Bafsa ba a Botšiša

Nka Letela Eng Lenyalong?—Karolo 2

SEHLOGONG SE SE FETILEGO, re hlahlobile e mengwe ya mehola le ditlhohlo tšeo o ka di letelago lenyalong.

SEHLOGONG SE, re tla hlahloba lebaka leo o swanetšego go letela dimakatšo

Bea leswao le ✔ lepokising le ge e le lefe leo o le kgethago gomme o ngwale dinomoro go ona go ya ka tatelano ya bohlokwa bja ona go wena.

Ke letetše gore molekane wa ka wa ka moso . . .

✔

□ □ e be yo mobotse

□ □ a dire gore ke thabe

□ □ a be le dipakane tša go swana le tša ka

□ □ a rate boithabišo bjo ke bo ratago

Ge e ba o nyakana le molekane wa lenyalo, ga se phošo go letela dilo tšeo di lego ka mo godimo. O ka ba wa hwetša motho yo a nago le dilo tše ka moka. Lega go le bjalo, batho ba a fetoga ge nako e dutše e eya—le maemo a a fetoga.

Therešo e sa fetogego Gore lenyalo la lena le atlege, o swanetše go letela dimakatšo.

Tša go kgahliša. Ge dilo tše dingwe tšeo o ka bago o sa letela gore di tšwelele lenyalong di tšwelela, di ka go makatša wa šala o thabile.

“Ka ge ga bjale re nyalane, ke kgona go bona gore Maria * o na le metlae yeo ke bego ke sa e bone gabotse ge re be re sa beana mabaka. Ka ge ga bjale re tsebana gakaone, le mathata ao re kopanago le ona ga a bonale a le boima.”—Mark.

Tša go se kgahliše. Tše dingwe tša dilo tšeo di ka tšwelelago lenyalong ga di kgahliše. Ela hloko mohlala wo:

● Akanya wena le yo e tlago go ba molekane wa gago le na le pakane ya go ba baromiwa nageng e šele. Eupša go thwe’ng ge e ba ka morago ga lenyalo molekane wa gago a ka babja kudu gomme seo sa le palediša go fihlelela pakane yeo? Seo ruri se ka direga, ka ge Beibele e re “bohle ba diragalelwa ke dilo tše mpe!” (Mmoledi 9:11, Holy Bible—Easy-to-Read Version) Ga go pelaelo gore boemo bja molekane wa gago bo ka go bakela kgateletšego—le go nyama ka ge le sa fihlelela pakane ya lena. Lega go le bjalo, ge go ka tšwelela boemo bjo bjalo bjo le bego le sa bo letela, o tla swanelwa ke go bo amogela gomme le dire diphetogo. Ge e le gabotse, o nyalane le motho, e sego pakane.

Therešo e sa fetogego: Go etša ge Beibele e bolela, bao ba tsenago lenyalong ba tla ba le “tlaišego.” (1 Bakorinthe 7:28) Ka dinako tše dingwe, tlaišego yeo e ka tšwelela le maemong ao a sa letelwago.

O ka dira’ng gore o itokišeletše maemo ao a sa letelwago? Ge o tsena lenyalong, o tla swanelwa ke go ba le dilo tše pedi:

1. PONO E LEKALEKANEGO

Go sa šetšwe gore wena le molekane wa gago wa ka moso le swanelana bjang, le swanetše go letela gore

 ● le ka se dule le dumelelana ka dilo ka moka

● le ka se dule le etiša dilo tša go swana pele

● le ka se dule le thabela dilo tša go swana

● le ka se dule le ikwa le ratana go swana le mathomong

Maemo a swanago le ao a hlalositšwego ka mo godimo a tlwaelegile. Eupša a ka se senye lenyalo la gago ntle le ge o ka a dumelela go dira bjalo! Gopola gore Beibele e re lerato “le kgotlelela tšohle” e bile “le ka mohla ga le fele.”—1 Bakorinthe 13:4, 7, 8.

Therešo e sa fetogego: Ge e le gabotse, ga se mathata ao le lebeletšanago le wona eupša ke tsela yeo le swaraganago le ona yeo e tlago go tiiša goba go senya lenyalo la lena.—Bakolose 3:13.

2. GO BOTEGELA MOLEKANE WA GAGO

Ge e ba wena le molekane wa gago le ikemišeditše go kgomarelana, go sa šetšwe seo se ka diregago, le tla kgona go swaragana le mathata ao le bego le sa a letela.—Mateo 19:6.

Ba bangwe ba re go itlama go dira gore lenyalo le be thata. Ge e le gabotse, ga go bjalo! Go itlama go dira gore tswalano ya lena e tie. Ge go direga dilo tšeo le sa di letelago, wena le molekane wa gago le tla tsoma tharollo, e sego ya go tšwa lenyalong leo.

Ge o nyaka go hlagolela moya wa go itlama, o swanetše go ba le pono e nepagetšego ka lenyalo go e na le go fo dira dilo go ya ka kgopolo ya gago. Ge o nyaka go bona phapano, leka go dira molekwana wo.

1. Anke o nagane o na le thekethe ya mahala ya sefofane yeo e ka go išago kae goba kae mo o ka go ratago mo lefaseng. O be o ka kgetha go ya kae, gona ka baka la’ng?

Lefelo: ․․․․․

Lebaka:

․․․․․ go bogela tlhago

․․․․․ go kgahlegela setšo

․․․․․ boemo bja leratadima

․․․․․ boithabišo

․․․․․ se sengwe ________________

2. Anke o nagane ka thekethe ya gago ya sefofane e le ya go go iša feela lefelong le itšego gomme lefelo leo e le leo o tla dulago go lona sa ruri.

Bjale o be o tla kgetha go ya kae?

Lefelo: ․․․․․

goba

․․․․․ Ke be ke tla itulela mo ke dulago go na ga bjale.

Go molekwana wo o lego ka mo godimo, mohlomongwe lefelo leo o le kgethilego mathomong le fapana le leo o le kgethilego la bobedi. Le ge a ka ba a swana, mohlomongwe o ile wa swanelwa ke go nagana ka tsela e fapanego kgethong ya gago ya bobedi. Go e na le go ipona o le motho yo a etetšego mafelo gomme a itshepelela kgauswi le lewatle goba dithabeng, o ile wa swanelwa ke go inagana o le modudi yo a tla hwetšago mehola goba a lebeletšana le mathata a letšatši le letšatši.

O swanetše go nagana ka lenyalo ka tsela yeo. Le gona, ge nako e dutše e eya, maemo a ka fetoga. Le wena le molekane wa gago le tla fetoga. Katlego ya lena e tla ithekga kudu ka bokgoni bja lena bja go lebeletšana le maemo ao a bego a sa letelwa le go swaragana le ona ge a tšwelela.

Seo o ka naganago ka sona: Gona bjale ka ge o le motho yo a sego lenyalong, na o kgona go swaragana le maemo ao o bego o sa a letela bophelong?

Thušo e nngwe ya bafsa bao ba lego mahlalagading e ka hwetšwa Wepesaeteng ya www.mt1130.com

[Mongwalo wa tlase]

[Lepokisi go letlakala 27]

KE KA BAKA LA’NG O SA BOTŠIŠE BATSWADI BA GAGO?

Ke ditšhegofatšo le ditlhohlo dife tše le bego le sa di letela tšeo le bilego le tšona ge le sa tšwa go nyalana? Nka itokišeletša bjang dilo tšeo di ka fo tšwelelago ke sa di letela ge nka tsena lenyalong?