Ntwa e dirile gore go šomišwe tšhelete e ntšhi kudu.

•   “Ngwageng wa go feta, mebušo ya lefaseng ka moka e dirišitše tšhelete yeo e lekanago ditrilione tše 41.7 dintweng. Ke mathomo go šomišwa tšhelete e ntšhi ka mokgwa wo ntweng ka ngwaga o tee.”—The Washington Post, February 13, 2024.

 Go na le mathata a mangwe a mantšhi ao ntwa e a bakago go feta tšhelete yeo e dirišwago ntweng. Ka mohlala, nagana ka mathata ao a bakilwego ke ntwa ya Ukraine.

•   Mašole. Ba bangwe ba re ga e sa le ntwa e thoma mengwageng e mebedi e fetilego, mašole a e ka bago a 500 000 a bolailwe goba a gobaditšwe ntweng.

•   Badudi. Mokgatlo wa United Nations o re badudi ba fetago 28 000 ba hwile goba ba gobaditšwe. Eupša mohlankedi yo mogolo wa mokgatlo wa UN o itše: “Ga go tsebege gore ke batho ba bakae bao ntwa ye e šoro e amilego maphelo a bona.” a

 Dintwa tše dintšhi kudu tšeo di lego gona lefaseng ka moka di hlafišetša batho ba bantšhi bophelo.

•   Batho ba dimilione tše 114. Ga e sa le go tloga ka September 2023, batho ba dimilione tše 114 lefaseng ka moka ba ile ba gapeletšega go tloga magaeng a bona ka baka la ntwa le bošoro.

•   Batho ba dimilione tše 783. Ye ke palo ya batho bao ba hlokago dijo tše di lekanego. “Go dilo tšeo di dirago gore batho ba hloke dijo, ntwa ke yona e di fetago ka moka. Lefaseng ka moka, bontšhi bja batho bao ba hlokago dijo ke bao ba dulago dinageng tšeo di nago le ntwa le bošoro.”—World Food Programme.

 Na ntwa e tla ka ya fela? Na ka letšatši le lengwe re tla tsoga re bile le khutšo? Na go tla ka gwa ba le nako yeo mo lefaseng go ka se sa bago le badiidi gomme batho ka moka ba thabela dijo tšeo di lego mo lefaseng? Beibele e reng?

 Beibele e boletše e sa le pele ka dintwa tšeo di tlago go ba gona mo lefaseng, e di hlalosa ka tsela ya seswantšhetšo e le motho yo a nametšego pere.

•   “Gwa tšwelela pere e nngwe ya mmala wa bohwibidu bja mollo; yo a e nametšego a dumelelwa go tloša khutšo lefaseng e le gore batho ba bolayane; a newa tšhoša e kgolo.”—Kutollo 6:4.

 Motho yoo a nametšego pere o latelwa ke batho ba babedi bao ba swantšhetšago tlala e kgolo le lehu leo le bakwago ke malwetši le dilo tše dingwe. (Kutollo 6:5-8) E le gore o kwe ka botlalo ka boporofeta bjo bja Beibele le gore re ka kgodišega bjang gore dilo tšeo bo di bolelago di a direga mehleng ye ya rena, bala sehlogo seo se rego “Banamedi ba Bane ba Dipere—Ke Bomang?”

 E se kgale, mahumo a lefase a ka se sa dirišetšwa go thekga dintwa. Eupša seo se ka se dirwe ke batho. Bjale se tlo dirwa ke mang? Beibele e re:

•   Modimo o tla “fediša dintwa lefaseng ka moka.”—Psalme 46:9.

•   Modimo o tlo lokiša dilo tšeo ntwa e di sentšego. “O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:4.

•   Modimo o tla netefatša gore batho ka moka ba phela ka khutšo. “Batho ba ka ba tla dula lefelong la bodulo la khutšo le madulong a bolokegilego gotee le mafelong a boiketlo a khutšo.”—Jesaya 32:18.

 Boporofeta bja Beibele bo re botša gore dintwa le dilo tšeo di diregago gona bjale di bontšha gore re kgauswi le go tlo phela ka khutšo.

 Modimo o tlo tliša khutšo yeo bjang? O tlo e tliša a diriša Mmušo wa gagwe wo o lego legodimong. (Mateo 6:10) Ge o nyaka go kwa gore Mmušo wa Modimo ke eng le gore o ka go direla eng, bogela bidio yeo e rego, Mmušo wa Modimo ke Eng?