Sephiri 6: Tebalelo

“Tšwelang pele le kgotlelelana gomme le lebalelana ka bolokologi.”—Bakolose 3:13.

Se se ra gore’ng? Banyalani bao ba atlegago ba ithuta go seo se ilego sa direga nakong e fetilego; eupša ga ba boloke dikgopi ke moka ba di diriša bakeng sa go feteletša ditaba ka go dira dipolelo tše bjalo ka gore “O dula o šaletše” goba “Ga o ke o theetša.” Bobedi monna le mosadi ba dumela gore “bokwala . . . ké xe [ba] sa latiše phošô.”—Diema 19:11.

Bohlokwa bja sona. Modimo ke “molebaledi,” eupša ga se ka mehla batho ba dirago bjalo. (Psalme 86:5) Diphošo tša kgale ge di sa rarollwe di ka tšweletša sekgopi go fihla bokgoleng bjoo go lebalela go bonagalago go ka se kgonege. Molekane yo mongwe a ka gana go boledišana le yo mongwe mabapi le maikwelo a bona—yo mongwe a sa kgomege ka maikwelo a yo mongwe. Bobedi ba ka ikwa ba kgakgetšwe lenyalong leo le se nago lerato.

Leka boitlwaetšo bjo. Lebelela diswantšho tšeo wena le molekane wa gago le di tšerego pejana lenyalong la lena goba nakong ya lefereyo. Leka go tsošološa lerato leo le bego le e-na le lona pele ga ge mathata a fetoša tsela yeo le lebelelanago ka yona. Ke moka o naganišiše ka dika tšeo mathomong di ilego tša go gogela go molekane wa gago.

▪ Ke dika dife tšeo o di ratago kudu ka molekane wa gago gona bjale?

▪ Akanya ka mafelelo a mabotse ao a ka bago gona baneng ba gago ka baka la go ba motho yo a lebalelago kudu.

Dira phetho. Akanya ka tsela e tee goba tše pedi tšeo ka tšona o ka phemago go tšweletša diphošo tša nakong e fetilego dingangišanong le ge e le dife tšeo o ka bago le tšona le molekane wa gago gona bjale.

O re’ng o sa rete molekane wa gago ka dika tšeo o di ratago ka yena?—Diema 31:28, 29.

Ela hloko ditsela tše dingwe tšeo ka tšona o ka bontšhago tebalelo baneng ba gago.

O re’ng o sa boledišane le bana ba gago mabapi le tebalelo le kamoo bokgoni bja go lebalela bo holago setho se sengwe le se sengwe sa lapa?

[Seswantšho go letlakala 8]

Ge o lebalela, o phumola molato. Ga o leke go o tsoša gape