1-2. Go diregile’ng nakong ya ge barutiwa ba Jesu ba babedi ba le tseleng ya go ya Emause?

 KA NISANI 16, 33 C.E. barutiwa ba Jesu ba be ba tšhogile e bile ba nyamile. Barutiwa ba bangwe ba babedi ba Jesu ba ile ba tloga Jerusalema ba ya Emause, e lego motse wo o ka bago dikhilomithara tše 11 go tšwa Jerusalema. Banna bao ba be ba nyamile kudu ka gobane Jesu o be a sa tšo bolawa. Ba be ba nyamile ka gobane ba be ba bona dilo tšeo Mesia a bego a tlo ba direla tšona di ka se sa kgonega ka ge a be a bolailwe. Eupša go ile gwa direga selo seo ba sa se letelago.

² Go tšwelela monna yo ba sa mo tsebego gomme o thoma go sepela le bona. Barutiwa ba thoma go mmotša ka dilo tšeo di kwešago bohloko tšeo di diragaletšego Jesu. Monna yoo o thoma go bolela le bona ka dilo tšeo ba ka se tsogego ba di lebetše. “[O] thoma go bolela ka Moshe le mangwalo a baporofeta ka moka,” ke moka a diriša mangwalo go hlalosa gore ke ka lebaka la eng Mesia a ile a swanelwa ke go tlaišega le go hwa. Ge banna bao ba bararo ba fihla Emause, monna yoo o ba botša gore ke yena Jesu yo a tsošitšwego bahung! Nagana gore barutiwa bao ba ile ba ikwa bjang ge ba lemoga gore Mesia o a phela!—Luka 24:​13-35.

3-4. Go ile gwa direga’ng ka barutiwa ba Jesu, gona re tlo ithuta ka’ng sehlogong se? (Ditiro 1:3)

³ Jesu o ile a fetša matšatši a masomenne mo lefaseng pele a ka boela legodimong, le gona o ile a tšwelela go barutiwa ba gagwe ka makga a mantšhi. (Bala Ditiro 1:3.) Jesu o ile a kgothatša barutiwa ba gagwe bao ba bego ba nyamile e bile ba tšhogile.  Le gona, ba ile ba thaba le go ba le sebete sa go ya bodireding le go ruta batho ditaba tše dibotse ka Mmušo wa Modimo. a

⁴ Re ka holega kudu ge re ka ithuta ka dilo tšeo Jesu a di dirilego ka nako yeo. Sehlogong se, re tlo bona kamoo Jesu a ilego a diriša nako yeo go kgothatša balatedi ba gagwe, go ba thuša go kwešiša Mangwalo ka mo go tseneletšego le go ba tlwaetša go phetha maikarabelo a bona. Re tlo bona le gore re ka ekiša bjang mohlala wa Jesu.

KGOTHATŠA BA BANGWE

5. Ke ka baka la’ng barutiwa ba Jesu ba ile ba hloka go kgothatšwa?

⁵ Balatedi ba Jesu ba be ba hloka go kgothatšwa. Ka baka la’ng? Ba bangwe ba be ba tlogetše magae a bona, malapa a bona le dikgwebo tša bona gore e be balatedi ba Jesu. (Mat. 19:27) Ba bangwe ba be ba sa swarwe gabotse ka ge e le barutiwa ba Jesu. (Joh. 9:22) Ba ile ba ikgafa ka ge ba be ba dumela gore Jesu ke Mesia yo a holofeditšwego. (Mat. 16:16) Ka morago ga gore Jesu a bolawe, ba ile ba šala ba se na kholofelo e bile ba nyamile.

6. Jesu o ile a dira’ng ka morago ga gore a tsošwe?

⁶ Ga go pelaelo ge Jesu a bona barutiwa ba gagwe ba lla, ga se a lebelela seo e le go hloka tumelo eupša o be a kwešiša gore ba kwele bohloko ka baka la go lahlegelwa ke mogwera wa bona. Ka gona, ka letšatši leo a tsošitšwego ka lona, o ile a thoma go kgothatša bagwera ba gagwe. Ka mohlala, o ile a iponagatša go Maria Magdalena yo a bego a lla lebitleng la gagwe. (Joh. 20:​11, 16) O ile a iponagatša le go barutiwa ba babedi bao re boletšego ka bona mathomong a sehlogo se. O ile a iponagatša le go moapostola Petro. (Luka 24:34) Re ithuta eng mohlaleng wa Jesu? Nagana ka seo se diragetšego ge a be a iponagatša la mathomo.

7. Jesu o ile a lebelela Maria a dira’ng mesong ya Nisani 16, gona se se ile sa dira gore a dire’ng? (Johane 20:​11-16) (Bona le seswantšho.)

