SUSAN o thomile go ipotšiša dipotšišo ka Modimo ge a na le nywaga e šupa, ge mogwera wa gagwe wa nywaga e senyane e lego Al a be a le sepetlele ka baka la bolwetši bja polio gomme a tsentšwe ka gare ga motšhene wa go mo thuša go hema. O ngwadile ka taba yeo ka kuranteng ya The New York Times ya January 6, 2013.

Ka morago ga go etela Al sepetlele, Susan o ile a botšiša mmagwe gore: “Ke ka baka la’ng Modimo a dira se go mošemanyana yo monyenyane?”

Mmagwe o arabile ka gore: “Moruti o re Modimo o swanetše go ba a na le mabaka, eupša ga ke tsebe gore e ka ba e le afe.” Ka 1954, e lego nywaga e mebedi ka morago ga moo, go ile gwa hwetšwa sehlare sa polio seo se tlilego ka Jonas Salk, ke moka, mmago Susan a bolela gore mohlomongwe Modimo o hlahlile dinyakišišo tša gagwe.

Susan o arabile ka gore: “Go ba gona, Modimo nkabe a ile a hlahla dingaka e sa le pele e le gore Al a se ke a tsentšhwa ka gare ga motšhene wa go mo thuša go hema.”

Ge Susan a hlalosa ka boripana seo se diregilego bjaneng o ngwadile gore: “[Al] o ile a hlokofala nywaga e seswai ka morago ga moo, ka gona ke ile ka ba moilaModimo e bile go be go se na seo se ka mphetošago monagano.”

Go swana le Susan, batho ba bantši bao ba ilego ba tlaišwa ke masetlapelo goba ba bona ge a wela ba bangwe, ba thatafalelwa ke go hwetša dikarabo tše di kgotsofatšago tša dipotšišo tšeo ba nago le tšona ka Modimo. Ba bangwe eba bailaModimo. Ba bangwe ba ka no se gane ka mo go feletšego gore Modimo o gona, eupša ba ba le dipelaelo.

Ga se gore bailaModimo le batho bao ba nago le dipelaelo ga ba tsebe selo ka bodumedi. Go fapana le moo, seo ba ilego ba lebeletšana le sona bodumeding gantši ke sona se dirago gore ba se sa dumela go Modimo. Ba bolela gore bodumedi bjo bo rulagantšwego bo paletšwe ke go araba dipotšišo tše thata bophelong. Ke dipotšišo tša mohuta mang? Se se makatšago ke gore gantši ke dipotšišo tšeo di tshwenyago le batho bao ba ipotšago gore ba dumela go Modimo. Ela hloko dipotšišo tše tharo tšeo batho ba bantši ge e ba ba ka newa sebaka ba ka ratago go di botšiša Modimo, gotee le dikarabo tše di tšwago ka Beibeleng.

Ke ka baka la’ng go botšišwa potšišo yeo?

Ba bantši ba phethile ka gore: ‘Ge nkabe Modimo a na le lerato o be a tla thibela masetlapelo.’

SEO GO KA NAGANWAGO KA SONA: Re ka bona mekgwa le meetlo ya ditšo tše dingwe e makatša goba mohlomongwe e tšhoša. Go ka ba bonolo gore re se kwešiše tsela yeo ba dirago dilo ka yona. Ka mohlala, setšong se sengwe batho ba tšea go lebelela motho ka mahlong e le pontšho ya go botega; mola setšong se sengwe ba tšea seo e le go hloka tlhompho. Gaešita le maemong a bjalo, ga gona lebaka la gore re bolele gore ba fošitše. Go e na le moo, go nyakega gore re ba tsebe gakaone.

Na go ka direga se se swanago ge go tliwa tabeng ya go kwešiša Modimo? Ba bantši ba dumela gore tlaišego ke leswao la gore ga gona Modimo. Lega go le bjalo, ba bangwe bao ba kwešišago lebaka leo ka lona Modimo a dumelelago tlaišego, ba kgodišegile gore o gona.

SEO BEIBELE E SE BOLELAGO: Tsela yeo Modimo a naganago ka yona le tsela yeo a dirago dilo ka yona e fapana le ya rena. (Jesaya 55:8, 9) Ka baka la seo, mathomong re ka makatšwa ke tsela yeo a dirago dilo ka yona le mabaka a gore a lete pele a ka dira selo.

Lega go le bjalo, Beibele ga e re re amogele dipolelwana tše di se nago mohola tše bjalo ka e rego: “Modimo o šoma ka ditsela tšeo di sa kwešišegego.” Go e na le moo, e re kgothaletša go ithuta ka mo go oketšegilego ka Modimo, le go re thuša go kwešiša lebaka leo a dirago dilo ka tsela yeo. * Re ka ba ra kgona go batamela kgauswi le yena.—Jakobo 4:8.

