1. Ke eng seo se tlago kgopolong ya gago ge o nagana ka Jehofa?

 NA O kile wa ipotšiša gore Jehofa o bjang? Ke eng seo o se naganago ka yena ge o rapela? Le ge Jehofa a sa bonagale, Beibele e mo hlalosa ka ditsela tše di fapafapanego. E re “o swana le letšatši e bile o swana le kotse” le gona o bitšwa gore ke “mollo o jago.” (Ps. 84:11; Baheb. 12:29) Ponagalo ya gagwe e swantšhwa le leswika le bohlokwa leo le bitšwago safire, selo seo se phadimago bjalo ka gauta le molalatladi o bago marung ge pula e ena. (Hesek. 1:​26-28) Ditsela tše dingwe tšeo Jehofa a hlaloswago ka tšona di ka re makatša goba tša dira gore re tšhoge.

2. Ke eng seo se ka šitišago batho go batamela kgauswi le Jehofa?

² Ka dinako tše dingwe go ka ba thata go dumela gore Jehofa o a re rata ka ge re sa kgone go mmona. Batho ba bangwe ba nagana gore Jehofa a ka se tsoge a ba ratile ka baka la dilo tšeo di ba diragaletšego bophelong. Mohlomongwe ba gotše ba se na tate yo a bego a ba rata. Jehofa o kwešiša maikwelo ao le kamoo a re amago ka gona. O diriša Beibele go re utollela semelo sa gagwe e le gore a kgone go re thuša.

3. Ke ka baka la’ng re swanetše go naganišiša ka lerato la Jehofa?

³ Lentšu leo le hlalosago Jehofa gabotse ke lerato. (1 Joh. 4:8) Modimo ke lerato. Lerato leo ke lona le šušumetšago selo se sengwe le se sengwe seo a se dirago. Lerato la Modimo ke le botho kudu mo e lego gore o kgona go le bontšha le batho bao ba sa mo ratego. (Mat. 5:​44, 45) Sehlogong se, re tlo ithuta ka Jehofa le lerato la gagwe. Ge re ka ithuta ka Modimo, ke moo re tlago go mo rata le go feta.

 JEHOFA O RE RATA KUDU

4. Tsela yeo Jehofa a go ratago ka yona e dira gore o ikwe bjang? (Bona le seswantšho.)

⁴ “Jehofa o na le lerato le legolo.” (Jak. 5:11) Ka Beibeleng, Jehofa o itshwantšha le mma yo a nago le lerato. (Jes. 66:​12, 13) Nagana ka mma yo a ratago ngwana wa gagwe e bile a mo hlokomela. O a mmapadiša e bile o bolela le yena ka lentšu la tlasana le ka boleta. Ge ngwana yo a lla goba a ekwa bohloko, mma o kgonthišetša gore o mo nea seo a se hlokago. Ge re ekwa bohloko re ka ithekga ka lerato la Jehofa. Mopsalme o ngwadile gore: “Ge mathata a ka a be a nkimela, o nkgothaditše gomme wa ntira gore ke thabe.”—Ps. 94:19.

5. Botho bja Jehofa bo bolela’ng go wena?

⁵ Jehofa o na le lerato le legolo. (Ps. 103:8) A ka se tsoge a tlogetše go re rata le ge re ka dira diphošo. Setšhaba sa Baisiraele se be se dula se nyamiša Jehofa gantšhi, eupša ge ba bangwe ba itshola Jehofa o ile a ba botša mantšu a rego: “Ka baka la ge o bile bohlokwa mahlong a ka, ke go tšea o le yo a hlomphegago, ke go ratile.” (Jes. 43:​4, 5) Jehofa o sa re rata ka yona tsela yeo le lehono. Re ka kgona go dula re ithekga ka yena. Le ge re ka dira diphošo tše dikgolo, Jehofa a ka se tsoge a re lahlile. Ge re ka itshola gomme ra boela go yena, o tlo re amogela ka diatla tše pedi ka gobane a re rata. Jehofa o tshepiša motho yo a dirilego phošo gore “o tla mo lebalela kudu.” (Jes. 55:7) Beibele e hlalosa gore re tla bona ‘mehla ya tapologo yeo e tšwago sefahlegong sa Jehofa.’—Dit. 3:19.

6. Lengwalo la Sakaria 2:8 le re ruta’ng ka Jehofa?

⁶ Bala Sakaria 2:8. Jehofa o na le taba le tsela yeo re ikwago ka yona e bile o ikemišeditše go re šireletša ka gobane a re rata. Ge re ekwa bohloko le yena o kwa bohloko. Ka baka la se, re ka mo rapela ka gore: “Ke kgopela o ntlhokomele go etša leihlo la gago.” (Ps. 17:8) Leihlo ke se sengwe sa ditho tše bohlokwa kudu tša mmele. Ka gona ge Jehofa a re bapetša le leihlo la gagwe, go swana le ge a re, ‘yo a le kwešago bohloko lena batho baka, o kweša nna bohloko.’

