GE E BA le wena o hlokofaletšwe ke motho yo o mo ratago, o ka ba o ile wa hlakahlakana maikwelong. O ka ba o ile wa nyama kudu, wa ikwa o lewa ke bodutu e bile o fedile matla. E bile o ka ba o ile wa ikwa o galefile, o ipona molato, gape o boifa. Le gona go ka direga gore o ile wa ikwa o se sa nyaka go phela.

Ga se phošo go nyama goba go lla ge o hlokofaletšwe. Seo se bontšha gore o be o rata motho yoo kudu. Lega go le bjalo, na go na le dilo tšeo di ka go thušago go fokotša bohloko bjoo o bo kwago?

Le ge bohloko bjo o bo kwago bo bonala bo sa fele, go dira dilo tše di latelago go ka go homotša:

IPHE NAKO YA GO LLA

Batho ga ba lle go swana ge ba hwetšwe, e bile nako yeo ba e fetšago ba lla ga e lekane. Eupša taba ya bohlokwa ke gore go lla go ka dira gore o ikwe o le kaone. Vanessa, yoo go boletšwego ka yena pejana o re: “Ka morago ga gore buti wa ka a hlokofale, ke be ke no lla. Ke be ke nyaka go ntšha bohloko.” Sofía, yoo sesi wa gagwe a hlokofetšego go sa letelwa o re: “Ge ke nagana ka seo se diragetšego, ke kwa bohloko kudu. Bohloko bja gona bo swana le bja ge o bula ntho, o ntšha boladu gomme o e hlatswa. Bohloko bja gona bo tsenelela pelong, eupša seo se thuša gore ntho e fole.”

 BOTŠA BA BANGWE KAMOO O IKWAGO KA GONA

Ke nnete gore ka dinako tše dingwe o ka ikwa o nyaka go ba noši. Eupša o ka se kgone go kgotlelela bohloko bja go hwelwa o nnoši. Jared yo a nago le mengwaga e 17, yoo a hlokofaletšwego ke tatagwe, o re: “Ka morago ga gore tate a hlokofale, ke be ke botša ba bangwe ka tsela yeo ke bego ke ikwa ka yona. Go ka direga gore dilo tšeo ke bego ke di bolela di be di sa kwagale, eupša seo se ile sa nthuša.” Janice, yoo go boletšwego ka yena sehlogong sa mathomo le yena o re go bolela go a thuša. O re: “Go botša ba bangwe kamoo ke bego ke ikwa ka gona go be go nkgothatša. E bile seo se ile sa nthuša go kgotlelela le go bona gore ga ke noši.”

AMOGELA THUŠO YA BA BANGWE

Ngaka e nngwe e re: “Ge batho bao ba sa tšwago go hlokofalelwa ba dumelela bagwera le ba leloko gore ba ba thuše ka morago ga lehu, seo gantši se dira gore ba kgone go kgotlelela le go kaonefala ka pela.” Botša bagwera ba gago dilo tšeo o di hlokago, ka gore go ka direga gore ba nyaka go go thuša, eupša ga ba tsebe gore ba go thuše bjang.—Diema 17:17.

ITHEKGE KA MODIMO

Tina o re: “Monna wa ka o ile a hlokofala go sa letelwa ka baka la kankere. Ka ge go be go se sa na motho yo ke bego ke mo ntšhetša sa mafahleng, ke be ke botša Modimo dilo ka moka! Letšatši le lengwe le lengwe ke be ke mo kgopela gore a nthuše go kgotlelela. Modimo o ile a nthuša ka ditsela tše dintši moo ke ilego ka šala ke hloka mantšu.” Tarsha, yo a bego a na le mengwaga e 22 ge mmagwe a hlokofala, o re: “Go bala Beibele letšatši le letšatši go be go nkhomotša. Go be go nthuša gore ke se ke ka dulela go nagana ka seo se diragetšego.”

NAGANA KA NAKO YA GE MODIMO A TLA BE A TSOŠA BAHU

Tina o tšwela pele ka gore: “Ka morago ga gore monna wa ka a hlokofale, taba ya gore Modimo o tlo mo tsoša bahung e be e sa nkhomotše, ka gore ke be ke sa nyaka go ba le yena, barwa ba ka le bona ba be ba nyaka go ba le tatago bona. Eupša ga bjale, ka morago ga mengwaga e mene monna wa ka a hlokofetše, tsogo ya bahu ke yona e nkgothatšago le go nthuša go kgotlelela. Go nagana gore Modimo o tlo tsoša bahu go mpha khutšo ya monagano le lethabo.”

Bohloko bjo o bo kwago bo ka se okobale ka ponyo ya leihlo. Eupša seo se ilego sa diragalela Vanessa se ka go kgothatša. O re: “Mathomong o ka nagana gore bohloko bjo o bo kwago bo ka se kaonefale, eupša ge nako e dutše e eya, bo a kaonefala.”

Gopola gore le ge go se na selo seo se ka tswalelago sekgoba sa motho yoo a hlokofetšego, o sa dutše o ka thabela bophelo. Ka ge Modimo a go rata, a ka go thuša go tšwela pele ka bophelo. E bile e se kgale o tlo tsoša bahu. Modimo o nyaka gore o tle o thabele go phela le motho yoo gape. Ka nako yeo, o ka se sa kwa bohloko bjo o bo kwago gona bjale!