Go na le Kholofelo Efe Bakeng Sa Badiidi?

GA GO phošo go šoma ka thata bakeng sa go iphediša, ge feela bao ba šomago ba hwetša moputso wa bona wo o ba swanetšego. Ela hloko tlhaloso ya mongwadi wa Beibele e rego: “Se ke se tsebaxo ké xore xa xo se se botse . . . xe e se xo thaba . . . xe motho a e-ja, a e-nwa, ’me a bôna tše di botse ka ’tapišô tš’axwe tšohle.”—Mmoledi 3:12, 13.

Eupša bjalo ka ge re bone, tshepedišo ya lefase ya tša boiphedišo e nyaka gore batho ba šome ka thata eupša e ba nea mogolo wa fase. Ba bantši ba sa dutše ba diila ba katanela go phela letšatši le letšatši. Ke ka sewelo ba ikwago ba “thaba” le go “bôna tše di botse” ka baka la bophelo bjo ba bo phelago. Lefase le humile le dinala, eupša mohlomongwe seripa-gare sa batho ga se na sebaka sa go holwa ke mahumo ao.

Go Kgahlegela ga Modimo Badiidi

Mmopi wa batho e lego Jehofa Modimo ga a kgahlwe ke boemo bjo. Jehofa o lebelela badiidi ka kgaugelo. Re bala ka Beibeleng gore: “Xobane [Modimo] xa a ka a lebala dikolomêlô tša bahumanexi.” (Psalme 9:12) Jehofa ke Modimo yo a hlokomelago badiidi.

Mabapi le Jehofa Beibele e re: “Gomme mohumanegi o di gafetše go wena, o bile mohlakodiši wa sešuana.” (Psalme 10:14, PK) Ela hloko kamoo temana ye ya Beibele e bolelago ka batho ba ba tlaišwago e le motho ka o tee ka o tee. * Ee, Modimo o bona yo mongwe le yo mongwe gomme a ela hloko dinyakwa tša gagwe. Go yena motho yo mongwe le yo mongwe ke wa bohlokwa le yo a kgethegilego. Jehofa o laletša batho ba maemo ka moka gore ba ithute go yena le go thabela segwera sa gagwe.

Selo se sengwe seo batho ba ithutago sona go Modimo ke go bontšha kwelobohloko go batho ba bangwe. Dihlatse tša Jehofa di itebelela e le lapa le legolo la moya. Di tšeela yo mongwe le yo mongwe wa tšona godimo—gare ga tšona lerato la Bokriste le a gola. Morena Jesu Kriste o ile a botša balatedi ba gagwe ka nako e nngwe gore: “Lena ka moka le . . . barwarre.” (Mateo 23:8) Ka gona, ka moka bao ba bago gotee borapeding bja therešo e ba karolo ya borwarre yeo e sa hlaolego motho go ya ka maemo a gagwe. Ba  a hlokomelana le go kgothatšana dinakong tša mathata.

Beibele e na le melao ya motheo yeo e ka fokotšago mafelelo a bodiidi. Mangwalo a bontšha gore Modimo o nyatša go šilafatša mmele—ka go diriša motšoko—le ka go diriša dino-tagi gampe. (Diema 20:1; 2 Bakorinthe 7:1) Motho yo a phelago ka melao ye ya motheo a ka boloka tšhelete yeo e bego e ka senywa ka mekgwa e kotsi. O efoga bolwetši bjo bo bakwago ke go kgoga le botagwa tše di ka latelwago ke ditshenyagalelo tša tlhokomelo ya tša maphelo. Beibele e ruta batho gape gore ba gane lerato la dilo tše di bonagalago le megabaru. (Mareka 4:19; Baefeso 5:3) Ka go hlompha Lentšu la Modimo ditabeng tše, motho gape o phema go senya tšhelete ya gagwe ka dipapadi tša tšhelete.

Beibele e nea melao ya motheo ya bophelo bja letšatši le letšatši yeo e šomago gaešita le nakong ya bodiidi bjo bogolo. Ela hloko phihlelo ye e latelago.