7. Ke ka baka la’ng re swanetše go kgodišega gore Jehofa o a re rata?

⁷ Jehofa o nyaka gore re kgodišege gore o tloga a re rata. Eupša o a tseba gore ka baka la dilo tšeo di diregilego maphelong a rena nakong e fetilego re ka ba re ipotšiša ge e ba a  tloga a re rata. Le gona, gona bjale re ka no ba re diragalelwa ke dilo tšeo di dirago gore re se ke ra tshepa gore Jehofa o a re rata. Ke eng seo se ka re thušago go tshepa gore Jehofa o a re rata? Go ithuta kamoo Jehofa a ilego a bontšha Jesu, batlotšwa le rena ka moka gore o a re rata go ka re thuša kudu.

KAMOO JEHOFA A RE BONTŠHAGO LERATO LA GAGWE KA GONA

8. Ke ka baka la’ng Jesu a be a kgodišegile gore Tatagwe o a mo rata?

⁸ Jehofa le Jesu ba na le mengwaga e diketekete ba ratana. Ga go na tswalano le ge e le efe legodimong goba mo lefaseng yeo e fetago ya bona. Ge re bala Mateo 17:​5, re bona kamoo Jehofa a ilego a bontšha ka gona gore o rata Jesu. Jehofa nkabe a ile a no re, ‘yo ke yena ke kgahlwago ke yena.’ Eupša Jehofa o be a nyaka re tseba gore o rata Jesu gakaakang, ka gona o itše, “Yo ke Morwa wa ka yo a rategago.” Jehofa o be a ikgantšha ka Jesu e bile a leboga seo Jesu a bego a tla se dira. (Baef. 1:7) Jesu le yena o be a tloga a kgodišegile gore Tatagwe o tloga a mo rata. Ruri ga se a ka a belaela ka seo. O ile a bolela ka makga a mantšhi a kgodišegile kamoo Jehofa a mo ratago ka gona.—Joh. 3:35; 10:17; 17:24.

9. Ke polelwana efe yeo e hlalosago tsela yeo Jehofa a ratago batlotšwa ka yona? Hlalosa. (Baroma 5:5)

⁹ Jehofa o bontšhitše le gore o rata batlotšwa. (Bala Baroma 5:5.) Hlokomela polelwana e rego, “tšholletšwe.” Puku e nngwe ya nyakišišo e swantšha lerato la Modimo le meetse ao a elago. Se se bontšha kamoo Jehofa a tlogago a rata batlotšwa ka gona! Batlotšwa ba a tseba gore Modimo o a ba rata. (Juda 1) Moapostola Johane o bontšhitše kamoo ba ikwago ka gona ge a be a ngwala gore: “Ruri lerato leo Tate a re bontšhitšego lona ke le legolo, ke ka baka leo re bitšwago bana ba Modimo!” (1 Joh. 3:1) Na Jehofa o rata batlotšwa fela? Aowa, Jehofa o re bontšhitše gore o re rata ka moka.

10. Jehofa o go bontšhitše ka tsela efe e kgolo gore o a go rata?

¹⁰ Jehofa o bontšhitše bjang gore o tloga a re rata? O re neile topollo, e lego tsela e kgolo kudu yeo a ilego a bontšha ka yona gore o a re rata! (Joh. 3:16; Baroma 5:8) Jehofa o ile a neela ka morwa wa gagwe yo a mo ratago, a mo dumelela gore a hwele batho ka moka e le gore dibe tša rena di lebalelwe le gore re kgone go ba bagwera ba gagwe. (1 Joh. 4:10) Ge re ka dula re naganišiša ka seo Jehofa le Jesu ba re diretšego sona, re tlo kgona go kwešiša gore ba tloga ba re rata kudu. (Bagal. 2:20) Topollo ga se ya lefelelwa go no phetha molao. Eupša ke mpho yeo e bontšhago gore Jehofa le Jesu ba a re rata. Jehofa o bontšhitše gore o a re rata ka go re nea morwa wa gagwe yo a tlogago a mo rata kudu e lego Jesu. O ile a dumelela gore a tlaišwe le go bolawa ka baka la rena.

11. Re ithuta’ng go Jeremia 31:3?

¹¹ Ka ge re bone, Jehofa ga a no re rata feela, eupša o re botša kamoo a re ratago ka gona. (Bala Jeremia 31:3.) Jehofa o re gogetše go yena ka ge a re rata. (Bapiša le Doiteronomio 7:​7, 8.) Ga go na motho goba selo seo se ka re aroganyago le lerato leo. (Baroma 8:​38, 39) Tsela yeo Jehofa a go ratago ka yona e dira gore o ikwe bjang? Bala Psalme 23, ke moka o bone kamoo Dafida a bego a ikwa ka gona ka tsela yeo Jehofa a bego a mo rata ka yona, le gona o bone gore seo se re kgoma bjang lehono.

