LEHONO batho ba bantšhi ba nagana gore ba bohlokwa kudu go feta ba bangwe ebile ba nyaka go swarwa ka tsela e kgethegilego. Le ge ba ka swarwa ka tsela e kgethegilego, ba dula ba nagana gore ga se ya lekana. Tsela ye batho ba ba naganago ka yona, e tloga e bontšha gore ka nnete re phela mehleng ya bofelo.—2 Tim. 3:2.

Ke go tloga kgale batho ba nagana gore ba bohlokwa kudu. Ka mohlala, Adama le Efa ba ile ba nyaka go ikgethela selo se sebotse le seo se sa lokago, gomme lehono re a tlaišega ka baka la phetho yeo ya bona. Mengwaga e mentšhi ka morago, Kgoši Usia wa Juda o ile a nagana gore yena o na le tokelo ya go fiša diorelo eupša o be a fošitše. (2 Dikor. 26:18, 19) Ka mo go swanago, Bafarisei le Basadutsei ba be ba nagana gore Modimo o swanetše go ba swara ka tsela e kgethegilego ka ge e le ditlogolo tša Aborahama.—Mat. 3:9.

Lehono re phela gare ga batho bao ba ikgopolago gomme re ka feleletša re swana le bona. (Bagal. 5:26) Re ka thoma go nagana gore re swanetše go hwetša ditokelo tše itšego goba go swarwa ka tsela e kgethegilego. Ke’ng seo se ka re thušago gore re se ke ra swana le batho bona? Re swanetše go nagana pele ka tsela yeo Jehofa a ikwago ka yona. Go na le melao ya metheo ya Beibele e mebedi yeo e ka re thušago.

Jehofa ke yena a tsebago gore re swanetše go hwetša eng. Nagana ka mehlala e latelago.

•   Ka lapeng, mosadi o swanetše go hlompha monna wa gagwe gomme monna yena a rate mosadi wa gagwe. (Baef. 5:33) Batho bao ba nyalanego ba swanetše go bontšhana gore ba a ratana. (1 Bakor. 7:3) Batswadi ba letetše gore bana ba bona ba ba kwe mola bana ba swanetše go bona gore batswadi ba bona ba a ba thekga ebile ba a ba rata.—2 Bakor. 12:14; Baef. 6:2.

• Jehofa o letetše gore re hlomphe bagolo ka ge ba šoma ka thata ka diphuthegong tša gabo rena. (1 Bathes. 5:12) Eupša bagolo ga se ba swanela go buša bana babo bona le dikgaetšedi.—1 Pet. 5:2, 3.

• Modimo o letetše gore re lefe motšhelo go balaodi ba mmušo le go ba hlompha.—Baroma 13:1, 6, 7.

Jehofa o re nea dilo tše dintšhi tšeo di sa re swanelego. Ka ge re le badiradibe re no swanelwa ke lehu. (Baroma 6:23) Eupša Jehofa o re šegofatša kudu ka gobane o a re rata. (Ps. 103:10, 11) Jehofa o a re šegofatša goba go re nea ditokelo ka baka la botho bja gagwe bjo bogolo.—Baroma 12:6-8; Baef. 2:8.

O se ke wa thoma go nagana go swana le batho bao ba sa hlankelego Jehofa. Re ka thomago nagana gore re bohlokwa kudu re sa lemoge. Jesu o ile a bontšha gore go nagana ka tsela yeo go ka ba bonolo kudu ge a be a diriša papišo ya bašomi bao ba ilego ba lefelwa ka tenariase. Bašomi ba bangwe ba ile ba thoma go šoma e sale mesong gomme ba šoma letšatši ka moka go fiša, mola ba bangwe bona ba šomile iri e tee feela. Batho bao ba ilego ba šoma go tloga mesong ba be ba nagana gore ba swanetše go hwetša tšhelete e ntšhi ka baka la mošomo woo ba o dirilego. (Mat. 20:1-16) Jesu o ile a diriša papišo ye go bontšha balatedi ga gagwe gore ba swanetše go kgotsofalela seo Modimo a ba fago sona.

Ithute go leboga. (1 Bathes. 5:18) Ekišang moapostola Paulo yo a sa kago a kgopela bana babo ba Korinthe gore ba mo nee dilo tšeo a bego a di hloka le ge a be a swanetše go dira bjalo. (1 Bakor. 9:11-14) Re swanetše go leboga se sengwe le se sengwe seo batho ba re fago  sona ebile re se ke ra nagana gore ba gapeletšega go re thuša.

Eba le boikokobetšo. Ge motho a se na boikokobetšo, gantšhi o nagana gore ke yena a swanelegago go hwetša dilo tše dingwe go feta batho ba bangwe. Ge e ba re ikokobeditše re ka se nagane ka tsela yeo.

Moporofeta Daniele o re beetše mohlala o mobotse kudu wa go ba le boikokobetšo. O be a etšwa lapeng la go hlomphega, a le botsana, a hlalefile ebile a na le bokgoni bja go dira dilo tše itšego. Seo se ka ba se ile sa dira gore a nagane gore o bohlokwa go feta batho ba bangwe. (Dan. 1:3, 4, 19, 20) Eupša Daniele o ile a dula a ikokobeditše gomme seka seo se dirile gore a be bohloka kudu go Jehofa.—Dan. 2:30; 10:11, 12.

Ga se ra swanela go swana le batho bao ba sa hlankelego Jehofa bao ba naganago gore ba bohlokwa kudu. Go e na le moo, re swanetše go dula re thabišwa ke dilo tšeo Jehofa a re neago tšona ka baka la botho bja gagwe bjo bogolo.