HLAHLOBA TSEBO YA GAGO

Swaya mantšu a latelago ka therešo goba maaka.

THEREŠO MAAKA

1. Dihlatse tša Jehofa ke Bakriste.

2. Dihlatse tša Jehofa di dumela gore lefase le bopilwe ka matšatši a tshelelago a diiri tše 24.

3. Dihlatse tša Jehofa di gana kalafo.

4. Dihlatse tša Jehofa di amogela Beibele e feletše.

5. Dihlatse tša Jehofa di diriša feela Beibele yeo e fetoletšwego ke tšona.

6. Dihlatse tša Jehofa di fetošitše Beibele ya tšona gore e dumelelane le ditumelo tša tšona.

7. Dihlatse tša Jehofa di phema go akaretšwa ditabeng tša setšhaba.

8. Dihlatse tša Jehofa di nyatša batho ba madumedi a mangwe.

Gore o hwetše dikarabo, bala matlakala a latelago.

1.  1 THEREŠO. Re leka go latela kgauswi dithuto tša Jesu Kriste le boitshwaro bja gagwe. (1 Petro 2:21) Lega go le bjalo, re fapana le madumedi a mangwe ao a bitšwago a Bokriste ka ditsela tše dintši. Ka mohlala, re hweditše gore Beibele e ruta gore Jesu ke Morwa wa Modimo; ga se karolo ya Boraro Botee. (Mareka 12:29) Ga re dumele taba ya gore moya wa motho ga o hwe goba gore Mangwalo a re Modimo o tlaiša batho diheleng ka mo go sa felego. Le gona ga re dumele taba ya gore bao ba etelelago pele bodumeding ba swanetše go bitšwa ka direto tšeo di ba phagamišago.—Mmoledi 9:5; Hesekiele 18:4; Mateo 23:8-10.

2. 2 MAAKA. Re dumela gore Modimo o bopile dilo ka moka. Eupša ga re dumelelane le batho ba bantši bao ba dumelago gore lefase le bopilwe ka matšatši a tshelelago a diiri tše 24. Ka baka la’ng? Ka gobane dikgopolo tše dintši tša batho bao ba dumelago seo di thulana le seo Beibele e se bolelago. Ka mohlala, ba bangwe ba dumela gore matšatši a tshelelago a tlholo e be e le matšatši a kgonthe a diiri tše 24. Eupša lentšu “letšatši” ka Beibeleng le ka bolela nako e telele kudu. (Genesi 2:4; Psalme 90:4) Le gona, batho ba bangwe bao ba dumelago gore lefase le bopilwe ka matšatši a tshelelago a diiri tše 24 ba bile ba ruta gore lefase le na le mengwaga e dikete tše sego kae le bopilwe. Lega go le bjalo, Beibele e bontšha gore lefase le legohle di be di dutše di le gona le pele ga matšatši a tshelelago a tlholo. 1—Genesi 1:1.

3. 3 MAAKA. Re amogela kalafo. Ge e le gabotse, go swana le Mokriste wa lekgolong la pele la nywaga yo a bitšwago Luka, ba bangwe ba rena ke dingaka. (Bakolose 4:14) Lega go le bjalo, re gana kalafo e nngwe le e nngwe yeo e thulanago le melao ya motheo ya Beibele. Ka mohlala, re gana tšhelo ya madi ka gobane Beibele e ganetša batho go ja madi.—Ditiro 15:20, 28, 29.

   Lega go le bjalo, re nyakela rena le ba malapa a rena kalafo e kaonekaone yeo e hwetšagalago. Ge e le gabotse, mekgwa yeo e seketšago madi yeo e diretšwego go thuša balwetši ba Dihlatse ga bjale e dirišetšwa go hola batho ka moka. Dinageng tše dintši, ga bjale molwetši le ge e le ofe a ka kgetha go phema dikotsi tšeo di tlišwago ke go tšhelwa madi tše bjalo ka malwetši ao a lego mading, mathata a tshepedišo ya mmele ya go itwela malwetšing gotee le diphošo tšeo di dirwago ke batho.

