatšing la ge Modimo a be a bopa motho lefaseng, le nyake go tloga karolong e nngwe ya magodimo go fihla go e nngwe. Le botšiše gore: Na go na le selo se segolo ka tsela ye seo se kilego sa direga goba na go na le motho yo a kilego a kwa selo seo se swanago le se?
33 Na go na le setšhaba se sengwe seo se kilego sa kwa Modimo a bolela gare ga mollo ka tsela yeo lena le mo kwelego ka gona, gomme sa tšwela pele se phela?
34 Goba na go na le setšhaba seo Modimo a kilego a leka go se ntšha setšhabeng se sengwe a diriša dikahlolo,* dipontšho, mehlolo, ntwa, matla a gagwe a magolo le dilo tše di boifišago kudu, go swana le dilo ka moka tšeo Jehofa Modimo wa lena a le diretšego tšona le lebeletše kua Egepeta?
35 Le bontšhitšwe dilo tše, e le gore le tsebe gore Jehofa ke Modimo wa nnete, ga go na yo mongwe ka ntle le yena.
36 O dirile gore le kwe lentšu la gagwe le etšwa magodimong gore a le phošolle, gomme a dira gore le bone mollo wa gagwe o mogolo mo lefaseng e bile la kwa a bolela gare ga mollo.
37 “Ka ge a ratile borakgolokhukhu ba lena gomme a kgetha ditlogolwana tša bona, o ile a diriša matla a gagwe a magolo go le ntšha Egepeta.
38 O ile a raka ditšhaba tšeo di le fetago ka bogolo le ka matla pele ga lena, gore a le fihliše nageng ya ditšhaba tšeo gomme a le nee yona e le bohwa, go etša ge go le bjalo lehono.
39 Ka baka leo, lehono tsebang le be le dule le gopola gore Jehofa ke Modimo wa nnete magodimong le lefaseng. Ga go na Modimo yo mongwe wa nnete.
40 Le kwe melao ya gagwe le ditaelo tša gagwe tšeo a le laelago tšona lehono, e le gore dilo di tle di sepelele lena le bana ba lena gabotse, le gore le tle le dule nako e telele nageng yeo Jehofa Modimo wa lena a le neago yona.”
41 Ka nako yeo Moshe o ile a kgetha metse e meraro ka bohlabela bja Noka ya Jorodane.
42 Ge motho le ge e le ofe a ka bolaya motho a be a se a ikemišetša e bile a be a se a mo hloya, a tšhabele go o mongwe wa metse yeo gomme a phele.
43 Motse wa mathomo e be e le Betsera woo o bego o le lešokeng leo le lego mmotong, motse woo e be e le wa Barubeni. Motse wa bobedi e be e le Ramothe kua Gileada, wona e be e le wa Bagada. Motse wa boraro e be e le wa Golani wo o lego Bashani, wona e be e le wa ba moloko wa Manase.
44 Wo ke Molao woo Moshe a ilego a o nea Baisiraele.
45 Tše ke dikgopotšo, melao le ditaelo tšeo Moshe a di neilego Baisiraele ka morago ga gore ba tšwe Egepeta.
46 Ba be ba le tikologong ya Noka ya Jorodane moeding wo o lego kgauswi le Bethe-peoro, nageng ya Sihoni kgoši ya Baamore, yo a bego a dula Heshibone le yoo Moshe le Baisiraele ba mo fentšego ka morago ga gore ba tšwe Egepeta.
47 Ka gona ba tšea naga ya gagwe le ya Ogo kgoši ya Bashani ya ba tša bona, e lego dikgoši tše pedi tša Baamore tšeo di bego di dula tikologong ya Noka ya Jorodane ka thoko ya bohlabela.
48 Ba tšea go tloga ka Aroere yeo e lego kgauswi le Moedi wa Arinoni go fihla ka Thaba ya Sione, e lego Thaba ya Heremone,
49 le moedi ka moka wa Araba wo o lego tikologong ya ka bohlabela bja Noka ya Jorodane go fihla ka lewatle la Araba mafelong ao a theogelago a Pisiga.
