Go kwa Melao ya Modimo go ka go Thuša Bjang?
Moporofeta Moshe o ile a re ge e ba re ekwa melao ya Modimo, Modimo o tla re šegofatša goba go re direla dilo tše dibotse. (Doiteronomio 10:13; 11:27) Ga re kwe melao ya Modimo feela ka gobane re tšhaba gore o tlo re otla. Go tseba gore Modimo yo re mo rapelago ke Modimo wa mohuta mang, go tlo re thuša gore re kwe melao ya gagwe ka gobane re mo rata, gomme gwa re thuša le gore re se dire dilo tšeo di tlago go mo nyamiša. Johane wa Pele 5:3 e re: “Se ke seo lerato la Modimo le se bolelago, gore re boloke ditaelo tša gagwe.”
Eupša go kwa melao ya Modimo go ka re hola bjang? Go ka re hola ka ditsela tše tše pedi:
1. GO KWA MELAO YA MODIMO GO TLO RE DIRA GORE RE BE BOHLALE
“Nna, Jehofa, ke Modimo wa lena, Yo a le rutago gore le holege, [le] Yo a le sepedišago tseleng yeo le swanetšego go sepela ka yona.”—JESAYA 48:17.
Jehofa Modimo yo a re bopilego, o re tseba gabotse e bile o a re hlahla. Ge e ba re nyaka gore dilo tšeo a re rutago tšona di re thuše go dira diphetho tše dibotse, re swanetše go ithuta ka Mangwalong a gagwe a Makgethwa go tseba gore o nyaka re dira eng, gomme re dire dilo tšeo.
2. GO KWA MELAO YA MODIMO GO TLO RE DIRA GORE RE THABE
“Go thaba bao ba kwago lentšu la Modimo gomme ba le boloka!”—LUKA 11:28.
Lehono batho ba bantši bao ba phelago ka melao ya Modimo ba thabile kudu. Ka mohlala, nagana ka monna yo mongwe wa kua Spain, yoo a bego a na le bothata bja go kwatakwata ka pela, e bile a swara batho ba bangwe gampe, go akaretša le mosadi wa gagwe. Ka letšatši le lengwe, o ile a bala ka seo moporofeta Moshe a ilego a se bolela ka Mangwalong a Makgethwa, gore Josefa morwa wa Jakobo o be a le bonolo, a sa kwatekwate ka pela. Josefa o ile a rekišwa gore e be lekgoba, gomme a golegwa ka go hloka toka. Eupša o ile a no tšwela pele a le botho, a na le khutšo e bile e le motho yo a lebalelago. (Genesi, dikgaolo 37-45) Monna yoo wa kua Spain o re: “Go nagana ka mohlala wa Josefa go nthušitše gore ke be motho yo bonolo, yo botho le yo a nago le boitshwaro. Se se ntirile gore ke be motho yo a thabilego kudu.”
Mangwalo a Makgethwa a re ruta gore re sware batho ba bangwe bjang? A re kweng gore re ka dira seo bjang sehlogong se se latelago.
You May Also Like
DIPOTŠIŠO TŠA BEIBELE DI A ARABJA
Na Beibele e ka Nthuša go ba le Lapa Leo le Thabilego?
Keletšo e bohlale yeo e tšwago ka Beibeleng e šetše e thušitše banna le basadi ba dimilione go ba le lethabo ka gae.
