“Tšwelang pele . . . le lebalelana ka bolokologi le ge e ba motho a na le lebaka la go ba le pelaelo ka yo mongwe.”—BAKOLOSE 3:13.

Ka moka ga rena re dira diphošo. Re ka kgopiša ba bangwe goba ba ka re kgopiša, ka gona re nyaka go lebalela ba bangwe e bile re nyaka gore le bona ba re lebalele. Ge re lebalela ba bangwe ga re sa ikwa re kgopišegile ka seo ba re dirilego sona. Ga re lefeletše bobe ka bobe e bile ga re dule re gopotša batho ba bangwe ka diphošo tša bona. (Baroma 12:17) Eupša go thweng Ge e ba re kwele bohloko goba re sa kgone go lebala ka seo se diregilego? Gona re swanetše go boledišana le motho yo ka sephiring, re boledišane le yena ka tlhompho. Re swanetše go ikemišetša go dira khutšo e sego go bontšha gore rena re nepile le gore yo mongwe o fošitše.—Baroma 12:18.

“Ka boikokobetšo le tšee gore ba bangwe ba le feta ka bogolo.”—BAFILIPI 2:3.

Ge re ikokobeditše e bile re na le tlhompho batho ba bangwe ba thabela go ba le rena. Ba a tseba gore re tlo ba botho e bile ra ba naganela le gore re ka se  nyake go ba kweša bohloko ka boomo. Ge e ba re itšea re le bohlokwa go feta batho ba bangwe e bile re dula re nyaka gore dilo di dirwe ka tsela yeo rena re nyakago ka yona, re baka dikgohlano le diphapano. Batho ba ka se nyake go ba le rena e bile re ka se be le bagwera goba re ka no ba le ba sego kae.

“Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira se se lokilego o a amogelega go yena.”—DITIRO 10:34, 35.

Mmopi wa rena ga a kgetholle batho go ya ka setšhaba sa bona, maemo a bona setšhabeng goba go ya ka mmala wa bona. Go tšwa mothong o tee o dirile setšhaba se sengwe le se sengwe sa batho. (Ditiro 17:26) Ka gona batho ka moka mo lefaseng, ke bana ba motho. Ge re swara batho ba bangwe ka seriti le ka botho re ba dira gore ba thabe, le rena re a thaba, ke moka ra thabiša le Mmopi wa rena.

“Aparang . . . boleta”—BAKOLOSE 3:12.

Ge re le boleta re dira gore ba bangwe ba lokologe. Ba lokologa go bolela le rena le go re phošolla ka gore ba a tseba gore re ka se ba galefele. Le gona ge motho yo mongwe a re galefetše, eupša rena ra mo araba ka boleta, re mo thuša go theoša maswafo. Diema 15:1 e re “Karabo ge e le boleta e phohliša pefelo, eupša lentšu leo le hlabago le tsoša bogale.”

“Go na le lethabo le legolo go neeng go feta go amogeleng.”—DITIRO 20:35.

Batho ba bantši lehono ba na le megabaru e bile ba inaganela ba nnoši. Eupša re thaba kudu ge re efa ba bangwe dilo. (Luka 6:38) Batho bao ba ratago go fa ba bangwe dilo ba a thaba ka gobane ba rata batho go feta dilo tšeo ba nago le tšona. Lerato leo le ba hlohleletša gore ba leboge ge batho ba bangwe ba ba fa dilo. (Bakolose 3:15) Ipotšiše gore, ‘Na ke rata go ba le batho ba mohuta mang, ba go timana le ba go se leboge goba ba go leboga le ba go nea ba bangwe dilo tša bona? Re ithuta eng? Re ithuta gore re swanetše go ba seo re nyakago batho ba bangwe ba eba sona.—Mateo 7:12.