Ekisodo 17:1-16
17 Baisiraele ka moka ba tloga lešokeng la Sini, ba tšama ba tloga nageng e nngwe go ya go e nngwe go ya le kamoo Jehofa a bego a ba laela ka gona. Ke moka ba yo hloma ditente kua Rafidima. Eupša setšhaba se be se se na meetse a go nwa.
2 Setšhaba sa lwa le Moshe sa re: “Re nee meetse a go nwa.” Eupša Moshe a re go sona: “Le lwela’ng le nna? Le re’ng le leka Jehofa?”
3 Eupša setšhaba se be se nyorilwe kudu gomme sa ngongoregela Moshe sa re: “Ke ka baka la’ng o re ntšhitše Egepeta? Na o re ntšhitše gore o tle o re bolaye ka lenyora, o bolaye le bana ba rena gotee le diruiwa tša rena?”
4 Mafelelong Moshe a llela Jehofa a re: “Ke dire’ng ka setšhaba se? Go se kgale se tlo nkgatla ka maswika!”
5 Ke moka Jehofa a re go Moshe: “Kgetha ba bangwe ba banna ba bagolo ba Isiraele gomme o tšee lepara la gago leo o iteilego Noka ya Nile ka lona, o le sware ka seatla o sepele ke moka o fete pele ga setšhaba le banna bao.
6 Bona! Ke tla be ke eme pele ga gago leswikeng kua Horebe. O itie leswika leo gomme meetse a tla tšwa go lona, ke moka setšhaba se a nwe.” Ka gona Moshe a dira bjalo banna ba bagolo ba Isiraele ba mo lebeletše.
7 Moshe a reela lefelo leo leina a re ke Masa* le Meriba,* ka gobane Baisiraele ba ile ba lwa le yena e bile ba ile ba leka Jehofa ba re: “Na Jehofa o gona gare ga rena goba ga a gona?”
8 Ke moka Baamaleke ba tla ba lwa le Baisiraele moo Rafidima.
9 Moshe a re go Joshua: “Re kgethele banna gore re yo lwa le Baamaleke. Gosasa ke tla ema kua godimo ga mmoto ke swere lepara leo Modimo wa nnete a rilego ke le tšee.”
10 Ke moka Joshua a dira feela kamoo Moshe a mo laetšego ka gona gomme a lwa le Baamaleke. Moshe, Arone le Huru ba rotogela godimo ga mmoto woo.
11 E be e re ge Moshe a emišetša matsogo a gagwe godimo, Baisiraele e eba bona ba fenyago. Eupša gateetee ge a be a theošetša matsogo a gagwe fase, Baamaleke e eba bona ba fenyago.
12 Ge matsogo a Moshe a be a lapile, ba be ba mmeela leswika gomme a dula godimo ga lona. Ke moka Arone a ema ka lehlakoreng le lengwe, le Huru a ema ka lehlakoreng le lengwe gomme ba thekga matsogo a gagwe. Matsogo a Moshe a ile a dula a eme go fihlela letšatši le sobela.
13 Ka gona Joshua a fenya Baamaleke.
14 Bjale Jehofa a re go Moshe: “Ngwala taba ye ka pukung gore batho ba dule ba e gopola gomme o botše Joshua tsebe go kwa o re: ‘Baamaleke ke tla ba fediša ka mo go feletšego gore ba se sa gopolwa lefaseng ka moka.’”*
15 Ke moka Moshe a aga aletare a e reela leina a re ke Jehofa-nisi,*
16 a re: “Ka ge Baamaleke ba elwa le bogoši bja Jah, gona Jehofa o tla lwa le bona le melokong yeo e sa tlago.”
Mengwalo ya tlase
^ Leina le le ra gore, “Go Leka” goba “Teko.”
^ Leina le le ra gore, “Go Lwa.”
^ Phetolelo ya lentšu ka lentšu e re, “tlase ga magodimo.”
^ Leina le le ra gore, “Jehofa ke Kota ya ka ya Seka.”
