‘Laiki Yeo e ka Bulwago ke Jehofa Feela’

▪ Ka 2007, Erika wa nywaga e tshela le Mattia wa nywaga e mene ba ile ba hwelwa ke tatago bona. Lega go le bjalo, bohloko bjo bo kwago ke bana bao bo fokoditšwe ke kholofelo ya tsogo.—Ditiro 24:15.

Erika o rata go boledišana le ba bangwe ka kholofelo ya gagwe e theilwego Beibeleng, kudu-kudu ge a le sekolong seo a tsenago go sona kua Sicily. Ka mohlala, ge mogwera wa gagwe Beatrice a be a bolela gore tatago Erika o be a le legodimong gona bjale, ka botho Erika o ile a araba ka gore Beibele e bolela se se fapanego. Beatrice o ile a botšiša gore, “Bjale o gokae?”

Erika o ile a araba ka gore, “O ka lebitleng.” Ka nako yeo, Beatrice o be a nyaka go tseba gore lebitla ke eng.

Erika o hlalositše ka gore, “Le bjalo ka laiki yeo e bulegago le go tswalela. Eupša ge laiki ye e šetše e tswaletše, o ka se kgone go e bula. Ke Jehofa feela yo a ka kgonago go e bula ge lefase le lefsa le e-tla.”

Ke moka Erika o ile a hlalosetša mogwera wa gagwe gore Jehofa ke leina la Modimo, gore o tla tliša lefase la paradeise, gore go ka se sa ba le malwetši le gore bahu ba tla buša ba phela. Ke moka Erika o ile a kgopela Beatrice gore a kgopele tumelelo ya mmagwe ya go amogela puku ya go bolela ka dilo tše e le mpho.

Ge a be a boditšwe gore mmago Beatrice o be a mo file tumelelo, Erika o ile a fa mogwera wa gagwe kopi ya puku ya Ithute go Morutiši yo Mogolo. Erika o tšwela pele a botša ba bangwe ka dilo tšeo a ithutilego tšona go tšwa Beibeleng e bile o ile a fa morutiši wa gagwe kopi ya puku yeo go boletšwego ka yona ka mo godimo.

Ke therešo gore Erika le kgaetšedi’agwe yo monyenyane ba sa nyamišitšwe ke lehu la tatago bona. Eupša kholofelo ya tsogo e dira gore ba ikwe ba le kaone. Bana ba, go swana le ba bangwe ba bantši lefaseng ka bophara, ba leboga Jehofa, Modimo wa khomotšo ya kgonthe.—Mateo 21:16; 2 Bakorinthe 1:3, 4.

O ka ikgopelela kopi ya puku ye e nago le diswantšho tše dibotse ya matlakala a 256, yeo e nago le matlakala a lekanago le a makasine wo ka bogolo. Tlatša setlankana seo se sepedišanago le sehlogo se gomme o se romele atereseng yeo e bontšhitšwego goba atereseng e swanetšego yeo e lokeleditšwego go letlakala 5 la makasine wo.

□ Ka ntle le go itlama, hle ntlišetšeng kopi ya puku e bontšhitšwego mo.

□ Hle ikopanyeng le nna mabapi le thuto e sa lefelelwego ya legae ya Beibele.