Mmoledi 11:1-10
11 Lahlela borotho bja gago ka meetseng, ka gobane o tla bo hwetša gape ka morago ga matšatši a mantšhi.
2 Arolela batho ba šupago goba ba seswai dilo tšeo o nago le tšona, ka gobane ga o tsebe gore lefase le tla tlelwa ke masetlapelo a mohuta mang.
3 Ge maru a tletše ka meetse, a tla nešetša lefase pula. Le gona, ge mohlare o wela ka borwa goba ka leboa, o tla no ba gona moo o wetšego gona.
4 Yo a lebeletšego phefo a ka se bjale peu, le gona yo a lebeletšego maru a ka se bune.
5 Go no swana le ge o sa tsebe kamoo moya o šomago ka gona marapong a ngwana yo a lego ka popelong ya moimana, ka mo go swanago, ga o tsebe modiro wa Modimo wa nnete, yo a dirago dilo ka moka.
6 Bjala peu ya gago mesong gomme o se ke wa khutša go fihlela e eba mantšiboa, ka gobane ga o tsebe gore ke efe yeo e tlago go mela, e ka ba ye goba yela, goba di ka mela ka bobedi.
7 Seetša se a kgahliša, gomme mahlo a kgahlišwa ke go bona letšatši.
8 Motho ge a ka phela mengwaga e mentšhi, gona a a e thabele ka moka ga yona. Eupša o swanetše go gopola gore go ka ba le matšatši a mantšhi a go se thabiše. Matšatši ao ka moka ke lefeela.
9 Wena lesogana, thabela boswa bja gago, le gona anke o thabišwe ke go ba lesogana. Dira dilo tšeo o di ratago le go phegelela dilo tšeo di kgahlišago mahlo a gago. Eupša dula o gopola gore Modimo wa nnete o tlo go ahlola ka baka la dilo tše ka moka.
10 Phema dilo ka moka tšeo di bakago mathata, gomme o phemiše mmele wa gago go dilo tšeo di gobatšago, ka gobane boswa le bosogana ke lefeela.
