“Jehofa, ke tla llela thušo go wena go fihlela neng gomme o sa nkwe? Ke tla kgopela tlhakodišo bošorong go fihlela neng gomme o sa ntlhakodiše?” (Habakuku 1:2, 3) Ao ke mantšu a Habakuku, e lego monna wa go loka yoo Modimo a bego a mo rata. Na mantšu a gagwe a bontšha gore o be a se na tumelo? Aowa, ga go bjalo! Modimo o ile a kgonthišetša Habakuku gore o beile nako e swanetšego ya go tlo fediša tlaišego.​—Habakuku 2:2, 3.

Ge wena goba motho yo o mo ratago a tlaišega, go bonolo go ipotšiša gore ke ka baka la eng Modimo a sa mo fodiše ka pela. E bile go bonolo go ipotša gore nkabe a šetše a dirile se sengwe. Eupša Beibele yona e re: “Jehofa ga a diege mabapi le kholofetšo ya gagwe, go etša ge batho ba bangwe ba go tšea e le go diega, eupša ga a le felele pelo ka gobane ga a rate gore go fedišwe le ge e le mang, eupša o rata gore bohle ba fihlelele boitsholo.”​—2 Petro 3:9.

E se kgale! Jesu o ile a bolela gore go na le moloko wo o tlo bonago ditiragalo tše di makatšago tšeo di bontšhago gore re phela mehleng ya bofelo bja “tshepedišo [ye] ya dilo.” (Mateo 24:3-42) Boporofeta bja Jesu bjo bo phethagalago lehono bo bontšha gore Modimo o kgauswi le go fediša tlaišego. *

Modimo o tlo fediša bjang tlaišego ka moka? Ge Jesu a be a le mo lefaseng, o ile a bontšha gore Modimo o na le matla a go thuša batho bao ba tlaišegago. Nagana ka mehlala e latelago.

Dikotsi tša Tlhago: Ge Jesu le baapostola ba gagwe ba be ba tšere leeto ka sekepe Lewatleng la Galilea, go ile gwa tsoga ledimo le legolo leo le ilego la nyaka le nweletša sekepe. Eupša Jesu o ile a bontšha gore yena le Tatagwe ba kgona go laola dikotsi tša tlhago. (Bakolose 1:15, 16) Jesu o ile a fo re go lewatle: “Homola o re tuu!” Go ile gwa direga eng? “Phefo ya okobala, gwa homola gwa re tuu.”​—Mareka 4:35-39.

Bolwetši: Jesu o be a tsebja ka go kgona go fodiša difofu le dihlotša, le bao ba bego ba tlaišwa ke bolwetši bja go wa, lephera goba mohuta le ge e le ofe wa bolwetši. Beibele e re: “A fodiša bohle bao ba bego ba sa ipshine.”​—Mateo 4:23, 24; 8:16; 11:2-5.

Tlhaelelo ya Dijo: Jesu o ile a diriša matla ao Tatagwe a bego a mo file ona go oketša dijo. Beibele e bolela ka ditiragalo tše pedi tša ge a be a ruta batho ka Modimo tšeo go tšona a ilego a fepa ba batho bantši.​—Mateo 14:14-21; 15:32-38.

Lehu: Jesu o ile a tsoša batho ba bararo bahung, e lego seo se bontšhago gore Jehofa o na le matla a go fediša lehu. Yo mongwe wa batho bao Jesu a ilego a ba tsoša o be a šetše a na le matšatši a mane a hwile.​—Mareka 5:35-42; Luka 7:11-16; Johane 11:3-44.