Nagana ka mohlolo o mongwe wa tlhago, e lego bana ba mafahla. Mafahla a kwešišana ka tsela yeo re ka se e kwešišego. Nancy, e lego molaodi wa Twin Studies Center, yoo le yena e lego lefahla, o re: “[Mafahla a mangwe] a kgona go kwešišana gabotse ntle le gore yo mongwe a bolele dilo tše dintši.” Mosadi yo mongwe o hlalositše tsela yeo a kwešišanago le lefahla la gagwe ka yona ka gore: “Re tsebana kudu.”

Go tla bjang gore mafahla a kwešišane ka tsela ye? Banyakišiši ba dumela gore seo se bakwa ke tsela yeo mafahla a godišwago ka yona le moo a golelago gona, eupša ba re ka tlhago mafahla a a kwešišana.

NAGANA KA TABA ŠE: Na Modimo, yoo a kgonago go dira gore mafahla a kwešišane gabotse, a ka palelwa e ke gore re kwešiša go feta motho le ge e le ofe? Aowa. Ke ka baka leo mopsalme Dafida a boletšego gore: “O dirile gore ke dule ke širetše ka mpeng ya mma. Marapo a ka a be a sa utega go wena ge ke be ke bopega ka sephiring. . . . Mahlo a gago a mpone ke sa thoma go bopega, gomme ka pukung ya gago go be go ngwadilwe [ka seo].” (Psalme 139:13, 15, 16) Modimo ke yena feela a kwešišago kamoo re bopegilego ka gona. O tseba le dilo ka moka tšeo di re diragaletšego bophelong tšeo di dirago gore re be ka tsela yeo re lego ka yona. Taba ya gore Modimo o re tseba gabotse le go kwešiša kamoo re bopegilego ka gona, e bontšha gore o kwešiša selo se sengwe le se sengwe ka rena.

Dafida o ile a rapela Modimo a re: “Wena Jehofa, o mphetlekile gomme o a ntseba. Wena o tseba ge ke dula fase le ge ke ema. O etše hloko dikgopolo tša ka di sa le kgole.” (Psalme 139:1, 2, 4) Go oketša moo, Jehofa o tseba kamoo re ikwago ka gona, o tseba le dilo ka moka tšeo re di naganago. (1 Dikoronika 28:9; 1 Samuele 16:6, 7) Ditemana tše di re ruta eng ka Modimo?

Ditemana tše di re ruta gore le ge re ka rapela Modimo ka setu, o kgona go bona seo re se dirago le go kwešiša gore ke ka baka la eng re dira bjalo. Le ge re fela re dira diphošo, o a kwešiša gore re nyaka go dira dilo tše dibotse. Ka ge Modimo e le yena a dirilego gore re kgone go bontšha lerato, o a thaba ge a bona dilo tše dibotse tšeo re di naganago le tšeo re nyakago go di dira.​—1 Johane 4:7-10.

 Seo Mangwalo a re botšago sona

• “Mahlo a Jehofa a lebeletše baloki gomme ditsebe tša gagwe di kwa ditopo [goba, dithapelo] tša bona.”​—1 PETRO 3:12.

• Modimo o re: “Ke tla dira gore o be le temogo gomme ka go ruta tsela yeo o swanetšego go sepela ka yona. Ke tla nea keletšo leihlo la ka le le go wena.”​—PSALME 32:8.

Na go tseba gore Modimo o kwešiša maemo a rena go ka re thuša go kgotlelela mathata? Ee. Ekwa seo se ilego sa diragalela Anna, wa Nigeria. O re: “Maemo a ka a boima a be a dira gore ke ipotšiše gore ke phelela eng. Ke be ke le mohlologadi gomme ke hlokomela morwedi wa ka yo a bego a le sepetlele ka baka la bolwetši bjo šoro bjo bo dirago gore go dule go na le seela ka bjokong (hydrocephalus). Ka nako yeo go be go hweditšwe gore ke na le kankere ya letswele gomme ke be ke swanetše go dira ophareišene le kalafo yeo e sego bose ya kankere (chemotherapy) le (radiotherapy). Go be go se bonolo go ba sepetlele ka nako e tee le morwedi wa ka.”

Anna o ile a thušwa ke eng go kgotlelela? O re: “Ke ile ka naganišiša ka mangwalo a go swana le la Bafilipi 4:6, 7, leo le rego ‘khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano.’ Nako le nako ge ke be ke nagana ka lengwalo le, ke be ke ekwa gore Jehofa o na le nna, ka ge ke be ke tseba gore o nkwešiša go feta kamoo nna ke ikwešišago ka gona. Dihlatse tše dingwe tša Jehofa le tšona di ile tša nkgothatša kudu.

“Le ge e le gore ga se ke fole, eupša nna le morwedi wa ka re ikwa re le kaone. Ka ge re ithekgile ka Jehofa, re ithutile gore re se ke ra nagana ka dilo tšeo di fošagetšego ge re na le mathata. Jakobo 5:11 e re: ‘Bao ba kgotleletšego re re ba thabile. Le kwele ka kgotlelelo ya Jobo gomme le bone pheletšo yeo Jehofa a e neilego, gore Jehofa o na le lerato le legolo e bile ke yo a gaugelago.’” Jehofa o be a kwešiša maemo a Jobo gabotse, ka gona, le rena re ka kgodišega gore o kwešiša mathata a rena.