Nageng yeo go nago le batho ba bantši ba ba sa šomego, mošomi wa feketoring o ile a bea mošomo wa gagwe kotsing ka go kgopela nako ya go se be gona mošomong e le gore a ka ba gona dibokeng tša Bokriste. Molaodi wa gagwe o be a ka mo raka gabonolo. Go e na le moo, molaodi wa gagwe o ile a mo makatša le go makatša bašomi ba bangwe ka go mo nea nako yeo a e kgopelago. Go oketša moo, molaodi o ile a mmotša gore o nyaka gore a tšwele pele a šoma moo feketoring ya gagwe le go mo reta ka go ba “mošomi yo a beago mohlala.” Ka baka la’ng?

Mošomi yoo, yo e lego yo mongwe wa Dihlatse tša Jehofa, o be a phela ka melao ya motheo ya Beibele. Ka ge a rata go “itshwara ka go botega dilong tšohle” o be a sa bolele maaka goba go utswa ka gona a itirela leina le lebotse ka go botega. (Baheberu 13:18) Ka go kwa molao wa motheo wo o hwetšwago go Bakolose 3:22, 23, o be a dira mošomo wa gagwe ka “moya ka moka.” Se se bolela gore o ile a ikokobeletša mothwadi wa gagwe gomme o be a le šedi go dira mošomo wa letšatši ka moka wo a hwetšago moputso wa wona.

 Ke therešo gore re phela tshepedišong ya tša ditšhelete yeo e tletšego boithati le yeo go yona dipoelo e lego tša bohlokwa kudu. Ba bangwe bao ba hlomphago melao ya motheo ya Beibele ba ka swanelwa ke go katanela go hwetša dijo, diaparo le madulo ao ba a nyakago. Eupša batho ba bjalo ba na le matswalo a hlwekilego pele ga Mmopi wa bona gomme ka kgodišego ba lebeletše pele dinakong tše kaone ka baka la Jehofa “Modimo yo a neago kholofelo.”—Baroma 15:13.

Tharollo ya Kgonthe ya Bodiidi

Beibele e utolla kamoo Jehofa a hloilego bao ba kgothaletšago go gatelelwa ga badiidi mo go se nago toka. Lentšu la Modimo le le buduletšwego le re: “Kotsi e tlo wêla balai ba xo laya dibe, le bangwadi ba xo ngwala tša bošula, E le xo senyetša badiitšana taba, è le xo hlokiša babôtlana . . . moahlolêlô wa xo loka, è le xo hlakola ba bahlôlôxadi, è le xo rebola tša dišuana.” (Jesaya 10:1, 2) Go sa šetšwe gore ba hlokomologa badiidi ka boomo goba ka go se tsebe, bao ba laolago mešomo ya boiphedišo ya batho lehono ke karolo ya tshepedišo e gatelelago yeo Modimo yo Matla-ohle a tlago go e fediša.

Moporofeta Jesaya o botšišitše bagateledi ba ba bjalo potšišo ye: “Le tlo dira bya’ng mohla wa thlatlobô, wa ledimo le-tšwa-kxolê? Le tlo thšabêla xo mang la pholoxa? ’Me lehumô la lena Le tlo le tloxêla kae?” (Jesaya 10:3) Jehofa o tla ba fediša ka go fediša tshepedišo ye e sa lokago yeo ba e tlišitšego.

Eupša morero wa Modimo ga o akaretše go tšea kgato kgahlanong le bagateledi feela. O tla nea batho ba dipelo tše di lokilego tsela ya bophelo bjo bo nago le toka. Modimo o tla dumelela batho go phela bophelo bjo bo kgotsofatšago, bjo bo thabilego le bjo bo se nago bodiidi a diriša mmušo wo o phagamego. Gore o atlege nakong yeo, go ka se hlokege gore o be le tšhelete e ntši, o tsebane le batho ba maemo a phagamego goba ba nago le tsebo ya tša kgwebo. Re ka kgonthišega bjang gore diphetogo tše di tla ba gona?

Jesu Kriste yo Jehofa a mo kgethilego go buša batho, o boletše ka nako yeo e tlago e le “nako ya go bopša lefsa ga dilo.” (Mateo 19:28) Mantšu a  a na le kgopolo ya go mpshafatša le bophelo bjo bofsa bja batho. Ka go diriša mantšu “nako ya go bopša lefsa ga dilo,” Jesu o gateletše gore Jehofa o tla nea batho ba lokilego sebaka sa go phela bophelo ka tsela yeo Mmopi wa rena yo lerato a ratago ka yona. Gare ga mehola e mengwe ka nako yeo o tla tloša ka mo go feletšego morwalo wa tša ditšhelete wo o imelago ba bantši.

