Modimo o Nkhomoditše Ditekong tša ka ka Moka

Ka ge go anega Victoria Colloy

Ngaka e ile ya botša mma gore: “Ga go selo seo re ka se direlago morwedi wa gago. O tla swanelwa ke go sepela ka diphata le go rwala dieta tše di nago le ditšhipi tša go thekga maoto bophelo bja gagwe ka moka.” Ke be ke nyamile kudu! Ke’ng seo nka se dirago ge ke sa kgone go sepela?

KE BELEGWE ka November 17, 1949, kua Tapachula, Chiapas, Mexico. Ke be ke le ngwana yo a thabilego le yo a phetšego gabotse, leitšibulo la bana ba bane. Eupša ge ke be e ena le dikgwedi tše tshelelago, gateetee ke ile ka kgaotša go abula gomme ke be ke kgona go šutha ganyenyane. Dikgwedi tše pedi ka morago ke ile ka se sa kgona go šutha ka mo go feletšego. Dingaka tša moo di ile tša makala, ka ge bana ba bangwe ba Tapachula ba be ba ena le dika tše swanago tša bolwetši. Ka gona, ngaka ya marapo e tšwago Mexico City e ile ya tla gomme ya re hlahloba. Go ile gwa hwetšwa gore re swerwe ke bolwetši bja polio.

Ge ke be ke ena le nywaga e meraro, ke ile ka buiwa letheka, matolo le dikokoilane. Ka morago, bolwetši bjoo bo ile bja fetela legetleng la ka la le letona. Ge ke be ke ena le nywaga e tshelelago, ke ile ka išwa Mexico City go tšwetša pele kalafo sepetleleng sa bana. Mma o be a šoma polaseng kua Chiapas, ka baka leo ke ile ka dula le makgolo’aka kua Mexico City. Lega go le bjalo, ke be ke fetša nako e ntši ke le sepetlele.

Ge ke ena le nywaga e ka bago e seswai, ke ile ka kaonefala. Eupša ka morago ke ile ka mpefala, ka se sa kgona go šutha ganyenyane-ganyenyane. Ke moka dingaka di ile tša re ke swanetše go sepela ka diphata le go rwala dieta tše di nago le ditšhipi tša go thekga maoto bophelo bja ka ka moka.

Ge ke be ke ena le nywaga e 15, ke be ke šetše ke ile ka buiwa ga 25. Go be go akaretša go buiwa mokokotlong, maotong, matolong, dikokoilaneng le menwaneng ya maoto. Ka morago ga go buiwa mo gongwe le mo gongwe, ke be ke swanelwa ke go fetša nako e itšego ke tlwaetšwa go itirela dilo. Ka morago ga go buiwa mo gongwe, ke ile ka tsenywa samente maotong. Ge samente seo se ntšhwa, ke ile ka swanelwa ke go itšhidulla ka tsela e kwešago bohloko.

Go Hwetša Khomotšo ya Kgonthe

Ge ke be ke ena le nywaga e 11, mma o ile a nketela ka morago ga gore ke buiwe. O be a ithutile gore Jesu o ile a fodiša balwetši gotee le go dira gore bao ba rephilego ditho ba sepele. O ile a mpha kopi ya Morokami, makasine woo o gatišwago ke Dihlatse tša Jehofa, yeo a ithutilego se go yona. Ke ile ka e uta ka fase ga mosamelo wa ka, eupša ka letšatši le lengwe e ile ya timela. Baoki ba be ba hweditše makasine  woo gomme ba o tšea. Ba ile ba nkomanyetša gore ke o badile.

Mo e ka bago ka morago ga ngwaga, mma o ile a tla gape go tšwa Chiapas a tlo mpona. Ka nako yeo o be a ithuta Beibele le Dihlatse. O ile a ntlišetša puku ya From Paradise Lost to Paradise Regained. * Mma o ile a re, “Ge e ba o nyaka go phela lefaseng le lefsa le le holofeditšwego moo Jesu a tlago go go fodiša, o swanetše go ithuta Beibele.” Ka baka leo, go sa šetšwe kganetšo ya makgolo, ke ile ka thoma go ithuta le Dihlatse ge ke ena le nywaga e ka bago e 14. Ngwageng o latetšego ke ile ka kgopelwa go tloga sepetlele ka gobane e be e le sa bana ba banyenyane feela.