TSELA YEO JEHOFA A RE RATAGO KA YONA E DIRA GORE O IKWE BJANG?

12. O ka hlalosa bjang Psalme 23?

¹² Bala Psalme 23:​1-6. Psalme 23 ke koša yeo e bontšhago kamoo Jehofa a re ratago ka  gona le go re hlokomela. Mongwadi wa psalme ye e lego Dafida, o hlalosa kamoo yena le Modiši wa gagwe e lego Jehofa ba ratanago ka gona. Dafida o be a ikwa a bolokegile le go dumelela Jehofa a mo hlahla, le gona o be a dula a ithekga ka yena. Dafida o be a tseba e bile a kgodišegile gore Jehofa o tlo mo rata bophelo bja gagwe ka moka. Ke eng seo se bego se dira gore a kgodišege ka tsela ye?

13. Ke ka baka la’ng Dafida a be a kgodišegile gore Jehofa o a mo hlokomela?

¹³ “Nka se hloke selo.” Dafida o be a kgodišegile gore Jehofa o a mo rata ka gobane o be a dula a mo nea seo a se hlokago. Dafida o be a tseba gore Jehofa ke mogwera wa gagwe e bile o dula a mo amogela. O be a kgodišegile gore go sa šetšwe dilo tšeo di ka diregago bophelong bja gagwe, Jehofa o tlo dula a mo hlokomela. Dafida o be a tshepa gore Jehofa o a mo rata e bile o tlo dula a mo hlokomela gomme seo se ile sa mo thuša gore a dule a thabile le go kgotsofalela dilo tšeo a bego a na le tšona.—Ps. 16:11.

14. Jehofa o re hlokomela bjang?

¹⁴ Jehofa o a re hlokomela ge re welwa ke mathata. Kgaetšedi Claire, a yo a hlanketšego Bethele ka mengwaga e fetago e 20, o ile a felelwa ke matla ge lapa la gabo le be le welwa ke mathata. Tatagwe o ile a hwa lehlakore, yo mongwe wa dikgaetšedi tša gagwe a kgaolwa ka phuthegong le gona lapa la gabo le ile la lahlegelwa ke kgwebo yeo ba bego ba na le yona le legae la bona. Jehofa o ile a bontšha bjang gore o a ba hlokomela? Claire o re: “Jehofa o ile a dira gore lapa la gešo le dule le na le dilo tšeo le bego le di hloka letšatši le lengwe le le  lengwe. Gantšhi Jehofa o be a dira dilo go feta kamoo ke bego ke nagana ka gona! Ke dula ka nagana ka tsela yeo Jehofa a re ratago ka yona e bile nka se tsoge ke lebetše lerato la gagwe. Go gopola dilo tše ka moka go nthuša gore ke kgone go kgotlelela mathata ao ke kopanago le ona.”

15. Ke ka baka la’ng Dafida a be a ikwa a lapologile? (Bona le seswantšho.)

¹⁵ “O a ntapološa.”  Dafida o be a fela a ikwa a gateletšegile ka baka la mathata ao a bego a mo wela. (Ps. 18:​4-6) Eupša o be a lapološwa ke tsela yeo Jehofa a bego a mo hlokomela le go mo rata ka yona. Jehofa o be a iša mogwera wa gagwe yo a lapilego “mafulong a matala” le “mafelong a go ikhutša ao a nago le meetse a mantšhi.” Ka baka la seo, Dafida o ile a ba le matla gomme a kgona go tšwela pele a hlankela Jehofa ka lethabo.—Ps. 18:​28-32.

16. Tsela yeo Jehofa a go ratago ka yona e go thušitše bjang gore o lapologe?

¹⁶ Ka mo go swanago, “ke ka baka la ditiro tša botho bja Jehofa ge re sa fedišwa” lehono, e bile re kgona go lebeletšana le mathata ao re kopanago le ona. (Dillo 3:22; Bakol. 1:11) Nagana ka mohlala wa kgaetšedi yo a bitšwago Rachel. O be a nyamile kudu ge monna wa gagwe a mo tlogela e bile a tlogela le go hlankela Jehofa nakong ya leuba la bolwetši bja COVID-19. Jehofa o mo thušitše bjang? O re: “Jehofa o ile a mpontšha gore o a nthata. O ile a dira gore ke be le bagwera bao ba bego ba fetša nako ba na le nna, ba ntlišetša dijo, ba nthomela melaetša e kgothatšago le mangwalo, ba myemyela ge ba na le nna e bile ba dula ba nkgopotša gore Jehofa o a ntlhokomela. Ke dula ke leboga Jehofa gore o nneile lapa leo le nthatago kudu.”

