Ke belegetšwe Ciudad Mante, e lego karolo e botse ya naga ya Tamaulipas, Mexico. Ka kakaretšo, badudi ba toropo yeo ke ba botho e bile ba rata go nea. Sa go nyamiša ke gore, lefelo leo e be e le le kotsi kudu ka ge go be go tletše dihlopha tša bosenyi.

Ke be ke le ngwana wa bobedi go bašemane ba bane. Batswadi ba ka ba ile ba ntumelela gore ke kolobetšwe ka Kerekeng ya Katholika gomme ka morago ka ba setho sa khwaere ya kereke. Ke be ke nyaka go thabiša Modimo ka lebaka la gore ke be ke tšhaba go ahlolwa le go fišwa ka mo go sa felego mollong wa dihele.

Ge ke be ke na le mengwaga e mehlano, tate o ile a tloga gae. Seo se ile sa nnyamiša gomme ka hloka kholofelo. Ke be ke sa kwešiše gore ke ka baka la’ng a re lahlile mola re be re mo rata kudu. Mma o be a swanelwa ke go šoma diiri tše dintši e le gore a kgone go re hlokomela.

Ke ile ka dira boemo bjoo sehlare sa ntšhirela ka se ye sekolong eupša ka gwerana le bana bao ba mphetago. Ba ile ba nthuta go rogana, go kgoga, go utswa le go lwa ka difeisi. Ka ge ke be ke rata go laola ba bangwe, ke ile ka ithuta ntwa ya matswele, go lwa ka go kateletšana fase (wrestling), karate, le go kgona go diriša dibetša. Ke ile ka fetoga mofsa yo šoro. Gantši ke be ke elwa ka dithunya gomme ka makga a mantši ke be ke feleletša ke le ka gare ga bodiba bja madi gomme ke tlogetšwe go naganwa gore ke hlokofetše. Ruri mma o be a nyamišwa ke go phela a nkhwetša ke rapaletše fase gomme a swanelwa ke go ntopa le go nkitimišetša sepetlele!

Ge ke be ke na le mengwaga e 16, mogwera wa ka wa go tloga bjaneng yo a bitšwago Jorge o ile a re etela. O ile a re botša gore ke yena Hlatse ya Jehofa le gore o be a nyaka go re botša molaetša o bohlokwa. O ile a thoma go re hlalosetša ka ditumelo tša gagwe a diriša Beibele. E be e le la mathomo ke e bala le gona ke be ke thabetše go tseba ka leina la Modimo le merero ya gagwe. Jorge o ile a ithaopela go ithuta Beibele le rena. Re ile ra dumela.

Ke ile ka imologa kudu ge ke be ke ithuta gore thuto ya mollo wa dihele ga e tšwe ka Beibeleng. (Psalme 146:4; Mmoledi 9:5) Ka morago ga gore ke ithute seo, ke ile ka se sa boifa Modimo o šoro. Go e na le moo, ke  ile ka thoma go mmona e le Tate yo lerato yo a nyakelago bana ba gagwe se se kaone.

Ge ke dutše ke dira tšwelopele thutong ya ka ya Beibele, ke ile ka bona go swanetše gore ke fetoše bophelo bja ka. Ke ile ka swanelwa ke go ba le boikokobetšo le go kgaotša bošoro. Ke thušitšwe ke keletšo yeo e hwetšwago go 1 Bakorinthe 15:33. E re: “Ditlwaelano tše mpe di senya mekgwa e holago.” Ke ile ka lemoga gore ge e ba ke nyaka go dira diphetogo, ke swanetše go kgaotša go gwerana le batho bao ba nago le khuetšo e mpe bophelong bja ka. Ka gona, ke ile ka tlogela bagwera ba babe gomme ka gwerana le ditho tša phuthego ya therešo ya Bokriste e lego batho bao ba sa rarollego diphapano ka go lwa eupša ba diriša melao ya motheo ya Beibele.

Karolo e nngwe ya Beibele yeo e nkgomilego kudu ke Baroma 12:17-19. E re: “Le se ke la bušetša bobe ka bobe go motho. . . . Ge e ba go kgonega, go fihla moo go ithekgilego ka lena, ebang le khutšo le batho bohle. . . . Le se ke la itefeletša, . . . gobane go ngwadilwe gwa thwe: ‘“Tefetšo ke ya ka; ke tla lefetša, go re’alo Jehofa.’” Ke ile ka amogela gore Jehofa o tla fediša go hloka toka ka tsela ya gagwe le ka nako ya gagwe. Ganyenyane-ganyenyane, ke ile ka tlogela go ba yo šoro.

