Pono ya Beibele

Ke Neng Moo go Iphemela go Lokafatšwago?

O TSOŠWA ke lešata go sa letelwa gare ga bošego. O kwa dikgato tša motho. Motho o šwahletše ka ntlong ya gago. Pelo ya gago e betha ka matla gomme o ipotšiša ka letšhogo gore ke eng seo o swanetšego go se dira.

Bjo ke boemo bjoo motho le ge e le ofe a ka lebeletšanago le bjona. Bosenyi—gaešita le bosenyi bjoo bo dirwago ka bošoro—ga e sa le selo seo se diregago dinageng goba metse-megolong e itšego. Ka baka la go dula ba tshwenyegile, batho ba bantši ba tsoma tšhireletšego ka go reka dibetša goba ka go ithuta mekgwa ya go lwa ka ntle le go itlhama (martial arts). Mebušo e mengwe e dirile melao yeo e neago baagi matla a go diriša mekgwa ya go iphemela e bolayago e le gore ba itšhireletše. Eupša Beibele e re’ng? Na go diriša ga motho ntwa e le gore a itšhireletše goba a šireletše lapa la gagwe go ka lokafatšwa?

Modimo o Hloile Bošoro

Beibele e nyatša bošoro le bao ba bo dirago. Mopsalme Dafida o boletše mabapi le Jehofa Modimo gore: “Ó hloile ba ba rataxo bosenyi.” (Psalme 11:5) Modimo o ile a ahlola ditšhaba tše mmalwa tša bogologolo, go akaretša le setšhaba sa gagwe, ka baka la bošoro bja tšona le tšhollo ya madi. (Joele 3:19; Mika 6:12; Nahume 3:1) Le gona, go bolaya motho ka phošo ka baka la go se šetše e be e le molato o mogolo ka tlase ga Molao woo o bego o neilwe Baisiraele.—Doiteronomio 22:8.

Beibele e kgothaletša motho yo mongwe le yo mongwe gore a pheme dintwa ka go phegelela khutšo letšatši le lengwe le le lengwe. Gantši dintwa tše šoro di thoma ka gore batho ba lwe ka mantšu. Beibele e re: “Mollô o tima xe xo se dikxong; le dikxang di fêla xe xo se sehwirihwiri.”  (Diema 26:20) Gantši go theoša maswafo go fediša kgalefo e bile go thibela ntwa e šoro. Moapostola Paulo o ngwadile gore: “Ge e ba go kgonega, go fihla moo go ithekgilego ka lena, e-bang le khutšo le batho bohle.”—Baroma 12:18.

Ge o Hlaselwa

Go phegelela khutšo ga se kgonthišetšo ya gore le ka mohla o ka se ke wa hlaselwa ka tsela e šoro. Go theoša le histori, barapedi ba Modimo ba botegago ba ile ba hlaselwa ka tsela e šoro. (Genesi 4:8; Jobo 1:14, 15, 17) Ge e ba motho a hlaselwa ke motho yo a itlhamilego, o swanetše go dira’ng? Jesu o laetše gore: “O se ke wa ganetša yo kgopo.” (Mateo 5:39) Le gona o itše: “Yo a go tšeelago kobo ya gago ya ka ntle, o se ke wa gana le ka ya ka gare.” (Luka 6:29) Jesu ga se a ka a dumelela go dirišwa ga dibetša e le gore motho a šireletše dilo tša gagwe tše di bonagalago. Ge a hlaselwa ke motho yo a itlhamilego, motho yo bohlale a ka se ke a gana ka dilo tša gagwe tše bohlokwa. Ruri bophelo ke bja bohlokwa kudu go feta dilo tšeo a nago le tšona!

Ka lehlakoreng le lengwe, go thwe’ng ge e ba bophelo bja motho bo le kotsing ka baka la motho yo a mo hlaselago? Molao woo Modimo a o neilego Baisiraele ba bogologolo o re thuša go kwešiša taba ye. Ge e ba lehodu le be le ka swarwa mosegare gomme la bolawa, motho yo a le bolailego o be a tla pharwa ka molato wa polao. Lebaka la se e be e le gore bohodu bo be bo se na kotlo ya lehu le gona lehodu le ka ba le ile la swarwa gomme la išwa go baahlodi. Lega go le bjalo, ge e ba motho yo a šwahletšego ka ntlong a ile a bolawa bošego, mong wa ntlo o be a ka lebalelwa ka gobane go be go tla ba thata gore a bone seo motho yoo a se dirago le go kgonthišega ka maikemišetšo a gagwe. Mong wa ntlo o be a ka phetha ka mo go swanetšego gore lapa la gagwe le kotsing gomme a gata mogato wa go le šireletša.—Ekisodo 22:2, 3.

Ka gona, Beibele e bontšha gore motho a ka iphemela goba go phemela lapa la gagwe ge e ba le hlaselwa. A ka efoga ge e ba a bethwa, a swara motho yo a mo hlaselago goba a ba a mmetha e le gore a mo fetše matla goba go dira gore a se sa hlwa a tšwela pele go mo hlasela. Maikemišetšo e tla ba go dira gore motho yoo a se ke a tšwela pele ka bošoro goba a kgaotše go go hlasela. Ge e ba go diregile sona se gomme mohlasedi a gobaditšwe o šoro goba a bolailwe, lehu la gagwe le tla tšewa e le leo le diragetšego ka kotsi e sego leo le rerilwego.

Tšhireletšo e Kaone-kaone

Go molaleng gore go na le maemo ao go ona go iphemela mo go leka-lekanego go ka lokafatšwago. Batho ba na le tshwanelo ya go itšhireletša le go šireletša baratiwa ba bona bošorong le kotsing yeo e ka ba bolayago. Ga go na taelo ya Beibele yeo e re thibelago go iphemela ka mo go leka-lekanego ge e ba go sa kgonagale gore re tšhabe ge motho a re hlasela. Lega go le bjalo, tsela e bohlale ke go dira seo re ka se kgonago go phema maemo ao a ka feleletšago ka ntwa e šoro.—Diema 16:32.

Beibele e re kgothaletša gore re “tsome khutšo le go e phegelela” dikarolong ka moka tša maphelo a rena. (1 Petro 3:11) Ye ke tsela e šomago yeo e tlišago bophelo bjo bo nago le khutšo e le ka kgonthe.

NA O ILE WA IPOTŠIŠA?

▪ Ke ka baka la’ng re swanetše go phema bošoro?—Psalme 11:5.

▪ Ke selo sefe se bohlale seo o ka se dirago go šireletša dilo tše di bonagalago?—Diema 16:32; Luka 12:15.

▪ Ke go ba le pono efe ka ntwa mo go ka thibelago kotsi?—Baroma 12:18.

[Ntlhakgolo go letlakala 11]

Beibele e bontšha gore motho a ka iphemela goba go phemela lapa la gagwe ge e ba le hlaselwa