BOLWETŠI BJO BO SA FOLEGO GOBA BOGOLE DI KA THATAFALETŠA MOTHO BOPHELO. Monna yo a bitšwago Ulf yoo peleng a bego a phetše gabotse mmeleng gomme ka morago a golofala o itše: “Ke ile ka gateletšega kudu monaganong. Ke be ke se sa na matla . . . ke ikwa ‘ke se na mohola. ’”

Seo se ilego sa diragalela Ulf se re gopotša gore ga go na motho yo a nago le matla a go laola go phela gabotse mmeleng. Lega go le bjalo, re ka itlhokomela go fihla bokgoleng bjo itšego gore re phele gabotse mmeleng. Eupša go thwe’ng ge e ba re thoma go lwala kudu? Na seo se swanetše go dira gore re se ke ra thaba? Le gatee. A re boneng gore re tla thušega bjang. Sa pele, a re ithuteng ka melao ya motheo yeo e ka re thušago gore re phele gabotse mmeleng.

EBA “YO A LEKANETŠEGO MEKGWENG.” (1 Timotheo 3:2, 11) Go ja kudu le go nwa kudu go ka se dire gore re phele gabotse mmeleng, e bile go a tura! Beibele e re: “O se ke wa ba gare ga bao ba nwago beine kudu, gare ga bao ba jago nama ka bojato. Ka gobane letagwa le sejagobe ba tla diila.”—Diema 23:20, 21.

O SE KE WA ŠILAFATŠA MMELE WA GAGO. Beibele e re: “A re itlhwekišeng ditšhila tšohle tša nama le tša moya.” (2 Bakorinthe 7:1) Batho ba šilafatša mebele ya bona ge ba kgoga goba ba enwa bjala kudu goba go diriša dihlaretagi. Ka mohlala, Mafelo a Taolo le Thibelo ya Malwetši a United States a re “[go kgoga] go dira gore motho a lwale le go golofala e bile go gobatša mo e ka bago karolo e nngwe le e nngwe ya mmele.”

TŠEA MMELE WA GAGO LE BOPHELO BJA GAGO E LE DIMPHO TŠA BOHLOKWA KUDU. Beibele e re: “Gobane ka yena [Modimo] re na le bophelo, re a sepela e bile re gona.” (Ditiro 17:28) Go tšea bophelo bo le bohlokwa go dira gore re se ke ra ipea kotsing go sa hlokagale, e ka ba ge re le mošomong, re otlela goba ge re kgetha boithabišo. Boithabišo bja nakwana ga bo na mohola.

LWANTŠHA MAIKWELO AO A FOŠAGETŠEGO. Monagano wa gago o dirišana le mmele wa gago. Ka gona, phema go belaela go sa hlokagale, go galefa kudu, go ba le lehufa le maikwelo a mangwe ao a ka  go gobatšago. Psalme 37:8 e re: “Lesa go galefa gomme o tlogele go befelwa.” Gape Beibele e re: “Le se ke la belaela ka letšatši le le latelago, gobane letšatši le le latelago le tla ba le dipelaelo tša lona.”—Mateo 6:34.

LEKA GO DULA O NAGANA KA DILO TŠE DIBOTSE. Diema 14:30 e re: “Pelo e thabilego e phediša mmele.” Gape Beibele e re: “Pelo e thabilego e etša sehlare se se fodišago.” (Diema 17:22) Le boramahlale ba thekga taba yeo. Ngaka ya kua Scotland e re: “Ge e ba o thabile, go ka direga gore ge o dutše o gola o se ke wa lwalalwala go swana le bao ba sa thabago.”

ITHUTE GO KGOTLELELA. Go swana le Ulf yo go boletšwego ka yena pejana, re ka ikhwetša re gapeletšega go kgotlelela teko yeo e sa kgaotšego. Lega go le bjalo, re ka nyaka ditsela tša go kgotlelela. Batho ba bangwe ba nyama kudu ge ba welwa ke mathata, e lego seo se ka dirago gore boemo bo mpefale. Diema 24:10 e re: “Na o ipontšhitše o nyamile letšatšing la tlalelo? Gona matla a gago a tla hlaela.”

Lega go le bjalo, ba bangwe ka morago ga go kwa bohloko ba kgona go nyaka ditsela tša go ikalafa gomme ba ikwa ba le kaone. Ba amogela boemo. Ba hwetša ditsela tša go lebeletšana le bjona. Ulf le yena o dirile seo. Ulf o re ka morago ga go rapela gantši le go naganišiša ka molaetša wa Beibele o kgothatšago, o ile a “bona a bulegetšwe ke dibaka tša bohlokwa go e na le go dula a šeditše mathata a gagwe.” Ka gona, go swana le ba bantši bao ba lebeletšanago le mathata a magolo, Ulf o ile a ithuta go ba le dika tša bohlokwa, e lego go ba botho le go tshwenyega ka ba bangwe. Dika tšeo di ile tša mo tutueletša gore a botše ba bangwe ka molaetša o kgothatšago wa Beibele.

Motho yo mongwe yo a ilego a tlaišega kudu ke Steve. Ge a na le mengwaga e 15, o ile a welwa ke kotsi yeo e ilego ya mo golofatša go thoma molaleng. Ge a na le mengwaga e 18, matsogo a gagwe a ile a thoma go šoma gape. Ke moka o ile a ya Yunibesithi gomme ge a le moo o ile a thoma go diriša dihlaretagi, a nwa bjala le go itshwara gampe ka tša thobalano. O be a se na kholofelo bophelong, eupša ka morago ga gore a ithute Beibele o ile a thoma go lebelela bophelo ka tsela e botse gomme seo sa mo thuša go lwantšha mekgwa ya gagwe e mebe. Steve o itše: “Ke ile ka thoma go ikwa ke na le mohola. Ga bjale ke na le khutšo, ke thabile e bile ke kgotsofetše.”

Seo se boletšwego ke Steve le Ulf se re gopotša mantšu ao a lego go Psalme 19:7, 8, ao a rego: “Molao wa Jehofa o phethagetše, o tsošološa moya. . . . Ditayo tše di tšwago go Jehofa di lokile, di thabiša pelo; taelo ya Jehofa e hlwekile, e phadimiša mahlo.”