DANIEL LE MIRIAM ba nyalane ka September 2000 gomme ka morago ga moo ba phela bophelo bja maemo toropong ya Barcelona, kua Sepania. Daniel o re: “Re be re phela bophelo bjo batho ba bantši ba bo kganyogago. Tšhelete yeo re bego re e gola e be e re dumelela go jela mafelong a maemo, go etela dinageng dišele le go apara diaparo tša go tura. Le gona mošomo wa rena o be o re dumelela go ya tšhemong ka mehla.” Eupša bophelo bja Daniel le Miriam bo ile bja fetoga.

Kopanong ya selete ya 2006, Daniel o ile a kgongwa pelo ke polelo yeo go yona go ilego gwa botšišwa potšišo yeo e rego: “Na re šoma ka thata go thuša batho ‘bao ba thekeselago ba eya go bolawa’ gore ba tle tseleng e išago bophelong bjo bo sa felego?” (Die. 24:11) Polelo yeo e ile ya bolela kudu ka boikarabelo bja rena bja go botša batho molaetša wo o phološago maphelo. (Dit. 20:26, 27) Daniel o gopola ka gore: “Ke ile ka kwa eka Jehofa o bolela le nna thwii.” Le gona polelo yeo e ile ya bontšha gore ge motho a oketša tirelo ya gagwe o tla hwetša lethabo le legolo. Daniel o be a tseba gore seo ke therešo. Mosadi wa gagwe e lego Miriam e be e šetše e le mmulamadibogo gomme a thabela ditšhegofatšo tša Jehofa.

Daniel o re: “Ka morago ga go kwa polelo yeo, ke ile ka bona gore ke swanetše go dira diphetogo.” Daniel o ile a dira diphetogo. O ile a fokotša diiri tša mošomo, a thoma go bula madibogo gomme a nagana ka lethabo leo yena le Miriam ba ka bago le lona ge ba ka ya ba hlankela nageng yeo go nyakegago bagoeledi ba oketšegilego ba Mmušo.

Ka May 2007, Daniel le Miriam ba ile ba tlogela mešomo ya bona ya boiphedišo gomme ba hudugela Panama, e lego naga yeo ba kilego ba ya maikhutšong go yona. Tšhemo ya bona e be e bopša ke dihlakahlaka tše mmalwa tše dinyenyane tše di bitšwago Bocas del Toro kua Lewatleng la Caribbean, tšeo go tše dintši tša tšona go bego go dula morafo wa Maguaymi. Daniel le Miriam ba ile ba lemoga gore tšhelete yeo ba ipoloketšego yona e ka ba thuša go hlankela nageng ya Panama ka dikgwedi tše e ka bago tše seswai.

Ba be ba eya dihlakahlakeng tšeo ka seketswana le ka dipaesekele, le gona ba sa gopola lekga la mathomo ge ba be ba sepela ka dipaesekele merotogong e bile go fiša. Letšatšing leo ba ile ba sepela dikhilomithara tše e ka bago tše 32. Ka baka la go lapa, Daniel o ile a nyaka a idibala. Lega go le bjalo, batho ba mafelong ao ba bego ba šoma tšhemo go ona ba be ba ba amogela ka lerato, kudukudu ka morago ga gore banyalani ba ba ithute go bolela leleme la moo. E se kgale, ke ge ba šetše ba swara dithuto tša Beibele tše 23.

Eupša ka morago ga gore Daniel le Miriam ba felelwe ke tšhelete, ba ile ba nyama. Daniel o gopola ka gore: “Re ile ra thoma go lla ge re nagana ka go boela gae Sepania. Re be re llišwa ke gore re tlo tlogela batho bao re ithutago le bona Beibele.” Eupša ka morago ga kgwedi, Daniel le Miriam ba ile ba amogela ditaba tše dibotse. Miriam o re: “Re ile ra kgethwa gore re hlankele re le babulamadibogo ba kgethegilego. Re leboga gore re ile ra se tloge nageng yeo ya Panama!”

Ka baka la diphetogo tšeo mokgatlo o di dirilego ka 2015, Daniel le Miriam ba ile ba kgopelwa gore ba boele ba hlankele e le babulamadibogo ba ka mehla. Ba ile ba dira’ng? Ba ile ba bota kholofetšo yeo e lego go Psalme 37:5, yeo e rego: “Lahlela tsela ya gago go Jehofa, o ithekge ka yena, gomme yena o tla go thuša.” Ba ile ba hwetša mošomo wa boiphedišo gore ba kgone go tšwela pele ba hlankela e le babulamadibogo ba ka mehla, gomme lehono ba hlankela phuthegong yeo e lego profenseng ya Veraguas gona moo Panama.

Daniel o re: “Pele ga ge re ka tloga Sepania, re be re sa tshepe gore re ka kgona go phela bophelo bjo bonolo. Lehono ke mo re a kgona, e bile ga re hloke selo.” Ke selo sefe seo se tlogago se thabiša Daniel le Miriam? Ba re: “Ga go na selo seo se re thabišago kudu go feta go thuša batho ba dipelo tše dibotse go ithuta ka Jehofa!”