NA O lebeletšane le bolwetši bjo šoro? tlhalo? goba o hlokofaletšwe ke motho yo o mo ratago? Ge o lebeletšane le boemo bjoo o ka se kgonego go bo fetoša, o ka ikwa o kgakgetšwe e bile o duma eka dilo di ka fetoga. O ka dira’ng gore o kgone go laola bophelo bja gago gape?

Moapostola Paulo o ile a sepela maeto a mantši e le moromiwa yo a fišegago wa lekgolong la pele la nywaga. Eupša maeto a gagwe a ile a kgaotša ge a be a swarwa ka tsela yeo e sego ya toka gomme a golegwa ntlong moo a bego a hlokometšwe ke bahlapetši ka nywaga e mebedi. Go e na le go dumelela seo se mo nyamiša, Paulo o ile a tsepamiša kgopolo go seo a bego a kgona go se dira. O ile a diriša Beibele go thuša le go kgothatša ka moka bao ba bego ba mo etela. O ile a ba a ngwala mangwalo a mmalwa ao ga bjale e lego karolo ya Beibele.—Ditiro 28:30, 31.

Bjalo ka ge go boletšwe sehlogong seo se fetilego, Anja ga a kgone go tšwa ka gae. O re: “Bophelo bja ka bo fetogile ga e sa le go hwetšwa gore ke na le bolwetši bja kankere. Ga bjale ke šetša boemo bja ka bja tša maphelo, gomme ga ke sa šoma e bile ga ke sa kgona go fetša nako le bagwera.” Anja o lebeletšana bjang le maemo a gagwe ao a ka se kgonego go a fetoša? O re: “Go fetoša lenaneo la bophelo bja ka go nthušitše kudu. Ke etišitše dilo tša bohlokwa pele lenaneong la ka ke naganne ka mafokodi a ka. Se se dirile gore ke ikwe ke kgona go laola bophelo bja ka.”

Ge e ba maemo ao o ka se kgonego go a fetoša a bonagala a laola bophelo bja gago, leka dilo tše di latelago:

• Šetša seo o ka kgonago go se dira. Ka mohlala, o ka no se kgone go laola boemo bja gago bja tša maphelo ka mo go feletšego, eupša o ka itšhidulla, wa ja dijo tšeo di nago le phepo gomme wa khutša ka mo go lekanego.

• Kgetha seo o nyakago go se fihlelela bophelong. Nyakišiša gore ke eng seo o ka se dirago e le gore ganyenyane-ganyenyane o fihlelele pakane yeo. Leka go fetša nako e nyenyane letšatši le lengwe le lengwe o šomela go fihlelela pakane ya gago.

• Dira le ge e ka ba mešongwana yeo e dirago gore o ikwe o kgotsofetše e bile o thabile. Hlwekiša tafola ya ka kitšhing gomme o hlatswe dibjana. Apara gabotse. Thoma ka go dira mešomo ya bohlokwa mesong.

• Eba le pono e botse ka boemo bja gago. Ka mohlala, na boemo bja gago bo dira gore o be le temogo ya kamoo o ka lebeletšanago le dipelaelo? Na o ka diriša temogo e bjalo go thuša ba bangwe?

Therešo e sa Fetogego: O ka no se kgone go laola maemo a gago, eupša o ka kgona go laola tsela yeo o arabelago ka yona.