4. 4 THEREŠO. Re dumela gore Beibele ka moka e ‘buduletšwe ke Modimo gomme e a hola.’ (2 Timotheo 3:16) Seo se akaretša Testamente ya Kgale le Testamente e Mpsha, go etša ge gantši di bitšwa bjalo. Gantši re bitša dikarolo tšeo tša Beibele gore ke Mangwalo a Seheberu le Mangwalo a Bakriste a Segerika. Ka tsela ye, re phema go fetišetša kgopolo ya gore dikarolo tše dingwe tša ka Beibeleng di fetilwe ke nako goba ga di bohlokwa.

5.  5 MAAKA. Re diriša diphetolelo tše di fapafapanego tša Beibele ge re dutše re ithuta. Lega go le bjalo, re rata go diriša Beibele ya Phetolelo ya Lefase le Lefsa ya Mangwalo a Makgethwa malemeng ao e hwetšagalago ka ona, ka baka la go diriša ga yona leina la Modimo, go nepagala ga yona le go kwagala ga yona. Bona tsela yeo e dirišago leina la Modimo e lego Jehofa. Matsenong a e nngwe ya diphetolelo tša Beibele, go na le lelokelelo la maina a batho ba 79 bao ba ilego ba tšea karolo go tšweletšeng phetolelo yeo. Eupša yona Beibeleng yeo, go ntšhitšwe leina la Mongwadi wa yona—Jehofa Modimo! Go fapana le Dibeibele tše dingwe, Phetolelo ya Lefase le Lefsa e bušeditše leina la Modimo ditemaneng tše dikete moo le bego le tšwelela mathomong. 2

6. 6 MAAKA. Ge re be re hwetša gore ditumelo tša rena di be di sa dumelelane ka mo go feletšego le Beibele, re ile ra fetoša kwešišo ya rena. Nako e telele pele ga ge re ka thoma go tšweletša Phetolelo ya Lefase le Lefsa ya Mangwalo a Makgethwa ka 1950, re dirišitše phetolelo le ge e le efe yeo e bego e hwetšagala gomme ra dira gore ditumelo tša rena di sepedišane le Beibele.

7. 7 MAAKA. Go bolela ga rena ka Beibele go thuša batho ba bantši. Re thušitše batho ba bantši go fenya go lemalela dilo tše kotsi, tše bjalo ka go diriša bjala le dihlaretagi gampe. Diklase tša rena di thuša batho ba dikete lefaseng ka bophara go ithuta go bala le go ngwala. Gape ge go tšwelela dikotsi re thuša Dihlatse le batho bao e sego Dihlatse. Dinakong tše bjalo re leka go thuša bao ba nyakago thekgo maikwelong le moyeng. 3

8. 8 MAAKA. Re latela keletšo ya Beibele ya gore re “hlomphe motho yo mongwe le yo mongwe”—go sa šetšwe ditumelo tša gagwe tša bodumedi. (1 Petro 2:17, Today’s English Version) Ka mohlala, le ge dinageng tše dingwe re le ba diketekete, ga re leke go gapeletša boradipolotiki goba bahlami ba melao gore ba šitiše goba ba thibele seo madumedi a mangwe a se dirago. Le gona ga re gapeletše mmušo gore o hlame melao ya gore batho ka moka ba phele go swana le rena le go dumela seo re se dumelago. Go e na le moo, re swara madumedi a mangwe ka tsela yeo re letetšego gore a re sware ka yona.—Mateo 7:12.

Sehlogo se se swere ditaba tše di tšerwego Wepesaeteng ya rena ya semmušo ya jw.org/nso. Go ithuta ka mo go oketšegilego, eya go MABAPI LE RENA › DIPOTŠIŠO TŠEO DI BOTŠIŠWAGO KUDU.