DINONYANA tšeo di akalalago ga di thatafalelwe ke go dula lefaufaung ka nako e telele. Albatross e ralalago ke mohlala o kgahlišago wa seo. Nonyana ye yeo ge maphego a yona a phurolotšwe ka moka e lego a botelele bja dimithara tše 3,4 gomme e imela dikhilograma tše 8,5, e kgona go fofa dikhilomithara tše dikete e diriša matla a manyenyane kudu! E kgona go dira se ka baka la sebopego sa mmele wa yona le bokgoni bja yona bja go akalala.

Ela hloko: Ge albatross e fofa, e diriša ditšhika tša yona tša moswananoši tšeo di notlelago maphego a yona gore a se phaphasele ge e a phurolotše ka botlalo, ka go re’alo ya khutšiša mešifa ya yona. Selo se sengwe seo nonyana ye e kgonago go se dira—go kgona go akalala ka diiri tše dintši—se akaretša kamoo e kgonago go fofa ka bokgoni diphefong tša lewatleng.

Ge di-albatross di le lewatleng, di a hlatloga, tša thinya le go theoga gantšintši—e lego mogato wo o neago dinonyana tše matla a lekanego a go di bušetša sekeng gore di kgone go akalala gape. Ke gona borathutamahlale ba sa tšwago go lemoga kamoo dinonyana tše di dirago se ka gona. Ba diriša didirišwa tša maemo a godimo tša go lota mohlala le lenaneo le le kgethegilego la khomphutha, ba hweditše gore di-albatross di hwetša matla ao a nyakegago ge di tloga moo phefo e thomago gona di lebile mo e fokelago gona ge di šetše di fofela godimo. Borathutamahlale ba re: “Matla ao a ata ka thelelo ka go se kgaotše.” Mafelelo e ba afe? Nonyana ye e ka akalala diiri tše dintši e sa kgaotše ntle le go phaphasela!

Go lemoga dilo tše go ka thuša baentšeneare go hlama dinamelwa tša moyeng tšeo di seketšago makhura kudu, mohlomongwe le go diriša tšeo di se nago entšene.

O nagana eng? Na go akalala ka go seketša matla ga nonyana ya albatross e ralalago, gaešita le sebopego se se kgethegilego sa mmele wa yona, go bile gona ka tlhagelelo? Goba na go hlamilwe?