“Ke nyaka gore lapa la ka le atlege. Nna le mosadi wa ka re na le mathata morago bjale, gomme mathata ao a gaketše ka morago ga gore re be le bana. Re nyaka thušo”

BEIBELE E RE:

“Lapa le tla agwa ka bohlale, la tiišwa ka temogo.”—Diema 24:3.

DIBOPEGO TŠE DI HOLAGO TŠA WEPESAETE YE

Karolo ya “Banyalani le Batswadi” e ka go thuša go fenya ditlhohlo tše bjalo ka tše:

• Go atlega ngwageng wa mathomo wa lenyalo

• Go dirišana le mmatswale le ratswale

• Go laya bana

• Go ngangišana

• Go swaragana le mathata a tša ditšhelete

(Lebelela ka tlase ga DITHUTO TŠA BEIBELE > BANYALANI LE BATSWADI)

Sephiri sa Lethabo la Lapa ke puku yeo e akaretšago dihlogo tše dintši tša mabapi le lapa, go tloga ka taba ya mabapi le go itokišeletša lenyalo pele o ka tsena go lona go fihla ka ya go hlokomela batswadi bao ba tšofetšego.

(Lebelela ka tlase ga DIKGATIŠO > DIPUKU LE DIPOROUTŠHA)

“Ga go na selo se bohlokwa go nna go feta bana ba ka. Ke nyaka gore ba gole e be batho ba bagolo bao nka ikgantšhago ka bona”

BEIBELE E RE:

“Tlwaetša mošemane go ya ka tsela yeo a swanetšego go sepela ka yona; le ge a tšofetše, a ka se e lahle.”—Diema 22:6.

DIBOPEGO TŠE DI HOLAGO TŠA WEPESAETE YE

Karolo ya “Bana” e na le dikanegelo tša Beibele tša diswantšho, go ithuta ka diswantšho, dibidio le seo ke ithutago sona ka Beibeleng tšeo di ka go thušago go ruta bana ba gago . . . 

• go ba ba kwago

• go bontšha botho

• go phedišana

• go ithuta go re “ke a leboga”

(Lebelela ka tlase ga DITHUTO TŠA BEIBELE > BANA)

Puku ya ka ya Ditaba tša Beibele le Ithute go Morutiši yo Mogolo, ke dipuku tše di nago le diswantšho tše dibotse tšeo di hlametšwego gore o di bale le bana ba gago.

(Lebelela ka tlase ga DIKGATIŠO > DIPUKU LE DIPOROUTŠHA)

“Nka rata go hwetša ditšhišinyo bakeng sa go swaragana le ditaba tše bjalo ka sekolo, batswadi ba ka, bagwera ba ka le batho ba bong bjo bo sa swanego le bja ka. Ga ke sa le ngwana, ka gona ga ke nyake go botšwa gore ke dire eng”

BEIBELE E RE:

“Anke pelo ya gago e go thabiše bosoganeng bja gago.”—Mmoledi 11:9.

DIBOPEGO TŠE DI HOLAGO TŠA WEPESAETE YE

Karolo ya “Bafsa” e na le dihlogo le dibidio tšeo di ka go thušago . . . 

• ge e ba o lewa ke bodutu

• ge e ba o na le mathata sekolong

• ge e ba o robile molao wa ka gae

• ge e ba o tlaišwa ke bomphenyašilo goba o gobošwa ka thobalano

(Lebelela ka tlase ga DITHUTO TŠA BEIBELE > BAFSA)

Bolumo ya 1 le ya 2 ya Dipotšišo tša Bafsa le Dikarabo tše Šomago di ahlaahla dipotšišo tše 77 tše bohlokwa tšeo di botšišwago kudu.

(Lebelela ka tlase ga DIKGATIŠO > DIPUKU LE DIPOROUTŠHA)

“Ke rata go kwešiša Beibele. Ke swanetše go dira’ng?”

BEIBELE E RE:

“Lengwalo ka moka le buduletšwe ke Modimo gomme le hola ka go ruta.”—2 Timotheo 3:16.

DIBOPEGO TŠE DI HOLAGO TŠA WEPESAETE YE

Phetolelo ya Lefase le Lefsa ya Mangwalo a Makgethwa ke phetolelo ya Beibele e nepagetšego le e balegago gabonolo.

(Lebelela ka tlase ga DIKGATIŠO> BEIBELE)

Karolo ya “Dipotšišo tša Beibele di a Arabja” e nea dikarabo tše di kwagalago tša dipotšišo tša go tloga ka e rego, “Ke ka baka la’ng Modimo a ile a dumelela Bajuda go Bolawa ga Sehlogo?” go fihla ka e rego, “Jesu o belegwe neng?”

(Lebelela ka tlase ga DITHUTO TŠA BEIBELE > DIPOTŠIŠO TŠA BEIBELE DI A ARABJA)

Letlakala le le rego, “Kgopela Thuto ya Mahala ya Beibele” le go nea sebaka sa go ikhola ka thuto ya rena ya Beibele ya mahala.

(Kgotla linki e rego “Kgopela Thuto ya Beibele” letlakaleng la mathomong)

“Ke ile ka kgaotša go bala Beibele ka gobane ke be ke sa kgone go e kwešiša. Eupša ka morago ga gore ke thome go ithuta yona ke diriša puku ya ‘Ke Eng Seo ge e le Gabotse Beibele e se Rutago?,’ ke ile ka makatšwa ke kamoo Beibele e lego bonolo le kamoo e lego e kwagalago ka gona.”—Christina.