Ka tsela ya boporofeta Beibele e bolela mabapi le pušo ya Jesu Kriste gore: “Xobane ó tlo hlakodiša modiitšana xe a lla, le mohlaki xe a hlôka monamodi. Ó tlo xauxêla mosenyi le mohloki; meôya ya bahumanexi ó tlo e phološa. Meôya ya bôná ó tlo e lokolla mohlakong, bošorong; ’me madi a bôná ó tlo a sema selô se bohlôkwa.”—Psalme 72:12-14.

Bokamoso bjo bobotse bo go bulegetše. Eupša gore o fihlelele dilo tše Modimo a di nyakago gore o hwetše bophelo lefaseng le lefsa, sa bohlokwa ke gore o ithute thato ya Modimo wa therešo gomme o e dire. Dira diphetho tše bohlale tše di theilwego tsebong ya Lentšu la Modimo. Phela o holofetše bokamoso bjo Modimo a bo holofetšago batho ka moka. O ka se nyamišwe. Lentšu la Modimo le holofetša gore: “Xobane mmôtlana a ka se dule à lebetšwe; kholofêlô ya modiidi xa e dule è le ya lefêla.”—Psalme 9:18.

[Mongwalo wa ka tlase]

[Lepokisi/Seswantšho go letlakala 18]

Na ke Swanetše go Hudugela Moo Maemo a Lego Kaone?

Lentšu la Modimo ga le botše batho gore ba dule kae le go šoma kae. Lega go le bjalo, melao ya motheo ya Beibele e ka thuša motho go bona ge e ba e le mo go kwagalago go hudugela nageng e nngwe ka mabaka a tša boiphedišo. Ela hloko dipotšišo tše di latelago le molao wa motheo wa Mangwalo o šomago.

1. Na ke goketšwa ke mabarebare ao a sego a kgonthišetšwa? Diema 14:15 e re: “Lešilo le dumêla ’taba tšohle; mohlale ó hlatha dikxatô.” Ka morago ga go hudugela nageng yeo e humilego, monna yo a tšwago Bohlabela bja Yuropa o itše: “Ke kwele gore mono tšhelete e mela go etša matlakala dihlareng. Ke sa nyaka dihlare tšeo.”

2. Na ke na le pono e leka-lekanego ya dinyakwa tša lapa la-ka? Na ke gakantšha dinyakwa le dikganyogo tše di ka se fihlelelwego? Dihlogo tša malapa di swanetše go hlokomela basadi le bana ka dilo tše di bonagalago. (1 Timotheo 5:8) Eupša bo-tate ba na le boikarabelo go Modimo bja go ruta bana ba bona ka boitshwaro le ka dilo tša moya. (Doiteronomio 6:6, 7; Baefeso 6:4) Tate a ka kgona feela go thuša ka dilo tše di bonagalago ge a huduga. Eupša a ka se kgone go ruta bana ba gagwe ka boitshwaro le ka dilo tša moya ge e ba a sa ba bone ka dibeke, dikgwedi le ka nywaga e mentši.”

3. Na ke hlokometše gore go se be kgaufsi le mosadi wa-ka ka nako e telele go ka tsenya bobedi bja rena kotsing ya bohlotlolo? Lentšu la Modimo le eletša banyalani go ela hloko dinyakwa tša botona le botshadi tša yo mongwe le yo mongwe.—1 Bakorinthe 7:5.

4. Na ke a kwešiša gore go tsena ka nageng e nngwe ka tsela e sego molaong go ka ntlišetša mafelelo a šoro go tšwa go balaodi? Bakriste ba therešo ba laelwa gore ba kwe melao ya naga.—Baroma 13:1-7.

[Mothopo wa Seswantšho go letlakala 15]

Top: © Trygve Bolstad/Panos Pictures

[Diswantšho go letlakala 16]

Melao ya motheo ya Beibele e a šoma go sa šetšwe gore re humile goba re badiidi

[Diswantšho go letlakala 17]

Bokamoso bjo bobotse bo go bulegetše