GO YA ka Molao wa Moshe, batho ba be ba dumeletšwe go dira dikeno maemong a itšego. Lega go le bjalo, ge Jesu a be a le mo lefaseng, Bajuda ba bantši ba be ba dira dikeno maemong ao go sa hlokagalego. Dikeno tše ba be ba di dira go kgonthišetša batho ba bangwe gore seo ba se bolelago ke therešo. Eupša Jesu o ile a kgalemela batho ka makga a mabedi go dira dikeno tša mohuta woo. O rutile gore: “Anke ‘ee’ ya lena e be ee, ‘aowa’ ya lena e be aowa.”​—Mat. 5:33-37; 23:16-22.

Go ya ka Theological Dictionary of the New Testament, puku ya Talmud e re thuša go bona kamoo Bajuda ba bego ba tlwaetše go dira dikeno go bontšha gore seo ba se bolelago ke therešo. Puku ye e hlalosa ka go lebanya dikeno tšeo di bego di le bohlokwa le tšeo di bego di se bohlokwa.

Ga se Jesu feela yo a ilego a thibela batho go diriša dikeno gampe. Ka mohlala, Flavius Josephus e lego radihistori wa Mojuda o ile a ngwala ka sehlopha se itšego sa Bajuda seo se bego se phema go dira dikeno. O ile a ngwala gore sehlopha seo se be se dumela gore go dira keno ke selo se sebe go feta go bolela bohlatse bja maaka. Se be se dumela gore ge motho a dira dikeno gore batho ba bangwe ba mo tshepe, seo se ra gore motho yoo o na le maaka. Ka mo go swanago, puku ya Jewish apocryphal yeo ba bantši ba e tsebago e le Wis-dom of Sirach goba Ecclesiasticus, (23:11) e re: “Monna yo a ratago go dira dikeno ke moradia wa mafelelo.” Jesu o ile a thibela batho go dira dikeno go dilo tšeo di sego bohlokwa. Ge re bolela therešo ka mehla ga go hlokagale gore re dire dikeno gore batho ba dumele seo re se bolelago.