Ke ka baka la’ng go botšišwa potšišo yeo?

Ba bangwe ba ka bea mabaka ka gore: ‘Ge e ba Modimo a tšea potego e le bohlokwa, go be go ka se be le boikaketši bjo bokaaka magareng ga bao ba rego ba a mo rapela.’

SEO GO KA NAGANWAGO KA SONA: Nagana ka morwa yo a ganago go theetša ditaelo tša tatagwe tšeo di holago ke moka a tloga gae e le gore a yo phela bophelo bjo bo gobogilego. Le ge tatagwe a sa amogele seo, o dumelela morwa wa gagwe go itirela kgetho. Na e tla be e le mo go lokilego gore bao ba kopanago le morwa yoo ba phethe ka gore o be a na le tate yo mobe goba ga a na tate? Ga go bjalo le gatee! Ka mo go swanago, boikaketši bjoo bo lego bodumeding bo hlatsela gore Modimo o dumelela batho gore ba ikgethele ditsela tša bona bophelong.

SEO BEIBELE E SE BOLELAGO: Modimo o hloile boikaketši bjo bo lego bodumeding. (Jeremia 7:29-31; 32:35) Ka nako e swanago, o dumelela batho gore ba be le tokologo ya go ikgethela. Ba bantši bao ba ipolelago gore ba dumela go Modimo ba kgetha go latela dithuto tša madumedi ao ba itlhametšego ona le ditekanyetšo tša bona tša boitshwaro.—Mateo 15:7-9.

Ka mo go fapanego, bodumedi bjo Modimo a bo amogelago ga bo na boikaketši. * Jesu o itše: “Bohle ba tla tseba ka se gore le barutiwa ba ka, ge e ba le ratana.” (Johane 13:35) Lerato leo e swanetše go ba “le le se nago boikaketši.” (Baroma 12:9) Madumedi a mantši a paletšwe ke go phela ka go dumelelana le seo. Ka mohlala, ka 1994, polaong ya molokwanarite ya kua Rwanda, ditho tša badumedi tše diketekete di bolaile badumedi gotee le tšona fela ka gobane e le ba ditšo tšeo di fapanego le tša bona. Go fapana le moo, Dihlatse tša Jehofa ga se tša tšea karolo polaong yeo, e bile bontši bja tšona di ile tša šireletša badumedi gotee le tšona go akaretša le batho ba bangwe, gaešita le ge seo se be se bea maphelo a tšona kotsing. Ditiro tše bjalo tša go hloka boithati di hlatsela gore bodumedi bo ka dula bo se na boikaketši.

Ke ka baka la’ng go botšišwa potšišo yeo?

Ba bangwe ba ka ipotšiša gore: ‘Ke ka baka la’ng batho ba phela nywaga e 80 goba e 90 feela ke moka ba e hwa? Morero wa go phela nako yeo e kopana ke ofe?’

SEO GO KA NAGANWAGO KA SONA: Le ge batho ba bantši ba sa dumele go Modimo ba lemoga lebaka leo tlholo e raraganego le tsela yeo e rulagantšwego ka yona. Ba lemoga gore polanete ya rena le dipolanete tše dingwe gotee le ngwedi di rulagantšwe ka tsela ya maleba gore go be le bophelo mo lefaseng. Ba hlalosa melao ya tlhago yeo e laolago legohle e le yeo e hlamilwego le go rulaganywa gabotse, moo e lego gore gaešita le phetogo e nyenyane e be e tla dira gore go se be le bophelo mo lefaseng.

SEO BEIBELE E SE BOLELAGO: Le ge batho ba bantši ba bona bophelo bja rena bjo bokopana e le bohlatse bja go se be gona ga Modimo, tlholo e nea bohlatse bjo bo lekanego bja gore go na le Mmopi. (Baroma 1:20) O dirile dilo tše ka morero, gomme lebaka la go ba gona ga rena le tswalana kgauswi kudu le morero wa gagwe. Modimo o bopile batho e le gore ba phele ka mo go sa felego mo lefaseng gomme ga se a lebala morero wa gagwe.—Psalme 37:11, 29; Jesaya 55:11.

Le ge re ka kgona go lemoga go ba gona ga Modimo gaešita le dika tše dingwe tša gagwe ka tlholo, e be e se maikemišetšo a Modimo gore re lemoge morero wa gagwe ka tsela yeo. E le gore re tsebe morero wa Modimo le lebaka la go ba gona ga rena go nyakega gore re boledišane le yena. O boledišana le rena ka Beibele a diriša mantšu a bonolo le ao a lebanyago. * Dihlatse tša Jehofa di go laletša gore o boeletše dikarabo tše di hwetšwago moo.