Jobo 6:1-30
6 Ke moka Jobo a araba a re:
2 “Okare masetlapelo a ka ka mokaLe mathata a ka ka moka a ka kalwa gomme a bewa sekaleng!
3 Gona bjale mathata a ka a boima go feta santa ya lewatle.
Ke ka baka leo ke bolelago dilo tša go se re selo.
4 Mesebe ya Ramatlaohle e ntlhabile,E bile ke nwele mpholo wa yona,Modimo o a ntlhasela e bile ke tšhogile kudu.
5 Na tonki ya nageng e ka lla e na le bjang bjo e ka bo fulago,Goba na poo e ka lla e na le furu ya yona?
6 Na dijo tšeo di se nago tatso di ka jewa di se na letswai,Goba na o ka thabela go ja selo seo se se nago tatso?
7 Ke ganne go kgwatha dijo tša mohuta woo.
Di bjalo ka dijo tšeo di senyegilego.
8 Eka kgopelo ya ka e ka theetšwa,Gomme Modimo a mpha seo ke se kgopelago!
9 Ke duma eka Modimo a ka no mpšhatlaganya,Gomme a mpolaya ka diatla tša gagwe!
10 Ge e ba seo se be se ka direga ke be ke tlo thaba,Le ge ke ekwa bohloko kudu, ke be ke tlo thabela go hwa,Ka gobane ga se ka ka ka gana dilo tšeo Modimo yo mokgethwa a di boletšego.
11 Ga ke sa na matla a go kgotlelela.
Ke ka baka la’ng ke swanetše go tšwela pele ke phela go se na se sebotse seo ke se letetšego?
12 Na ke no ba leswika?
Goba na mmele wa ka e fo ba tšhipi?*
13 Ke tla thušwa ke mang,Ka ge go se na yo a ka nthušago?
14 Motho le ge e le ofe yo a sa ratego wa gabo,*A ka se sa boifa Modimo Ramatlaohle.
15 Bagwera ba ka* ba ntlhalefeditše go swana le dinoka tša marega,Tšeo mafelelong di pšhago.
16 Di swifaditšwe ke lehlwa,Gomme kapoko e khuta godimo ga tšona.
17 Eupša selemo dinoka tšeo di a pšha,Ge go fiša di a oma.
18 Ditsela tšeo di di tšeago di a aroga,Di ya leganateng gomme tša hwelela.
19 Batho ba go sepela ka dikamela bao ba tšwago Thema ba tsoma meetse ao,Gomme sehlopha sa batho bao ba etago seo se tšwago Sheba le sona se a letile.
20 Batho bao ba hlabišwa dihlong ke gore ba be ba nagana gore ba tla hwetša meetse moo,Ba fihlile lefelong leo gomme ba nyama.
21 Lena banna le no swana le dinoka tše, ga le nthuše ka selo,Le bone kamoo mathata a ka a tšhošago ka gona gomme la boifa.
22 Na ke ile ka le kgopela gore le mphe selo se itšego,
Goba ka le kgopela gore le nntšhetšeng mpho go tšwa mahumong a lena?
23 Na ke ile ka le kgopela gore le mphološe go manaba a ka,Goba le ntlhakodiše go batho bao ba nkgatelelago?
24 Mpotšeng seo ke se dirilego, gomme nna ke tla ikhomolela,Mpontšheng phošo yeo ke e dirilego.
25 Mantšu ao a bolelwago ka go tshepega, ga a bohloko!
Eupša ke tla holega ka eng ge le nkgalemela?
26 Na le nyaka go sola dilo tšeo ke di bolelago,Mola ke šokiša e bile mantšu a ka a no tšewa ke phefo?
27 Le direla tšhiwana matengwa,E bile le rekiša le mokgotse wa lena!
28 Bjale retologang le ntebeleleng,Ka gobane nka se le botše maaka.
29 Hle naganang gabedi, le se ke la nkahlola,Naganišišang gape, ga go na phošo yeo ke e dirilego.
30 Na leleme la ka le bolela dilo tša go se loke,
Goba na ga ke kgone go bona gore go na le bothata?
Mengwalo ya tlase
^ Phetolelo ya lentšu ka lentšu e re, “koporo.”
^ Phetolelo ya lentšu ka lentšu e re, “yo a sa bontšhego wa gabo lerato le le botegago.”
^ Phetolelo ya lentšu ka lentšu e re, “banabešo.”
