Ekisodo 20:1-26
20 Ke moka Modimo a ba nea melao ye ka moka a re:
2 “Ke nna Jehofa Modimo wa gago, yo a go ntšhitšego nageng ya Egepeta moo o bego o le lekgoba.
3 O se ke wa rapela medimo le ge e le efe eupša o rapele nna feela.
4 “O se ke wa itirela seswantšho se se betlilwego goba selo le ge e le sefe sa go swana le dilo tšeo di lego magodimong, tšeo di lego lefaseng goba tšeo di lego ka meetseng.
5 O se ke wa rapela dilo tšeo goba wa di hlankela, ka gobane nna Jehofa ke Modimo wa gago yo a nyakago gore o hlankele yena feela. Le gona ke otla bana ka baka la molato wa botatago bona, ge e le bao ba ntlhoilego ke otla ditlogolo le ditlogolwana tša bona.
6 Eupša bao ba nthatago e bile ba kwago melao ya ka, ke tla bontšha ditlogolwana tša bona botho go iša melokong e dikete.
7 “O se ke wa diriša leina la Jehofa Modimo wa gago ka tsela ya go bontšha lenyatšo, ka gobane Jehofa a ka se lese motho yo a dirišago leina la gagwe ka tsela e bontšhago lenyatšo a sa mo otle.
8 “O se ke wa lebala go keteka letšatši la Sabatha e le gore le dule e le le lekgethwa.
9 O swanetše gore o dire mešomo ya gago ka moka ka matšatši a tshelelago.
10 Eupša letšatši la bošupa ke sabatha ya Jehofa Modimo wa gago. O se ke wa dira mošomo le ge e le ofe, e ka ba wena, bana ba gago, makgoba a gago, diruiwa tša gago, goba motho yo a tšwago nageng e nngwe yo a dulago motseng wa geno.
11 Ka gobane Jehofa o bopile magodimo, lefase, lewatle le dilo ka moka tšeo di lego go tšona ka matšatši a tshelelago, gomme ka letšatši la bošupa a khutša. Ke ka baka leo Jehofa a šegofaditšego letšatši la sabatha gomme a le dira le lekgethwa.
12 “Hlompha tatago le mmago e le gore o tle o phele nako e telele nageng yeo Jehofa Modimo wa gago a tlago go go nea yona.
13 “O se ke wa bolaya.
14 “O se ke wa hlotlola.*
15 “O se ke wa utswa.
16 “O se ke wa nea bohlatse bja maaka ka motho yo mongwe.
17 “O se ke wa duma go tšea ntlo ya motho yo mongwe. O se ke wa duma mosadi wa motho yo mongwe, makgoba a gagwe, poo ya gagwe goba tonki ya gagwe goba selo le ge e le sefe sa motho yoo.”
18 Bjale setšhaba ka moka se be se ekwa medumo ya magadima le modumo wa lenaka, se bona magadima a bekenya le thaba e thunya muši. Ge setšhaba se bona dilo tše sa thothomela gomme sa emela kgole.
19 Sa re go Moshe: “Re tšhaba gore ge Modimo a ka bolela le rena, re tlo hwa. Bjale wena bolela le rena gomme re tla theetša.”
20 Moshe a re go setšhaba: “Le se ke la tšhoga, ka gobane Modimo wa nnete o tlile mo go le leka go bona ge e ba le mo kwa, e le gore le mo hlomphe kudu gomme le se ke la dira sebe.”
21 Setšhaba sa tšwela pele se eme kua kgojana, eupša Moshe yena a batamela leru le leso moo Modimo wa nnete a bego a le gona.
22 Ke moka Jehofa a re go Moshe: “Botša Baisiraele o re: ‘Modimo o re, lena le bone gore ke boletše le lena ke le legodimong.
23 Le se ke la dira medimo ya silifera le ya gauta, gore le rapele yona gotee le nna.
24 Le ntirele aletare ka mobu, godimo ga yona le direng dibego tša go fišwa le dihlabelo tša lena tša go dira khutšo le Modimo* ka dipudi, dinku le dikgomo tša lena. Kae le kae moo ke tlago go kgetha gore ke hlankelwe* gona, ke tla tla go lena gomme ka le šegofatša.
25 Ge e ba le ntirela aletare ka maswika, le se ke la e aga ka maswika ao a betlilwego. Ge le ka diriša selo sa go betla maswika go yona, gona le tlo e šilafatša.
26 Le se ke la direla aletare ya ka ditepisi tša go rotogela go yona, e le gore ditho tša lena tša bong di se be pepeneneng ge le le go yona.’
Mengwalo ya tlase
^ Bona Tlhaloso ya Mantšu.
^ Goba “dihlabelo tša mohlakanelwa.”
^ Phetolelo ya lentšu ka lentšu e re, “mo ke tla dirago gore leina la ka le gopolwe gona.”