17. Ke ka baka la’ng Dafida a be a sa “boife selo”?

¹⁷ “Ga ke boife selo ka gobane wena o na le nna.” Bophelo bja Dafida bo be bo fela bo e ba kotsing, le gona o be a na le manaba a mantšhi a matla. Eupša tsela yeo Jehofa a bego a mo rata ka yona e be e dira gore a ikwe a šireletšegile. Dafida o be a tseba gore Jehofa o dula a na le yena gomme seo se be se dira gore a ikwe a bolokegile. Ke ka fao a ilego a opela ka gore: “[Jehofa o] nntšha dilong ka moka tšeo di mpoifišago.” (Ps. 34:4) Dafida o be a boifa e le ka kgonthe, eupša lerato la Jehofa le be le feta dipoifo tša gagwe.

18. Tsela yeo Jehofa a go ratago ka yona e ka go tiiša bjang ge o na le mathata?

¹⁸ Tsela yeo Jehofa a re ratago ka yona e re  thuša bjang ge re na le mathata? Kgaetšedi wa mmulamadibogo yo a bitšwago Susi, o hlalosa kamoo yena le monna wa gagwe ba ilego ba ikwa ka gona ka morago ga gore morwa wa bona a ipolaye. O re: “Selo sa mohuta wo ge se direga se dira gore o ikwe o se na matla e bile o fokola. Eupša tsela yeo Jehofa a re ratago ka yona e ile ya dira gore re ikwe re bolokegile e bile re šireletšegile.” Kgaetšedi Rachel yo re boletšego ka yena pejana o re: “Bošegong bjo bongwe ge ke be ke ekwa bohloko, ke tshwenyegile e bile ke tšhogile, ke ile ka llela go Jehofa. Ka yona nako yeo Jehofa o ile a swana le mma yo a hlokomelago ngwana wa gagwe, a dira gore ke iše maswafo fase le gore ke swarwe ke boroko. Nka se tsoge ke lebetše seo Jehofa a ntiretšego sona.” Mogolo yo a bitšwago Tasos o ile a fetša mengwaga e mene a le kgolegong ka baka la go gana go tsenela bošole. Jehofa o mmontšhitše bjang gore o a mo rata e bile o a mo hlokomela? Tasos o re: “Jehofa o be a ntlhokomela ka dilo tšeo ke bego ke di hloka le dilo tše dingwe. Se se ile sa dira gore ke bone gore nka mo tshepa ka mo go feletšego. Le gona, Jehofa o ile a diriša moya wa gagwe o mokgethwa go nthuša gore ke dule ke thabile le ge ke be ke le lefelong leo le nyamišago. Se se ile sa nthuša go bona gore ge nka tšwela pele ke tshepa Jehofa ke tlo kgona go bona gore o a nthata. Ka gona ke ile ka ba mmulamadibogo wa ka mehla ke dutše ke le kgolegong.”

BATAMELA KGAUSWI LE MODIMO WA GAGO YO A GO RATAGO

19. (a) Re tlo rapela bjang ge re tseba gore Jehofa o a re rata? (b) Ke eng seo se go kgahlago ka tsela yeo Jehofa a re ratago ka yona? (Bona lepokisi leo le rego, “ Mantšu ao a ka re Thušago Gore re Bone Gore Jehofa o a re Rata.”)

¹⁹ Diphihlelo tšeo re boletšego ka tšona di bontšha gore Jehofa, “Modimo wa lerato,” o na le rena! (2 Bakor. 13:11) O na le taba le yo mongwe le yo mongwe wa rena. Re kgodišegile gore re “šireletšwa ke lerato la gagwe le le botegago.” (Ps. 32:10) Ge re dutše re naganišiša ka tsela yeo a re ratago ka yona, re tlo kgona go bona gore o a re hlokomela e bile re tlo batamela kgauswi le yena. Re ka mo rapela re lokologile, ra ba ra mmotša gore re tloga re hloka lerato la gagwe. Re ka mmotša ka dilo tšeo di re tshwenyago ka moka, re tseba gore o a kwešiša e bile o ikemišeditše go re thuša.—Ps. 145:​18, 19.

20. Lerato la Jehofa le re thuša bjang gore re batamele kgauswi le yena?

²⁰ Go swana le ge re dula kgauswi le mollo ge go tonya, re batamela kgauswi le Jehofa ka gobane o a re rata. Lerato la Jehofa le matla e bile ke le legolo. Ka gona thabela gore Jehofa o a go rata. Eka ka moka ga rena re ka bolela gore, “Ke rata Jehofa”!—Ps. 116:1.