Batho ba bangwe ba ipotšiša ge e ba molaetša wa Modimo woo o lego ka Mangwalong a Makgethwa o fetošitšwe. Moporofeta Jesaya o ile a re Lentšu la Modimo le tla “dula le le gona go iša mehleng ya neng le neng.” (Jesaya 40:8) Eupša ke’ng seo se ka dirago gore re tshepe gore molaetša wo o lego ka Mangwalong a Makgethwa e sa le wona wola Modimo a o boletšego go tloga mathomong?

Modimo o na le matla a go šireletša Lentšu la gagwe gore le dule le le gona, le gore batho ba se ke ba le fetoša. Kgale ge batho ba be ba ngwalolla molaetša wa Modimo woo lehono o lego ka Mangwalong a Makgethwa, ba be ba bala tlhaka e nngwe le e nngwe go netefatša gore ga ba oketše, go fetoša goba go ntšha seo se ngwadilwego. Eupša ka ge ka moka ga rena re dira diphošo, le batho bao ba bego ba ngwalolla Mangwalo a Makgethwa, go na le moo ba bego ba fela ba dira diphošo gona.

Go na le dikopi tše dikete tša dingwalwa tša kgale tša Mangwalo a Makgethwa. Ge dikopi tšeo di bapetšwa, go ba bonolo go bona gore ke dife tšeo di nago le diphošo. Ge o nyaka go tseba ka mo go oketšegilego ka taba ye, bala sehlogo seo se rego, “Na Beibele e Fetošitšwe,”? go jw.org/nso

Ka mohlala, nagana ka dingwalwa tša kgale tšeo di bitšwago Mangwalo a go Phuthwa a Lewatle le le Hwilego, tšeo Maaraba a mangwe ao a bitšwago Ma-bedouins a ilego a di hwetša ka maweng ao a lego kgauswi le Lewatle le le Hwilego ka ngwaga wa 1947. Dingwalwa tše, di na le dikarolo tša Mangwalo a Makgethwa tšeo di fetago mengwaga e 2000 di le gona. Ditsebi tše dingwe di ile tša bapetša dingwalwa tše tša kgale le Mangwalo a Makgethwa ao re a balago lehono. Di ile tša hwetša’ng?

Di ile tša hwetša gore molaetša wa Modimo wo re o balago ka Mangwalong a Makgethwa lehono, o swana le woo o lego ka dingwalweng tšela tša kgale. * Se se re bontšha gore molaetša wo re o balago ka Mangwalong a Makgethwa lehono, e sa le wona wola Modimo a o boletšego go tloga mathomong. Ruri re ka tshepa gore Modimo o ile a šireletša molaetša wa gagwe gore o se ke wa fetošwa le lehono.

Ka baka leo, ge re bala molaetša wo o lego ka Mangwalong a Makgethwa, re ka tshepa ka dipelo tša rena ka moka gore ga se wa fetošwa. Re sa naganne ka se, a re boneng gore re ka ithuta’ng ka Modimo go baporofeta ba gagwe. Ekwa sehlogo se se latelago.