Jesaya 36:1-22
36 Ka ngwaga wa bo-14 wa ge go buša Kgoši Hesekia, Sanheribe kgoši ya Asiria o ile a hlasela metse ka moka e šireleditšwego ya Juda gomme a e thopa.
2 Ke moka kgoši ya Asiria ya roma Rabashake a etšwa Lakishi a na le mašole a mantšhi gore a ye Jerusalema go Kgoši Hesekia. Ba ile ba ema forong ya ka godimo tseleng e kgolo yeo e yago moo go šomelago motho yo a hlatswetšago batho diaparo.
3 Ke moka Eliakima yo a bego a hlokometše ba lapa la kgoši, yena morwa wa Hilikia, le Shebana yo e bego e le mongwaledi gotee le Joa yo a bego a ngwala dilo tšeo di diregago, e lego morwa wa Asafa, ba ile ba tla go Rabashake.
4 Rabashake a re go bona: “Hle botšang Hesekia le re: ‘Kgoši e kgolo, e lego yona kgoši ya Asiria, e re: “O tshepile eng?
5 Wena o re: ‘Ke na le maano le matla a go lwa.’ Eupša o no ba o bolela ka molomo feela. O tshepile eng ge o bile o ntlhanogela?
6 Bona! O tshepile gore o tla ithekga ka lehlaka le leo le robegilego, e lego Egepeta, leo ge e ba motho a itshwarelela ka lona le tlago go mo hlaba ka seatleng gomme la se phula. Farao kgoši ya Egepeta o ka wona mokgwa woo go batho ka moka bao ba mo tshepilego.
7 Ge e ba o be o ka re go nna: ‘Rena re tshepile Jehofa Modimo wa rena,’ na Hesekia ga se yena a tlošitšego mafelo ao le bego le mo rapela go ona* le dialetare tša gagwe, ke moka a botša batho ba Juda le Jerusalema gore ba swanetše go khunama gomme ba rapele ka pele ga aletare yeo e lego Jerusalema?”’
8 Bjale hle anke o dire tumelelano le mong wa ka kgoši ya Asiria. Tumelelano yeo ke ye: Ke tla go nea dipere tše 2 000 (dikete tše pedi) ge e ba o ka kgona go hwetša banamedi ba tšona.
9 Bjale o ka kgona bjang go fenya gaešita le mmuši o tee wa maemo a tlase go bahlanka ba mong wa ka, mola o tshepile Egepeta gore e go nee dikariki tša ntwa le banamedi ba dipere?
10 Na o nagana gore Jehofa ga se a ntumelela gore ke tle ke hlasele naga ye gomme ke e fediše? Jehofa ke yena a itšego go nna: ‘Sepela o yo hlasela naga yeo gomme o e fediše.’”
11 Ka gona Eliakima, Shebana le Joa ba re go Rabashake: “Hle bolela le rena bahlanka ba gago ka leleme la Searama, ka gobane re a le kwešiša. O se ke wa bolela le rena ka leleme la Bajuda batho bao ba lego lebotong ba theeditše.”
12 Eupša Rabashake a re: “Na mong wa ka o nthomile gore ke tle ke botše lena le mong wa lena mantšu a? Na ga se a nthoma le bathong bao ba dutšego lebotong, bao ba tlago go ja mantle a bona le go nwa mohlapologo wa bona gotee le lena?”
13 Ka morago ga moo Rabashake a ema a goeletša ka lentšu la go hlaboša ka leleme la Bajuda, a re: “Ekwang mantšu a kgoši e kgolo, yona kgoši ya Asiria.
14 Kgoši e re: ‘Le se ke la dumelela Hesekia a le fora, ka gobane a ka se kgone go le phološa.
15 Le gona le se ke la dumelela Hesekia a dira gore le tshepe Jehofa ka go le botša gore: “Ruri Jehofa o tlo re phološa. Motse wo o ka se ke wa newa kgoši ya Asiria gore a o fenye.”
16 Le se ke la theetša Hesekia, ka gobane kgoši ya Asiria e re: “Dirang khutšo le nna gomme le ineeleng. Yo mongwe le yo mongwe wa lena o tla ja tšeo di tšwago mohlareng wa gagwe wa moterebe le wa mogo, e bile a nwa meetse a sediba sa gagwe,
17 go fihlela ke etla ke le tšea ke le iša nageng yeo e swanago le ya lena, e lego naga ya mabele le beine e mpsha, naga ya senkgwa le mašemo a diterebe.
18 Le se ke la dumelela Hesekia a le fora ka go le botša gore: ‘Jehofa o tlo le phološa.’ Na go na le yo mongwe wa medimo ya ditšhaba yo a kilego a phološa naga ya wona go kgoši ya Asiria?
19 E kae medimo ya Hamathi le Arapadi? E kae medimo ya Sefarafaima? Na e kgonne go hlakodiša Samaria ge ke be ke e hlasela?
20 Ke medimo efe gare ga medimo ka moka ya dinaga tše yeo e ilego ya phološa dinaga tša yona ge ke be ke e hlasela? Bjale na le nagana gore Jehofa a ka phološa Jerusalema ge ke e hlasela?”’”
21 Eupša ba ile ba homola, ba se ke ba ntšha le lentšu le letee, ka gobane kgoši e be e ba laetše ya re: “Le se ke la mo araba.”
22 Eupša Eliakima yo a bego a hlokometše ba lapa la kgoši, yena morwa wa Hilikia, le Shebana yo e bego e le mongwaledi gotee le Joa yo a bego a ngwala dilo tšeo di diregago, e lego morwa wa Asafa, ba ile ba tla go Hesekia ba gagotše diaparo tša bona gomme ba mmotša dilo tšeo Rabashake a di boletšego.
Mengwalo ya tlase
^ Phetolelo ya lentšu ka lentšu e re, “mafelo a phagamego.”