Go Lebeletšana le Ditlhohlo

Ke ile ka gateletšega kudu. Ka baka la kganetšo ya makgolo, ke ile ka swanelwa ke go boela Chiapas go yo dula le batswadi ba ka. Lega go le bjalo, go be go ena le mathata gagešo ka ge tate a be a lemaletše bjala. Ke ile ka fetša nako ke sa bone lebaka la go phela. Ke ile ka nagana go ja mpholo. Eupša ge ke tšwela pele ke ithuta Beibele, pono ya ka e ile ya fetoga. Kholofetšo ya Beibele ya lefase la paradeise e ile ya nthabiša.

Ke ile ka thoma go bolela le ba bangwe ka kholofelo e kgahlišago yeo Beibele e e neago. (Jesaya 2:4; 9:6, 7; 11:6-9; Kutollo 21:3, 4) Mafelelong, ka May 8, 1968, ge ke be ke ena le nywaga e 18, ke ile ka kolobetšwa ka ba yo mongwe wa Dihlatse tša Jehofa. Ga e sa le go tloga ka 1974, ke be ke dutše ke neela diiri tša ka godimo ga tše 70 ka kgwedi ke bolela le ba bangwe ka kholofelo yeo e ntšhušumeleditšego go tšwela pele ke phela.

Bophelo bjo bo Atlegilego le bjo bo Kgotsofatšago

Ge nako e dutše e eya, nna le mma re ile ra hudugela motseng wa Tijuana, kgaufsi le mollwane wa Mexico le United States. Nna le mma re dula gotee lefelong leo le swanelago dinyakwa tša rena. Ke sa kgona go sepelasepela ka ngwakong ka dieta tše di nago le ditšhipi tša go thekga maoto le ka diphata, e bile ke diriša setulo sa digole seo ke kgonago go apea ke se duletše gotee le go hlatswa le go šidulla diaparo. Go phetha bodiredi bja ka, ke otlela koloyana ya mohlagase yeo e rulagantšwego gore ke kgone go e diriša.

Ntle le go bolela ka dithuto tša Beibele le batho diterateng le ka magaeng, ke dula ke etela sepetlele sa kgauswi le go ba le dipoledišano tša Beibele le bao ba lego ka ntle ba letetšego go hlahlobja. Ge ke fetša go bolela le bona, ke otlela koloyana ya ka gomme ke leba mmarakeng go yo reka selo le ge e le sefe seo se nyakegago ke moka ka boela gae go yo thuša mma go apea le go dira mešomo ya ka ntlong.

Go hlokomela dinyakwa tša rena tša ditšhelete, ke rekiša diaparo tšeo di dirišitšwego. Mma ga bjale o na le nywaga e 78 gomme o a fokola ka gobane o ile a hlaselwa ke bolwetši bja pelo gararo. Ka baka leo, ke kgonthišetša gore o nwa dihlare tša gagwe ka nako le go ja dijo tše di swanetšego. Go sa šetšwe go fokola ga rena mmeleng, re katanela go ya dibokeng tša phuthego. Batho ba fetago ba 30 bao ke ithutilego Beibele le bona go theoša le nywaga, le bona ba tšea karolo bodireding bja Bokriste ga bjale.

Ke kgodišegile gore mafelelong go tla phethagala kholofetšo ya Beibele e rego: “Mohlang woo [lefaseng le lefsa la Modimo] sehlotša se tlo taboga bjalo ka kgama.” Ge re sa dutše re letetše seo, ke homotšwa ke mantšu a Modimo a rego: “O se ke wa boifa gobane ke na le wena. O se ke wa lealea gobane ke Modimo wa gago. Ke tla go matlafatša. Ruri ke tla go thuša. Ruri ke tla go swara ka go tia ka seatla sa ka sa le letona sa toko.”—Jesaya 35:6; 41:10. *

[Mengwalo ya tlase]

[Seswantšho go letlakala 31]

Ke rwele dieta tše di nago le ditšhipi tša go thekga maoto ke ena le nywaga e šupago

[Seswantšho go letlakala 32]

Bodireding ke otlela koloyana ya ka ya mohlagase yeo e rulagantšwego gore ke kgone go e diriša