Modimo ga a kgetholle, e bile o nyaka go direla batho ka moka dilo tše dibotse.

Go Genesi 12:3 Modimo o ile a tshepiša moporofeta Aborahama gore: “Malapa ka moka a mo lefaseng a tla šegofatšwa ka wena.”

Seo re ithutago sona. Modimo o re rata kudu, e bile o nyaka go direla malapa ka moka ao a kwago melao ya gagwe dilo tše dibotse, e ka ba banna, basadi le bana.

Modimo o a gaugela, gomme bao ba nyakago go mo tseba, o ba thuša gore ba mo tsebe.

Ka ge Modimo a na le matla a magolo kudu, o ile a fa moporofeta Moshe matla gore a kgone go dira mehlolo e megolo. Eupša Moshe o ile a rapela Modimo ka gore: “Hle ntsebiše ditsela tša gago gore ke go tsebe, e le gore mahlo a gago a tle a ntebelele ka botho.” (Ekisodo 33:13) Modimo o ile a thaba ge a ekwa Moshe a mo kgopela seo, gomme o ile mo thuša gore a mo tsebe gabotse. A mo thuša le gore a kwešiše tsela yeo a dirago dilo ka yona le gore ke Modimo wa mohuta mang. Ka mohlala, Moshe o ile a bona gore Modimo yo a bopilego dilo ka moka, ke “Modimo yo a gaugelago le yo a šokelago.”—Ekisodo 34:6, 7.

Seo re ithutago sona. Modimo o nyaka go thuša batho ka moka bao ba šomago ka thata gore ba mo tsebe, e ka ba banna, basadi le bana. Ka Mangwalong a gagwe a Makgethwa, o re ruta gore re ka mo rapela bjang, a re botša gore o ikwa bjang ka rena le gore o tla re direla eng ge re ekwa melao ya gagwe.

Re ka tla ra hwetša dilo ka moka tše dibotse tšeo Modimo a tlago go re direla tšona, ge re ka ithuta ka Jesu le dilo tšeo a ilego a di dira le go di ruta.

Ka Mangwalong a Makgethwa, re ka ithuta dilo tše dintši ka bophelo bja Jesu le dilo tšeo a bego a di ruta batho. Modimo o ile a nea Jesu matla a go dira mehlolo ya go makatša, ya go swana le go fodiša difofu, difoa le digole. O ile a ba a tsoša le bahu mabitleng. Ge Jesu a be a dira mehlolo ye, o be a bontšha dilo tše dibotse tšeo Modimo a tlago go re direla tšona lefaseng le lefsa. O re botša seo motho yo mongwe le yo mongwe a swanetšego go se dira gore a tle a hwetše dilo tše. O itše: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.”—Johane 17:3.

Jesu o be a kwela batho bohloko, a ba rata e bile a le botho. Banna le basadi, bana le batho ba bagolo, ba ile ba kgeregela go yena ge a be a ba laletša gore: “[Ithuteng] go nna, gobane ke wa moya o boleta e bile ke wa pelo e ikokobeditšego gomme le tla hweletša meoya ya lena tapologo.” (Mateo 11:29) Jesu o be a fapana le batho ba mehleng ya gagwe ka gore bona ba be ba swara basadi gampe. Yena o be a hlompha basadi, a ba swara ka botho le seriti.

Seo re ithutago sona. Jesu o be a rata batho kudu, gomme o re beetše mohlala o mobotse wa gore le rena re swanetše go swarana bjang.

Mangwalo a Makgethwa a ruta gore “ge e le gabotse go rena Modimo ke o tee” le gore Jesu Kriste e be e no ba moromiwa wa Modimo. (1 Bakorinthe 8:6) Jesu ka boyena o ile a bolela gore Modimo o mo feta ka bogolo le gore o ile a mo roma mo lefaseng.—Johane 11:41, 42; 14:28. *