Thušo e sa Letelwago e Tšwago go Phafoga!

KA MONGWADI WA PHAFOGA! KUA BENIN

▪ Ge Noël yo a nago le nywaga e 23 a be a dira phetho ya go tlogela sekolo e le gore a be modiredi wa nako e tletšego wa Dihlatse tša Jehofa, batswadi ba gagwe ba ile ba ipotšiša ge e ba a tla ba le tšhelete e lekanego gore a kgone go iphediša. Ka kgonthe, o ile a hwetša go le thata go hwetša mošomo o swanetšego wa nakwana. Ka gona ge makasine wa Phafoga! o gatiša sehlogo seo se lego nakong seo se rego “Ditsela tše Hlano tša go Hwetša Mošomo,” Noël o ile a se bala ka kelohloko ka makga a mmalwa. * Na se ile sa mo thuša? Ee, eupša e sego kamoo a bego a letetše ka gona.

Molaodi wa sekolo seo e sego sa mmušo o ile a bona Noël a dira boboledi ka ntlo le ntlo gomme a mmotšiša ge e ba e le yo mongwe wa Dihlatse tša Jehofa. Molaodi yoo o be a nyaka morutiši yo mongwe gomme ka ge a be a lemogile gore Dihlatse tša Jehofa di ruta ka tsela e atlegago o ile a botšiša Noël ge e ba a be a tseba motho yo a bego a ka rata go ba morutiši. Ge Noël a be a re aowa, molaodi o ile a mmotšiša gore, “Go thwe’ng ka wena?”

Noël o be a se a ka a ruta sekolong gomme ka dinako tše dingwe o be a kunkuretša. Bjo e be e le bothata kua Benin ka gobane ba kgoro ya thuto ba be ba nyaka gore barutiši ba dire tlhahlobo yeo e kgonthišetšago gore ga ba kunkuretše. Molaodi o ile a mo holofetša gore: “Ge o ka hwetša lengwalo la borutiši, o tla hwetša mošomo.”

Noël o be a tšwetše pele gabotse Sekolong sa Bodiredi sa Pušo ya Modimo seo se hlametšwego go thuša batho go kaonafatša bokgoni bja go bolela phatlalatša seo se swarwago beke le beke diphuthegong tša Dihlatse tša Jehofa. O be a bile a nea dipolelo tša phatlalatša phuthegong ya gabo. Lega go le bjalo, o be a tšhogile ge a be a e-ya tlhahlobong.

Mohlahlobi wa gagwe o ile a mo nea makasine gomme a kgopela gore a balele godimo serapa seo se swailwego ka bokhwibidu. Noël o ile a makala ge a be a bona sehlogo seo se rego “Ditsela tše Hlano tša go Hwetša Mošomo.” O ile a bala serapa seo ka thelelo gomme a newa lengwalo la borutiši.

Ka morago mohlahlobi o ile a bolela gore o bala dimakasine tša Dihlatse tša Jehofa ka mehla. O hlalositše gore: “Dimakasine tše di na le tsebišo e ntši e bile di ngwadilwe ka bothakga moo e lego gore ke di diriša gantši bakeng sa ditlhahlobo.”

Noël o ile a thoma go ruta gomme molaodi wa sekolo o be a nyaka go mo hira le ngwageng o latelago, eupša Noël o be a e-na le mošomo o mongwe woo a bego a nyaka go o dira. O be a laleditšwe gore a tlo šoma ofising ya lekala ya Dihlatse tša Jehofa ya moo a hlankelago gona ga bjale.

[Mongwalo wa tlase]