Bafsa Ba A Botšiša . . . 

Na Motho yo ke yo a Ntshwanetšego?

GA GO na selo se se fošagetšego ka dika le ge e le dife tše di lego ka mo godimo. Go na le selo se se kgahlišago ka se sengwe le se sengwe sa tšona. Lega go le bjalo, na ga o dumele gore ge o sa le lebakeng la bofsa gomme o rata motho yo mongwe, o sekamela dikeng tše di sa rego selo, tše bjalo ka tše di lego ka letsogong le letshadi?

Lega go le bjalo, ge o dutše o gola ka tsebo o thoma go diriša matla a gago a go nagana go hlahloba dika tša bohlokwa kudu tše bjalo ka tšeo di lego ka letsogong le letona. Ka mohlala, o thoma go lemoga gore ngwanenyana yola yo mobotse motseng wa geno ga a sa botega goba mošemane yo a ratwago yo o bego o tsena le yena ka klaseng ga se a itshwara gabotse. Ge o “fetile lebaka la bofsa”—nako yeo ka yona dikganyogo tša botona le botshadi di thomago go ba matla—o ka lebelela se se fetago dika tše di sa rego selo e le gore o kgone go araba potšišo ye, Na motho yo ke yo a ntshwanetšego?—1 Bakorinthe 7:36.

Na Motho yo Mongwe le yo Mongwe o Lokile?

Ge nako e dutše e e-ya, o ka kgahlwa ke batho ba mmalwa ba bong bjo bo fapanego. Eupša ga se motho yo mongwe le yo mongwe yo a swanelegago. Ge e le gabotse, o nyaka molekane wa bophelo ka moka, motho yo a tlago go go thuša go bonagatša dika tše dibotse le yoo o tlago go mo thuša go dira bjalo. (Mateo 19:4-6) Motho yoo e tla ba mang? Pele o ka araba potšišo yeo, o  swanetše go ‘itebelela ka seiponeng’ gomme o itlhahlobe ka potego.—Jakobo 1:23-25.

E le gore o ithute ka wena ka noši ka mo go oketšegilego, araba dipotšišo tše di latelago:

Dika tša-ka tše dibotse ke dife?

․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․

Ke na le mafokodi afe?

․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․

Ke dinyakwa dife tša maikwelo le tša moya tše ke nago le tšona?

․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․

Ga go bonolo go itseba, eupša dipotšišo tša go swana le tše di ka go thuša gore o itsebe gabotse. * Ge o dutše o ikwešiša gabotse, ke mo o tla kgonago go hwetša motho yo a tlago go tlaleletša dikeng tša gago tše dibotse go e na le go tlaleletša mafokoding a gago. Lega go le bjalo, go thwe’ng ge e ba o nagana gore o hweditše motho yo a go swanetšego?

Na Tswalano ye e tla Tšwela Pele Gabotse?

Gore o arabe potšišo ye, lebelela motho yo o beanago mabaka le yena ka go se bebe sefahlego. Lega go le bjalo, hlokomela! O ka sekamela go bona feela se o nyakago go se bona. Ka gona iketle. Leka go hlahloba dika tša gagwe tša tlhago.

Batho ba bantši bao ba beanago mabaka ga ba lebelele dika tše dingwe. Go e na le moo, ba kitimela go šupa dilo tše ba swanago ka tšona: ‘Re rata mmino wo o swanago.’ ‘Re thabela mediro ye e swanago.’ ‘Re dumelelana ka dilo ka moka!’ Lega go le bjalo, ka ge go bontšhitšwe mathomong, ge o fetile lebaka la bofsa e le ka kgonthe, o tla bona ka kua ga dika tše di sa rego selo. O nyaka go lemoga “motho wa sephiring wa pelo.”—1 Petro 3:4; Baefeso 3:16.

Ka mohlala, go e na le go lebiša tlhokomelo dilong tšeo le dumelelanago ka tšona, e ka ba mo go bulago mahlo go lemoga gore go direga eng ge le sa dumelelane. Ka mantšu a mangwe, motho yo o swaragana bjang le go se dumelelane—ka go phegelela tseleng ya gagwe  mohlomongwe ka go ineela ‘go tlalelaneng ka bogale’ goba ‘polelong e gobošago’? (Bagalatia 5:19, 20; Bakolose 3:8) Goba na motho yo o bontšha go leka-lekana—go ikemišetša go dira khutšo go sa šetšwe gore ke mang yo a fošitšego?—Jakobo 3:17.

Taba e nngwe yeo o swanetšego go nagana ka yona ke ye: Na motho yo ke yo a ratago go laola goba o na le lehufa? Na o nyaka go tseba mosepelo o mongwe le o mongwe wa gago? Mosadi yo mofsa yo a bitšwago Nicole o re, “go rata go laola le lehufa ke maswao a kotsi. Ke kwa ka batho ba ba beanago mabaka ba e-lwa ka gobane yo mongwe ga se a ‘botša yo mongwe gore o kae’—ke nagana gore se se bontšha gore go na le bothata.”

Na batho ba bangwe ba lebelela motho yo o ratanago le yena bjang? O ka rata go bolela le batho ba ba tsebilego motho yoo ka nako e telele, go etša batho ba ba gotšego ka tsebo ba phuthego ya gabo. Ba tla go botša ge e ba motho yoo “a bolelwa gabotse.”—Ditiro 16:1, 2. *

Na le Swanetše go Kgaogana?