Nka se tsoge ke lebetše seo se ilego sa direga mantšiboa a mangwe ge ke be ke boela gae. Bafsa ba sehlopha se sengwe sa disenyi ba ile ba ntlhasela ke moka moetapele wa sona a mpetha mokokotlo ke moka a goeletša ka gore, “Itwele!” Ka yona nako yeo, ke ile ka rapela thapelo e kopana ka kgopela Jehofa gore a nthuše go kgotlelela tlaišo. Le ge ke ile ka ikwa ke na le kganyogo e matla ya go itefeletša, ke ile ka kgona go fo itshepelela. Letšatšing le le latelago ke ile ka kopana le moetapele yoo wa sehlopha a nnoši. Ke ile ka befelwa gomme ka nyaka go itefeletša, eupša ka rapela Jehofa gape ka setu, ka mo kgopela gore a nthuše gore ke kgone go itshwara. Ke ile ka makatšwa ke gore mofsa yoo o ile a tla go nna ka go ntebanya gomme a re: “Ke kgopela o ntebalele ka seo se diregilego maabane bošego. Therešo ke gore, ke nyaka go swana le wena. Ke nyaka go ithuta Beibele.” Ruri ke ile ka leboga gore ke ile ka kgona go laola kgalefo ya ka! Ke moka ke ile ka thoma go ithuta Beibele le yena.

Sa go nyamiša ke gore lapa lešo ga se la ka la tšwela pele ka thuto ya Beibele ka nako yeo. Lega go le bjalo, ke ile ka phetha ka gore ke tšwele pele ke ithuta gomme ke se ke ka dumelela motho le ge e le ofe goba selo le ge e le sefe se nkgogela morago. Ke be ke tseba gore go kopanela ka mehla le batho ba Modimo go tla nthuša go fola dikgobalo tša maikwelong le go nnea lapa leo ke le hlokago. Ke ile ka dira tšwelopele gomme ka 1991, ka kolobetšwa go ba Hlatse ya Jehofa.

Ke be ke dula ke galefile, ke laola bangwe e bile ke le šoro. Eupša Lentšu la Modimo le fetotše bophelo bja ka ka mo go feletšego. Ga bjale ke boledišana le batho ka moka bao ba theetšago ka molaetša wa khutšo wa Beibele. Mengwageng e fetilego e 23, ke bile le tokelo ya go hlankela ke le mmoledi wa ditaba tše dibotse wa nako e tletšego.

Ke ile ka šoma ke le moithaopi wa nakwana ofising ya lekala ya Dihlatse tša Jehofa kua Mexico. Ge ke le moo, ke ile ka kopana le Claudia e lego kgarebe ya Mokriste e mafolofolo gomme ra nyalana ka 1999. Ruri ke leboga Jehofa gakaakang ge a ntšhegofaditše ka mothuši yo yo a botegago!

Re hlanketše mmogo phuthegong ya Polelo ya Diatla ya Mexico gomme ra thuša batho ba difoa go ithuta ka Jehofa. Ka morago, re ile ra laletšwa go ya nageng ya Belize gomme ra ruta batho ba moo Beibele. Le ge re sa phele bophelo bja manobonobo lefelong le, re na le dilo ka moka tšeo re di hlokago gore re thabe. Ga re itshole le gatee.

Ge nako e dutše e eya, mma o ile a ithuta Beibele gape gomme a kolobetšwa. Ga bjale buti wa ka, mosadi wa gagwe le bana ba bona ke Dihlatse tša Jehofa. Ba bangwe ba bagwera baka bao ke ilego ka ithuta Beibele le bona ga bjale ba hlankela Jehofa.

Ka manyami, ba bangwe ba lapa lešo ba ile ba hlokofala ka baka la gore ga se ba fetoša maphelo a bona a šoro. Ga go pelaelo gore le nna nkabe ke feleleditše ke hlokofetše go swana le bona ge nkabe ke ile ka tšwela pele ka tsela yona yeo. Ke leboga Jehofa gore o nkgogetše go yena le go barapedi ba gagwe, bao ka botho le ka go se mphelele pelo ba ilego ba nthuta go diriša melao ya motheo ya Beibele bophelong bja ka.