Mika 3:1-12
3 Nna ke rile: “Ekwang hle, lena dihlogo tša malapa a Jakobo,Le lena baetapele ba setšhaba sa Isiraele.
Na ga se la swanela go tseba toka?
2 Eupša le hloile dilo tše dibotse gomme le rata dilo tše mpe.Le gagola batho ba ka letlalo gomme la tloša nama marapong a bona.
3 Le gona le ja nama ya batho ba ka,E bile le bua matlalo a bona.Le pšhatlaganya marapo a bona la a rathaganya,Bjalo ka marapo le nama tšeo di apeilwego ka pitšeng.
4 Ka nako yeo ba tla kgopela Jehofa gore a ba thuše,Eupša a ka se ba arabe.
A ka se ba thušeKa ge ba dirile dilo tše mpe.
5 Baporofeta ba dira gore batho ba ka ba aroge, ba loma ka meno a bona gomme ba goeletša ba re: ‘Khutšo!’Ba lwa le motho yo a sa ba tsenyego selo ka ganong.Ke ka baka leo Jehofa a boletšego mabapi le baporofeta bao a re:
6 ‘Le tla ba leswiswing go swana le bošego, gomme la se kgone go bona dipono.Le tla ba leswiswing la se kgone go bolela dilo tša nakong e tlago.
Letšatši le tla sobelela baporofeta,Gomme mosegare wa fetoga bošego go bona.
7 Bao ba bonago dipono ba tlo hlabja ke dihlong,Gomme bao ba bolelago tša nakong e tlago ba tlo nyama.
Ka moka ga bona ba tlo ikhupetša difahlego* ka ge ba lewa ke dihlong,Ka gobane Modimo a sa ba arabe.’”
8 Ge e le nna, moya wa Jehofa o ile wa dira gore ke be le matla,Wa nthuša gore ke dire dilo ka toka e bile ke be le sebete.E le gore ke botše Jakobo gore o hlanogetše Modimo, le go botša Baisiraele sebe sa bona.
9 Ekwang hle lena dihlogo tša malapa a Jakobo,Le lena baetapele ba setšhaba sa Isiraele,Lena bao le šišimišwago ke toka, e bile le fetošago dilo tše dibotse la di dira tše mpe.
10 Lena bao le agago Tsione ka go tšholla madi, gomme Jerusalema la e aga ka go dira dilo tša go se loke.
11 Baetapele ba gagwe ba nyaka pipamolomo gore ba ahlole batho,Baperisita ba gagwe ba nyaka go patelwa gore ba rute batho,Gomme baporofeta ba gagwe bona ba porofeta feela ge batho ba ba fa tšhelete.
Eupša ba ithekga ka Jehofa* ba re:
“Na Jehofa ga a na le rena?
Re ka se welwe ke masetlapelo.”
12 Ka gona, Tsione e tla lengwa bjalo ka tšhemo ka baka la lena.Jerusalema yona e tla fetoga marope,Gomme thaba yeo ntlo ya Modimo e lego go yonaE tla swana le dithaba tšeo di tletšego dithokgwa.