Go thwe’ng ge e ba o lemoga gore motho yo o beanago mabaka le yena ga a swanelege go ba molekane wa lenyalo? Lebakeng le le bjalo, e ka ba mo gobotse go fediša tswalano yeo. Beibele e re: “Mohlale ó bôna dikotsi di s’e-tla, a khuta.”—Diema 22:3. *

Ge nako e dutše e e-ya, o ka ba le tswalano e mpsha. Ge e ba go bjalo, ga go pelaelo gore o tla ba le pono e leka-lekanego kudu—pono ye e hweditšwego ka phihlelo. Mohlomongwe ka nako yeo karabo ya gago potšišong ye “Na motho yo ke yo a ntshwanetšego?” e tla ba ee!

Lelokelelo la dihlogo tše oketšegilego tša “Bafsa ba a Botšiša . . . ” le ka hwetšwa go mokero wa Web wa www.watchtower.org/ype

SEO GO KA NAGANWAGO KA SONA

▪ Ke dika dife tše dibotse tše o ka di tlišago lenyalong?

▪ Ke dika dife tše dingwe tše o ka di lebelelago go molekane wa lenyalo?

▪ Ke ka ditsela dife o ka ithutago ka mo go oketšegilego ka dika, boitshwaro le botumo bja motho yo o beanago mabaka le yena?

[Mengwalo ya ka tlase]

[Lepokisi go letlakala 29]

Tšea metsotso e sego kae go nagana ka dipotšišo tše:

Ke dika dife tšeo gabjale o bego o ka di lebelela e le tša bohlokwa go motho yoo o nyakago gore e be molekane wa gago wa lenyalo? Lelokelelong le le lego ka mo tlase, swaya ka ✔ kgaufsi le dika tše nne tšeo o naganago gore ke tša bohlokwa kudu.

yo a bogegago yo a ratago dilo tša moya

yo a nago le bogwera yo a botegago

yo a tsebegago yo a itshwerego gabotse

yo a ratago metlae yo a ratago go ipeela dipakane

Ge o be o sa le yo monyenyane, na o kile wa ba le maikwelo a lerato go motho yo mongwe? Lelokelelong le lego ka mo godimo, swaya ka ✘ kgaufsi le seka seo o hweditšego e le seo se dirago gore motho yoo e be yo a kgahlišago kudu ka nako yeo.

[Lepokisi go letlakala 30]

Na e tla ba monna yo a lokilego?

DILO TŠA MOTHEO

❑ O diriša bjang matla le ge e le afe a taolo ao a ka bago a e-na le ona?—Mateo 20:25, 26.

❑ O na le dipakane dife?—1 Timotheo 4:15.

❑ Na ga bjale o šomela gore a fihlelele dipakane tšeo?—1 Bakorinthe 9:26, 27.

❑ Bagwera ba gagwe ke bomang?—Diema 13:20.

❑ O lebelela tšhelete bjang?—Baheberu 13:5, 6.

❑ O thabela boithabišo bja mohuta mang?—Psalme 97:10.

❑ Moaparo wa gagwe o utolla’ng?—2 Bakorinthe 6:3.

❑ O bontšha bjang gore o rata Jehofa?—1 Johane 5:3.

DIKA TŠA BOHLOKWA

❑ Na o šoma ka thata?—Diema 6:9-11.

❑ Na o kgona go šomiša tšhelete gabotse?—Luka 14:28.

❑ Na o bolelwa gabotse?—Ditiro 16:1, 2.

❑ Na o hlompha batswadi ba gagwe?—Ekisodo 20:12.

❑ Na o naganela ba bangwe?—Bafilipi 2:4.

MASWAO A LAETŠAGO GORE GO NA LE BOTHATA

❑ Na o rata go galefa?—Diema 22:24.

❑ Na o leka go go akaretša boitshwarong bjo bobe bja tša botona le botshadi?—Bagalatia 5:19.

❑ Na o gobatša ba bangwe mmeleng goba ka mantšu?—Baefeso 4:31.

❑ Na o swanetše go nwa dino-tagi e le gore a ithabiše?—Diema 20:1.

❑ Na o na le lehufa goba boithati?—1 Bakorinthe 13:4, 5.

Na e tla ba mosadi yo a lokilego?

DILO TŠA MOTHEO

❑ O bontšha bjang gore o ikokobeletša bohlogo ka lapeng le ka phuthegong?—Baefeso 5:21, 22.

❑ Moaparo wa gagwe o utolla’ng?—1 Petro 3:3, 4.

❑ Bagwera ba gagwe ke bomang?—Diema 13:20.

❑ O lebelela tšhelete bjang?—1 Johane 2:15-17.

❑ O na le dipakane dife?—1 Timotheo 4:15.

❑ Na gabjale o šomela go fihlelela dipakane tšeo?—1 Bakorinthe 9:26, 27.

❑ O thabela boithabišo bja mohuta mang?—Psalme 97:10.

❑ O bontšha bjang gore o rata Jehofa?—1 Johane 5:3.

DIKA TŠA BOHLOKWA

❑ Na o šoma ka thata?—Diema 31:17, 19, 21, 22, 27.

❑ Na o kgona go šomiša tšhelete gabotse?—Diema 31:16, 18.

❑ Na o bolelwa gabotse?—Ruthe 4:11.

❑ Na o hlompha batswadi ba gagwe?—Ekisodo 20:12.

❑ Na o naganela ba bangwe?—Diema 31:20.

MASWAO A LAETŠAGO GORE GO NA LE BOTHATA

❑ Na o rata dintwa?—Diema 21:19.

❑ Na o leka go go akaretša boitshwarong bjo bobe bja tša botona le botshadi?—Bagalatia 5:19.

❑ Na o gobatša ba bangwe mmeleng goba ka mantšu?—Baefeso 4:31.

❑ Na o swanetše a nwe dino-tagi e le gore a ithabiše?—Diema 20:1.

❑ Na o na le lehufa goba boithati?—1 Bakorinthe 13:4, 5.