SEO BATHO BA SE BOLELAGO

Batho ba bantši ba lebelela go petšha e le papadi yeo e sego kotsi, ge feela e dirwa ka molao. Mehuta e mengwe ya go petšha yeo e lego molaong, e bjalo ka di-lottery tšeo di thekgwago ke mmušo, e nea mananeo ao a holago batho bohle tšhelete.

SEO BEIBELE E SE BOLELAGO

Beibele ga e bolele ka go petšha. Lega go le bjalo, e nea melao ya motheo yeo e re hlahlago le go re bontšha kamoo Modimo a ikwago ka gona ka go petšha.

Go petšha—go thopa tšhelete yeo ba bangwe e ba lahlegetšego—go thulana le keletšo ya Beibele ya go ‘itiša mohuteng o mongwe le o mongwe wa megabaru.’ (Luka 12:15) Ge e le gabotse, go petšha go hlohleletšwa ke megabaru. Mekgatlo ya go petšha e bapatša gore batho ba ka thopa tšhelete e ntši, mola e uta taba ya gore ba ka palelwa ke go thopa sefoka, ka gobane e tseba gore ditoro tša go huma di hlohleletša babapadi go petšha ka tšhelete e ntši ge ba le dikhasinong. Go e na le gore go thuše motho gore a se ke a ba le megabaru, go petšha go hlohleletša kganyogo ya go hwetša tšhelete gabonolo.

Go petšha go theilwe mabakeng a boithati: go thopa tšhelete yeo e lahlegetšego babapadi ba bangwe. Lega go le bjalo, Beibele e kgothaletša motho gore a “tšwele pele a tsoma seo se holago motho yo mongwe, e sego seo se holago yena a nnoši.” (1 Bakorinthe 10:24) Le gona o mongwe wa Melao e Lesome o re: “O se ke wa duma . . . selo le ge e le sefe seo e lego sa wa geno.” (Ekisodo 20:17) Ge mopetšhi a nyaka go fenya, ge e le gabotse o holofela gore ba bangwe ba tla lahlegelwa ke tšhelete e le gore e hwetše ke yena.

Beibele gape e re lemoša gore re se lebelele mahlatse e le matla ao a ka tlišetšago motho ditšhegofatšo. Isiraeleng ya bogologolo, go be go na le bao ba bego ba sa dumele go Modimo gomme ba thoma go “lokišetša modimo wa Mahlatse tafola.” Na borapedi bjo bjalo bja “modimo wa Mahlatse” bo be bo amogelega go Modimo? Aowa, Modimo o itše go bona: “La tšwela pele le dira tše mpe mahlong a ka, la ba la kgetha dilo tšeo di sa nkgahlego.”—Jesaya 65:11, 12.

Ke therešo gore dikarolong tše dingwe tša lefase, tšhelete yeo e hwetšwago mekgatlong ya go petšha yeo e lego molaong, e dirišetšwa go lefelela dithuto, go kaonefatša ikonomi le mananeo a mangwe a batho bohle. Eupša go dirišwa ga tšhelete yeo ga go fetoše tsela yeo e hweditšwego ka yona, e lego ka dipapadi tšeo di kgothaletšago megabaru le boithati le kgopolo ya go hwetša selo mahala.

“O se ke wa duma . . . selo le ge e le sefe seo e lego sa wa geno.”—Ekisodo 20:17.

SEO BEIBELE E SE BOLELAGO

Beibele e lemoša ka gore “bao ba ikemišeditšego go huma ba wela molekong le molabeng le dikganyogong tše dintši tša go hloka tlhaologanyo le tše gobatšago tšeo di wetšago batho tahlegong le tshenyegong.” (1 Timotheo 6:9) Go petšha go tutuetšwa ke megabaru, gomme megabaru e kotsi kudu moo Beibele e balago “megabaru” gare ga mekgwa yeo e swanetšego go phengwa ka mo go feletšego.—Baefeso 5:3.

Ka ge go petšha go kgothaletša go huma ka pela, go hlohleletša lerato la tšhelete, e lego selo seo Beibele e se hlalosago e le “modu wa mehuta ka moka ya dilo tše di gobatšago.” Kganyogo ya tšhelete e ka ba tutuetšo e matla bophelong bja motho, yeo e mmakelago dipelaelo tše dintši le go senya tumelo ya gagwe go Modimo. Ge e bolela ka tsela ya seswantšhetšo, Beibele e hlalosa bao ba tantšwego ke lerato la tšhelete bjalo ka ge eka ba “itlhabile gohle ka mahloko a mantši.”—1 Timotheo 6:10.

Megabaru e baka go se kgotsofale, e tlogela batho ba sa kgotsofalele maemo a bona a tša ditšhelete le go ba amoga lethabo. “Morati wa silifera a ka se kgotsofatšwe ke silifera, le yo mongwe le yo mongwe yo a ratago lehumo a ka se kgotsofatšwe ke tšeo di mmoelago.”—Mmoledi 5:10.

Batho ba dimilione bao ba tantšwego ke go petšha ba ikhwetša ba lemaletše go petšha o šoro. Go akanyetšwa gore bothata bjo bo atile, moo batho ba dimilione ba lemaletšego go petšha kua United States e nnoši.

Seema se sengwe se re: “Bohwa mathomong bo hwetšwa ka megabaru, eupša mafelelong bo ka se šegofatšwe.” (Diema 20:21) Bothata bja go petšha bo dirile gore balemaledi ba go petšha ba tsene dikolotong le go šala ba se na tšhelete e bile bo dirile gore ba bantši ba lahlegelwe ke mešomo, manyalo gaešita le ke bagwera. Go diriša melao ya motheo ya Beibele yeo e re hlahlago go ka thuša motho go phema ditlamorago tše mpe tšeo di ka bakwago ke go petšha bophelong.

“Bao ba ikemišeditšego go huma ba wela molekong le molabeng le dikganyogong tše dintši tša go hloka tlhaologanyo le tše gobatšago tšeo di wetšago batho tahlegong le tshenyegong.”—1 Timotheo 6:9.