Ge Motho yo o Nyalanego le Yena a Ratana le Motho yo Mongwe
GE MOTHO yo o nyalanego le yena a ratana le motho yo mongwe, o ka kwa okare lefase le ka bulega wa tsena. Ke nnete gore ba bangwe ba ile ba kgona go lebalela balekane ba bona bao ba ilego ba itshola gomme ba lokiša manyalo a bona. * Eupša le ge banyalani bao ba ka lebalelana goba ba kgaogana, taba ke gore molekane yo a se nago molato o tlo no šala a ekwa bohloko ka seo se diragetšego. Molekane yo a se nago molato a ka dira eng gore a kgone go kgotlelela bohloko bjoo?
DITEMANA TŠA BEIBELE TŠEO DI KA GO THUŠAGO
Le ge go radiiwa go le bohloko, batho ba bantši bao ba ilego ba radiiwa ke balekane ba bona, ba ile ba homotšwa ke Beibele. Ba ile ba bona gore Modimo o na le taba le bona le gore o ba kwela bohloko.—Maleaki 2:13-16.
Psalme 94:19 e re: “Ge dikgopolo tša ka tše di mpherekanyago di be di ata ka go nna, dikhomotšo tša gago di ile tša okobatša moya wa ka.”
Bill o re: “Ge ke be ke bala Psalme yeo, ke ile ka bona Jehofa a nkhomotša ka lerato, bjalo ka tate yo a nago le kwelobohloko.”
Psalme 18:25 e re: “Yo a botegago o tla dirišana le yena ka potego.”
Carmen, yoo monna wa gagwe a mo radiilego ka dikgwedi tše dintši, o re: “Monna wa ka o be a ratana le mosadi yo mongwe. Eupša ke ile ka homotšwa ke go tseba gore Jehofa yena a ka se tsoge a ntahlile.”
Bafilipi 4:6, 7 e re: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo . . . ke moka khutšo ya Modimo yeo e fetago kwešišo yohle ya batho e tla diša dipelo tša lena.”
Sasha o re: “Ke be ke bala lengwalo le gantšintši. E bile ka ge ke be ke dula ke rapela Modimo, o be a nthuša go ba le khutšo ya monagano.”
Batho bao go boletšwego ka bona sehlogong se, ka dinako tše dingwe ba ile ba ikwa ba se sa nyaka go phela. Eupša ba ile ba kgopela Jehofa Modimo gore a ba thuše e bile ba bala Beibele gore e ba homotše. Bill o hlalosa taba ye ka gore: “Go tseba gore Modimo o tlo lokiša mathata a a rena nakong e tlago, go ile gwa nthuša go tšwela pele ka bophelo le ge go be go bonagala go sa loke selo. Le ge ka nakwana ke ile ka “sepela molapong wa moriti wa lehu,” Modimo o ile a ba le nna.”—Psalme 23:4, Beibele ya Sepedi.
^ ser. 4 Ge o nyaka thušo ya go bona ge e ba o ka lebalela molekane wa gago yo a go radiilego goba go se bjalo, bala lelokelelo la dihlogo tše di rego, Ge Molekane a sa Botege ka go Phafoga! ya May 8 1999.
You May Also Like
MOROKAMI
Na Modimo o re Kwela Bohloko?
Beibele e re tiišetša gore Modimo o a re bona, o a re kwešiša e bile o re kwela bohloko.
MOROKAMI
Go Tsošološa go Botana Lenyalong
Ge e ba o katanela go phološa lapa la gago ka morago ga bothata bjo bogolo bjo bjalo ka bohlotlolo, o lebane le tlhohlo e kgolo. Eupša o ka atlega!
MOROKAMI
Go Tšwela Pele le Bophelo ka Morago ga Tlhalo
Mo e ka bago batho ka moka bao ba hlalago ba hwetša gore ka morago ba thatafalelwa ke bophelo kudu ka tsela yeo ba bego ba sa e letela. Keletšo e šomago ya Beibele e ka go thuša go lebeletšana le tlhalo ka katlego.