⁷ Bala Johane 20:​11-16. Mesong ya Nisani 16, basadi ba bangwe bao ba botegago ba ile  ba ya lebitleng leo Jesu a bego a bolokilwe go lona. (Luka 24:​1, 10) Yo mongwe wa basadi bao e be e le Maria Magdalena. Ge Maria a fihla lebitleng leo, o ile a hwetša le se na selo. O ile a tloga a ya go botša Petro le Johane ke moka a ba šala morago ge ba eya lebitleng. Ge ba hwetša lebitla le se na selo, ba ile ba boela gae. Eupša Maria yena o ile a šala moo a lla. O be a sa tsebe gore Jesu o mo lebeletše. Jesu o ile a bona gore mosadi yo o be a mo llela gomme a nyaka go mo homotša. O ile a iponagatša go Maria gomme a mo direla selo se bonolo seo se ilego sa mo kgothatša. O ile a mo laela gore a ye go bana babo gomme a ba botše molaetša woo o bohlokwa. Maria o ile a ba botša gore Jesu o a phela.—Joh. 20:​17, 18.

8. Re ka ekiša bjang Jesu?

⁸ Kamoo re ka ekišago mohlala wa Jesu ka gona. Re ekiša Jesu ge re kgothaletša bana babo rena le dikgaetšedi gore ba tšwele pele ba hlankela Jehofa. Re swanetše go leka go tseba mathata ao bana babo rena ba nago le ona ke moka re leke go kwešiša kamoo ba ikwago ka gona le go ba homotša. Nagana ka mohlala wa kgaetšedi yo a bitšwago Jocelyn, yoo ngwanabo a ilego a hlokofala ka kotsi e šoro. O re: “Ke ile ka fetša dikgwedi tše dintšhi ke nyamile.” Eupša ngwanabo rena yo mongwe le mosadi wa gagwe ba ile ba mo mema gore a tle legaeng la bona ke moka ba mo theetša ka kwelobohloko ba mo kgonthišetša le gore o bohlokwa go Jehofa. Jocelyn o re: “Ke ile ka bona gore Jehofa o ba dirišitše gore a nthole morwalo o boima wo o bego o le magetleng a ka. Ba ile ba nthuša gore ke nyake go tšwela pele ke hlankela Jehofa.” Le rena re ka kgothatša ba bangwe ka go ba theetša ka kelohloko ge ba dutše ba re ntšhetša sa mafahleng le go bolela le bona ka kwelobohloko e le gore re kgone go ba thuša gore ba tšwele pele a hlankela Modimo.—Baroma 12:15.

THUŠA BA BANGWE GO KWEŠIŠA LENTŠU LA MODIMO

9. Balatedi ba Jesu ba ile ba kopana le mathata afe, gona o ba thušitše bjang?

⁹ Barutiwa ba Jesu ba ile ba amogela Lentšu la Modimo gomme ba leka go le diriša maphelong a bona. (Joh. 17:6) Eupša ba ile ba se kwešiše gore ke ka baka la’ng Jesu a ile a bolawa bjalo ka sesenyi. Jesu o be a tseba gore barutiwa ba gagwe ba na le tumelo e bile ba rata Jehofa eupša ba be ba swanetše go kwešiša Mangwalo gabotse. (Luka 9:​44, 45; Joh. 20:9) Ka gona, o ile a ba thuša go kwešiša seo ba se balago. A re boneng gore o ile a dira seo bjang ge a be a tšwelela go barutiwa ba babedi bao ba bego ba le tseleng yeo e lebilego Emause.

10. Jesu o kgodišitše bjang balatedi ba gagwe gore ke yena Mesia? (Luka 24:​18-27)

¹⁰ Bala Luka 24:​18-27. Jesu ga se a no thoma ka go botša banna bao gore ke yena mang. Go ena le moo, o ile a ba botšiša dipotšišo. Ka baka la’ng? Mohlomongwe o be a nyaka go kwa gore ke’ng seo ba se naganago le seo se ba tshwenyago. Ba ile ba mo ntšhetša sa mafahleng. Ba mmoditše gore ba be ba nagana gore Jesu e tla ba kgoši ya Isiraele gomme a ba buše go e na le gore ba bušwe ke Baroma. Ka morago ga gore ba mmotše kamoo ba ikwago ka gona, o ile a diriša mangwalo go thuša banna bao gore ba kwešiše seo se diragetšego. b Ka morago, Jesu o ile a kopana le barutiwa ba bangwe ke moka a ba botša seo a se boditšego barutiwa bale ba babedi. (Luka 24:​33-48) Ke’ng seo re ithutago sona pegong ye?

