Seo Beibele e se Bolelago ka Modimo le Jesu Kriste

BAPALA

Le ge batho ba rapela medimo e mentši, nnete ke gore go na le Modimo o tee feela wa nnete. (Johane 17:3) Ke “yo a Phagamego,” Mmopi wa dilo ka moka, e bile ke yena a re neilego bophelo. Ke yena a nnoši yo re swanetšego go mo rapela.—Daniele 7:18; Kutollo 4:11.

Modimo wa Nnete ke Ofe?

Ka dingwalweng tša mathomo tša Beibele, leina la Modimo le tšwelela KA MAKGA A 7 000

JEHOFA ke leina la Modimo

MORENA, MODIMO, TATE ke tše dingwe tša direto tša Jehofa

Leina la Gagwe ke Mang? Modimo ka boyena o re: “Ke nna Jehofa. Ke lona leina la ka.” (Jesaya 42:8) Leina la Modimo le tšwelela ka makga a 7 000 ka Beibeleng. Lega go le bjalo, Dibeibeleng tše dintši leina la Modimo le tlošitšwe gomme sebakeng sa lona gwa ngwalwa direto tša gagwe, tša go swana le “Morena.” Modimo o nyaka gore o be mogwera wa gagwe, ka gona o go kgothaletša gore o “[bitše] leina la gagwe.”—Psalme 105:1.

Direto tša Jehofa. Beibele e bitša Jehofa ka direto tše di latelago: “Modimo,” “Ramatlaohle,” “Mmopi,” “Tate,” “Morena” le “Mmuši.” Ge o bala Beibele, o hwetša dithapelo tše dintši tšeo go tšona go šomišitšwego leina la Jehofa le direto tša gagwe.—Daniele 9:4.

Sebopego sa Modimo. Modimo ke moya. (Johane 4:24) Beibele e tiišetša taba yeo ka go bolela gore “ga go motho yo a kilego a bona Modimo.” (Johane 1:18) E bile e re botša le gore Modimo o na le maikwelo. Seo se re botša gore batho ba ka nyamiša Modimo goba ‘ba mo kgahla.’—Diema 11:20; Psalme 78:40, 41.

Dika tša Modimo Tšeo di Kgahlišago. Modimo ga a bebe motho sefahlego go sa šetšwe gore ke wa setšhaba sefe goba setšo sefe. (Ditiro 10:34, 35) E bile ke yo “a gaugelago le yo a šokelago, yo a diegago go galefa, yo a tletšego botho le therešo.” (Ekisodo 34:6, 7) Eupša o na le dika tše dingwe tše nne tše dikgolo tše di kgahlišago kudu.

Matla. Ka ge Jehofa e le “Modimo Ramatlaohle,” o na le matla ao a sa lekanywego le selo ao a a dirišago go phetha merero ya gagwe.—Genesi 17:1

Bohlale. Bohlale bja Modimo bo feta bja batho ka moka. Ke ka baka leo Beibele e rego ke “yo bohlale a nnoši.”—Baroma 16:27.

Toka. Modimo o dula a dira dilo tše dibotse. Ditiro tša gagwe di “phethagetše” e bile go yena ga go na “go hloka toka.”—Doiteronomio 32:4.

Lerato. Beibele e re: “Modimo ke lerato. (1 Johane 4:8) Modimo ga a no re bontšha lerato feela, eupša yena ka boyena ke lerato. Dilo ka moka tše a di dirago, o di dira ka baka la lerato gomme seo se hola rena.

Modimo e ka ba Mogwera wa Gago. Modimo ke Tatago rena wa legodimong yo a re ratago. (Mateo 6:9) Ge e ba re ka mo kwa, re tla ba bagwera ba gagwe. (Psalme 25:14) Ge e le gabotse, Modimo o go mema gore o be mogwera wa gagwe. O nyaka gore o boledišane le yena ka thapelo gomme o ‘lahlele dipelaelo tša gago ka moka go yena, gobane o a go hlokomela.’—1 Petro 5:7; Jakobo 4:8.

Modimo le Jesu Kriste ba Fapana Bjang?

Jesu ga se Modimo. Jesu ga a swane le motho le ge e le ofe. Ka baka la’ng? Ka gobane ke yena a nnoši yo a bopilwego ke Modimo ka go lebanya. Ke ka baka leo Beibele e mmitšago gore ke morwa wa Modimo. (Johane 1:14) Ka morago ga gore Jehofa a bope Jesu, o ile a mo diriša e le “mošomi yo a nago le bokgoni” go bopa dilo tše dingwe ka moka le batho ka moka.—Diema 8:30, 31; Bakolose 1:15, 16.

Jesu Kriste ga sa nka a re ke yena Modimo. Go e na le moo, o itše: “Ke nna moemedi yo a tšwago go [Modimo] gomme yena Yoo o nthomile.” (Johane 7:29) Ge Jesu a be a bolela le yo mongwe wa barutiwa ba gagwe, o ile a bitša Jehofa gore ke “Tate le . . . Tatago lena” le gore ke “Modimo wa ka le . . . Modimo wa lena.” (Johane 20:17) Ka morago ga gore Jesu a hwe, Jehofa o ile a mo tsoša gore a yo phela legodimong, a ba a mo fa le matla a go buša ka letsogong la Gagwe le letona.—Mateo 28:18; Ditiro 2:32, 33.

Jesu Kriste a ka go Thuša go ba Mogwera wa Modimo

Jesu o be a tlile lefaseng go tlo re ruta ka Tatagwe. Jehofa ka boyena o boletše ka Jesu gore: “Yo ke Morwa wa ka yo a rategago; le mo theetšeng.” (Mareka 9:7) Jesu o tseba Modimo go feta motho le ge e le ofe. O itše: “Ga go yo a tsebago yo Tate e lego yena ge e se Morwa, le yo Morwa a ratago go mo utollela yena.”—Luka 10:22.

Jesu o ekiša dika tša Modimo gabotse. Jesu o be a ekiša dika tša Tatagwe moo a bego a ka re: “Yo a bonego nna o bone le Tate.” (Johane 14:9) Tsela yeo Jesu a bego a phela ka yona e ile ya thuša batho gore ba gwerane le Modimo ka go re o be a ekiša dika tša Tatagwe. O ile a re: “Ke nna tsela le therešo le bophelo. Ga go yo a tlago go Tate ge e se ka nna.” (Johane 14:6) O ile a ba a re: ‘Barapedi ba kgonthe ba tla rapela Tate ka moya le ka therešo, gobane ruri Tate o nyaka ba bjalo gore ba mo rapele.’ (Johane 4:23) Nagana feela! Jehofa o nyaka go thuša batho ba go swana le wena bao ba nyakago go tseba nnete ka yena.