Ke ka Baka la Eng Tlaišego e Atile Gakaakaa?

BARUTI bao ba ipolelago gore ba tseba karabo ya potšišo yeo e lego ka go le letshadi gantši ba ruta gore tlaišego ke kotlo e tšwago go Modimo. Ka mohlala, matšatšing a mmalwa ka morago ga tšhišinyego ya lefase ya kua Haiti, moruti wa motsemošate woo o ile a botša phuthego ya gagwe gore kotsi ye e be e le molaetša o tšwago go Modimo. Ba bangwe ga ba nyake go tsoma dikarabo tše dingwe. Moprofesara wa kua Amerika wa mokgatlo wa bodumedi o re go bonagala batho ba bantši ba lebelela ditaba ka tsela ye: “Ga re tsebe gore ke ka baka la eng Modimo a baka dikotsi tše bjalo e bile ga se ra swanela go botšiša. Sa rena ke go fo ba le tumelo.”

Na ruri Modimo o “baka” tlaišego ya batho? Beibele e araba phaa ka gore aowa! Morero wa Jehofa Modimo e be e se gore batho ba tlaišege. Lega go le bjalo, banyalani ba pele ba ile ba rabela kgahlanong le pušo ya Modimo, ba kgetha go ipeela ditekanyetšo tša bona tša se se nepagetšego le se se fošagetšego. Ba ile ba hlanogela Modimo gomme ba buna seo ba se bjetšego. Lehono re kgongwa ke ditlamorago tša kgetho ya bona e mpe. Eupša Modimo ga se yena a bakilego gore batho ba tlaišege. Beibele e re: “A go se be le yo a rego ge a le molekong a re: ‘Ke lekwa ke Modimo.’ Gobane Modimo a ka se ke a lekwa ka dilo tše mpe le gona yena ga a leke motho le ge e le ofe.” (Jakobo 1:13) Tlaišo e ka wela motho le ge e le ofe—gaešita le bao Modimo a ba ratago. Ela hloko mehlala e latelago:

● Moporofeta Elisha o ile a swarwa ke bolwetši bja go šiiša.—2 Dikgoši 13:14.

● Moapostola Paulo o ngwadile gore o ile a tšwela pele a “swerwe ke tlala le go nyorwa le go apara ka go hlaetša le go setlwa le go hloka legae.”—1 Bakorinthe 4:11.

● Mokriste yo a bitšwago Epaforodito o be a babja e bile “a nyemile moko.”—Bafilipi 2:25, 26.

Ga go na moo re balago gore Modimo o be a otla banna ba ba bararo ka baka la dibe tša bona. Lega go le bjalo, Beibele ga e fo re botša gore ke mang yo a bakago tlaišego. E re botša le dilo tše tharo tša motheo tšeo gantši di bakago tlaišego.

 Kgetho ya Motho ka Noši

“Se sengwe le se sengwe seo motho a se bjalago, ke sona seo a tlago go se buna.” (Bagalatia 6:7) Ruri motho yo a kgethago go kgoga, go otlela bošaedi goba go šwalalanya tšhelete ya gagwe ya mogolo ke yena a swanetšego go bonwa molato ge phetho yeo a e tšerego e feleletša ka gore a tlaišege.

Le gona re ka tlaišega ka baka la dikgetho tša boithati tšeo di dirilwego ke motho yo mongwe. Ruri batho ba dirile dilo tše mpe kudu, go tloga go bošoro bja Nazi go ya go kgobošo ya bana. Ka go diriša gampe tokologo ya boikgethelo, ba bangwe ba dira diphetho tšeo di dirago gore ba bangwe ba tlaišege.

Ditiragalo tše di sa Letelwago

Lekgolong la pele la nywaga C.E., tora e kgolo ya kua Jerusalema e ile ya wa, ya bolaya batho ba 18. Ge Jesu a be a bolela ka bao ba ilego ba kgongwa ke tiragalo ye, o itše: “Na le nagana gore e be e le ba nago le molato o mogolo go feta batho ka moka ba bangwe ba ba dulago Jerusalema? Ga go bjalo.” (Luka 13:4, 5) Jesu o be a tseba gore bao ba ilego ba hwa moo ba be ba sa otlwe ke Modimo. O be a tseba gore Lentšu la Modimo le kile la re: “Nako le ditiragalo tšeo di sa letelwago di ba wela ka moka.” (Mmoledi 9:11) Dikotsi tše dintši di direga ka gobane batho ba ikhwetša ba le lefelong le le fošagetšego ka nako e fošagetšego goba ka baka la phošo ya motho. Ka mohlala, dipego di bontšha gore batho ba tlaišega kudu ge ba hlokomologa ditemošo le moo meago e sa agwago ka tsela ya gore e kgone go tsepama ge maemo a leratadima a befile goba ge go na le tšhišinyego ya lefase. Maemong a bjalo, ditiragalo tše di sa letelwago di kgoma batho ba bantši gomme di dira gore tlaišego e ate.

“Mmuši wa Lefase le”

Beibele e re: “Lefase ka moka le rapaletše matleng a yo kgopo.” (Johane 12:31; 1 Johane 5:19) “Yo kgopo” yoo ke Sathane Diabolo, e lego sebopiwa se matla sa moya seo se hlaloswago e le “mmuši wa moya wo o laolago batho.” Sathane o kgothaletša “moya woo bjale o šomago go bana ba go se kwe.” (Baefeso 2:2) Bosenyi bjo bongwe, bja go swana le polao ya molokwanarite le go tlaišwa ga bana, bo šiiša kudu moo ba bantši ba bonago go sa kgonege gore motho a ka fo dira dilo tša mohuta woo a sa tutuetšwe ke selo.

Lega go le bjalo, na se se ra gore Modimo ga a na taba ge a bona re tlaišega? Na go na le seo a ka—a tla—se dirago go e fediša?