11-12. (a) Re ithuta’ng tseleng yeo Jesu a ilego a ruta barutiwa ba gagwe ditherešo tša Beibele ka gona? (Bona le diswantšho.) (b) Ngwanabo rena yo mongwe o ile a thuša bjang Nortey ge a be a ithuta Beibele le yena?

¹¹ Kamoo re ka ekiša go Jesu ka gona. Ge o  ithuta Beibele le batho, ba botšiše dipotšišo tšeo di tla dirago gore ba hlalose kamoo ba ikwago ka gona. (Die. 20:5) Ka morago ga gore ba go hlalosetše kamoo ba ikwago ka gona, ba bontšhe gore ba ka hwetša bjang mangwalo ao a ka ba thušago. O se ke wa ba direla diphetho. Go ena le moo, ba thuše gore ba naganišiše ka seo ba se badilego le go bona gore ba ka se diriša bjang maphelong a bona. Ekwa ka mohlala wa ngwanabo rena wa kua Ghana yo a bitšwago Nortey.

¹² Nortey o ile a thoma go ithuta Beibele a na le mengwaga e 16. Lapa la gabo le ile la thoma go mo ganetša. O thušitšwe ke eng gore a tšwele pele a ithuta Beibele? Ngwanabo rena yo a bego a ithuta le yena o ile a diriša lengwalo la Mateo kgaolo 10 go mo thuša go kwešiša gore Bakriste ba nnete ba tlo tlaišwa. O re: “Ge ke thoma go tlaišwa ke ile ka kgodišega gore ke hweditše nnete.” Ngwanabo rena o ile a mmalela lengwalo la Mateo 10:16 leo le rego re swanetše go ba šedi. Ba ile ba boledišana kamoo temana ye e ka thušago Nortey go hlalosa ditumelo tša gagwe go lapa la gabo ka tlhompho. Nortey o be a nyaka go ba mmulamadibogo ka morago ga gore a kolobetšwe, eupša tatagwe o be a nyaka gore a ye yunibesithi. Ngwanabo rena ga se a ka a mmotša gore a dire eng, eupša go ena le moo, o ile a mmotšiša ka ditemana tša Beibele tšeo di bego di tla dira gore a dire diphetho tša maleba a ithekgile ka melao ya motheo ya Beibele. Nortey o ile a dira eng? O ile a kgetha go ba mmulamadibogo wa ka mehla. Tatagwe o ile a mo raka ka gae. Nortey o ile a ikwa bjang? O re: “Ke be ke kgodišegile gore ke dirile phetho e kaone.” Ge re ka kgothaletša batho ba bangwe gore ba naganišiše ka seo Mangwalo a se bolelago, re ba thuša gore ba tiiše tumelo ya bona le gore ba tšwele pele ba hlankela Jehofa.—Baef. 3:​16-19.

THUŠA BANA BABO RENA GORE E BE “DIMPHO” TŠEO E LEGO BANNA

13. Jesu o ile a dira’ng go kgonthišetša gore mošomo wo Tatagwe a mo neilego ona o tšwela pele? (Baefeso 4:8)

¹³ Ge Jesu a be a le mo lefaseng, o ile a dira dilo ka moka tšeo Tatagwe a bego a mo kgopetše gore a di dire. (Joh. 17:4) Eupša Jesu o be a sa nagane gore ke yena feela a bego a ka dira seo Tatagwe a bego a se nyaka. Jesu o ile a tlwaetša ba bangwe nakong ya bodiredi bja gagwe bja mo lefaseng. Jesu o be a tshepa barutiwa ba gagwe. Pele a boela legodimong, o ile a ba nea boikarabelo bja go bolela ditaba tše dibotse le  go hlokomela bahlanka ba Jehofa. Go ka direga gore barutiwa ba bangwe bao ba bego ba etelela pele ba be ba le mengwageng ya bo 20. Banna bao ba be ba šoma ka thata e bile ba botegela Jesu. (Bala Baefeso 4:8.) Eupša pele a eya legodimong o ile a ba tlwaetša gore e tle e kgone go ba dimpho. O ba tlwaeditše bjang?

14. Jesu o ile a ruta barutiwa ba gagwe eng matšatšing a gagwe a 40 a mafelelo mo lefaseng? (Bona le seswantšho.)

¹⁴ Jesu o be a fela a eletša barutiwa ba gagwe, eupša a dira seo ka botho. Ka mohlala, o ile a lemoga gore ba bangwe ba barutiwa ba gagwe ba be ba sa tshepe gore o ile a bolawa le go tsošwa ke moka a ba thuša go kwešiša therešo ye le go ba eletša. (Luka 24:​25-27; Joh. 20:27) O ile ba botša le gore ba swanetše go tshwenyega ka go hlokomela bahlanka ba Modimo go ena le go tshwenyega ka dikgwebo tša bona le go dira tšhelete. (Joh. 21:15) O ile a ba gopotša gore ba swanetše go tshwenyega ka seo ba se dirago ge ba hlankela Jehofa go ena le go ipapetša le batho ba bangwe. (Joh. 21:​20-22) O ile a phošolla tsela yeo ba bangwe ba bego ba nagana ka yona ka Mmušo wa Modimo, a ba thuša le gore ba tshwenyege kudu ka go bolela ditaba tše dibotse. (Dit. 1:​6-8) Ke’ng seo bagolo ba ka ithutago sona go Jesu?

15-16. (a) Bagolo ba ka ekiša Jesu ka ditsela dife? (b) Ngwanabo rena Patrick o ile a holega bjang ka morago ga gore a hwetše keletšo?

¹⁵ Kamoo bagolo ba ka ekišago Jesu ka gona. Bagolo ba swanetše go tlwaetša bana babo rena ba bangwe go dira mešomo e oketšegilego ka phuthegong. Ba swanetše go tlwaetša le bana babo rena ba baswa. c Bagolo ba swanetše go kwešiša gore bana babo rena bao ba ka se no thoma le go dira dilo ka moka gabotse. Ba swanetše go dula ba eletša bana babo rena le go ba thuša gore ba dule ba ikokobeditše, ba botega e bile ba dule ba ikemišeditše go dula ba hlankela bana babo rena le dikgaetšedi.—1 Tim. 3:1; 2 Tim. 2:2; 1 Pet. 5:5.

¹⁶ Ekwa kamoo ngwanabo rena yo a bitšwago Patrick a ilego a holwa ke keletšo ka gona. Ge e be e sa le yo monyenyane, o be a sa bolele le batho gabotse e bile a sa ba sware gabotse, go akaretša  le dikgaetšedi. Mogolo yo mongwe o ile a lemoga gore go na le dilo tše dingwe tše Patrick a swanetšego go kaonefatša go tšona gomme a mo nea keletšo. Patrick o re: “Ke thabela gore ngwanabo rena o ile a nkeletša. Ke be ke nyama ge ke bona bana babo rena ba hwetša ditokelo tšeo ke bego ke di nyaka. Keletšo yeo ngwanešo a nneilego yona, e nthušitše go bona gore ke swanetše go ba le boikokobetšo ge ke hlankela bana bešo le dikgaetšedi go ena le go dulela go nagana ka go hwetša maemo a itšego goba ditokelo ka phuthegong.” Patrick o ile a kgethwa gore e be mogolo ge a be a na le mengwaga e 23.—Die. 27:9.

17. Jesu o bontšhitše bjang gore o tshepa barutiwa ba gagwe?

¹⁷ Jesu o neile balatedi ba gagwe boikarabelo bja gore ba botše batho ba bangwe ditaba tše dibotse le go ba ruta ka mangwalo. Barutiwa ba ka ba ile ba nagana gore ba ka se kgone go dira seo Jesu a ba kgopetšego sona. Eupša o be a tseba gore ba tla kgona go dira mošomo woo. O ile a re go bona: “Go etša ge Tate a nthomile, le nna ke a le roma.”—Joh. 20:21.

18. Bagolo ba ka ekiša bjang Jesu?

¹⁸ Kamoo bagolo ba ka ekišago Jesu ka gona. Bagolo ba tlwaetša ba bangwe ka go ba nea maikarabelo ao a oketšegilego ka phuthegong. (Bafil. 2:​19-22) Ka mohlala, bagolo ba ka kgopela gore bana babo rena gore ba ba thuše ka go hlwekiša Holo ya Mmušo le go e hlokomela. Bagolo ba ka ba nea mešomo, ba ba tlwaetša go e dira ke moka ka morago ba ba tshepa gore ba ka dira mešomo yeo. Ngwanabo rena Matthew yo a sa tšwago go ba mogolo, o re o leboga gore bana babo rena ba ile ba mo tlwaetša pele ba mo nea kabelo. O re: “Ge ke dira diphošo ba ile ba nthuša go bona gore nka kaonefatša kae.” d

19. Re swanetše go ikemišetša go dira’ng?

¹⁹ Jesu o ile a diriša matšatši a gagwe a 40 a mafelelo a le mo lefaseng gore a kgothatše ba bangwe, a ba rute go dira mošomo le go ba tlwaetša. A re direng sohle seo re ka se kgonago go ekiša Jesu. (1 Pet. 2:21) O tlo re thuša. O re boditše gore: “Ke na le lena matšatši ka moka go fihla bofelong bja tshepedišo ya dilo.”—Mat. 28:20.